ZEKARIA 3 - OTSAO BAIBEL (BSI)

Nguakho bama Ajepa Mikngün-ohün

¹ Mama mikngün-ohün tuita ma Jowanpa ku hama Nguakho Jihusua Jowanpa kaxtaimix tunthoma ajongle ngokya aho. Ikhoma Jihusua zui ma Bao ajongle tüikya. Chix a Jihusua ang thaile le thüi ang achwonle tüikya.

² Jowanpa kaxtaimixe bao ang thüi: “Bao, Jowanpae nang thajaole naxchang. Ija khünak a wünkha tokya pakle laxkya wüntua ningle changpu.”

³ Jihusua a nyitsyen tuita awunlaxle ikhama ajongle tüikya.

⁴ Zangkangting to chix thotha ang ngokyabu füi ija kaxtaimixe thüi: “Ija mixsüne awunle ngokya nyitsyen sikle koxdao.” Ifüima chixe Jihusua ang thüi: “Kue nang ochax awütle fadaoa ilaxle nange awun ang ku nyizün koxüi.”

⁵ Chixe thothat mixbu ang, Jihusua khang ma nyi tsaokya füi khang-ngüi-nyi füi ngüile kox angkya akax. Jowanpa kaxtaimix ikhama ajongle ngopongma wüi hwome chix to nyizünbu füi awunle kox.

⁶ Ifüima Jowanpa Khüthak Zang kaxtaimixe Jihusua ang thüi:

⁷ “Nange ku wanlombu kax ma laxle kue nang ang koxkya mwotkat müile mokle jangchang thüiningle, kue nang a ku Zangshwom-Hom hia ija khwa to hume angkya mix ang achangle ngo ang tomüi. Chemle kue ku zui ma ngokya kaxtaimixbu zangjop atatle changpuix ija lailaile kue nang zangjopbu chu atatüi.

⁸ Ikhoma Nguakho ang ngokya Jihusua, nange apakoplax; üntoxle chix füikya zompu-zangpabu hünzomechu apakoplax, hünzom a füichi shomüi hanpak münwan changle: Kue Pünkang le nyakkya ku da, kue ngaile ahofaüi!

⁹ Kue Jihusua tunthoma long tuita othün anüt füikya danpu. Kue ija ma münwan zale thomüi ilaxle ija haxtok angkya ochax nyixtakya hanpak mawüi awüt faüi.

¹⁰ Chemtue ija nyix hüiüihex, hünzom grep haxtok hia fupsa pünbue akhople tumüi-lomkhaole tüikya hia chaza angkya chemchu chitüile tokdomdakya to mongmüi ang hünzome ma tomzi se angkya changle.”