ZEKARIA 14 - OTSAO BAIBEL (BSI)Jerusalem hia Jat-libu 1 Jowanpa kaxfün nui ma thung angkya hanpak chwonle tüile. Ifüima Jerusalem a tsuiüi, ilaxle ibu tsuikya tuinabu a hünzom miksho ma ahanle laxüi. 2 Jerusalem zan to ka angkya hanpakma Jowanpae jat-libu pangwüi asüi ang tomüi. Ija tingnu a hwome kopüi, homhaxbu tsuiüi, ilaxle shekobu to shingnünle changüi. Khünaknu süifi a zanda ang kople paoüi, mamabu a tingnu angkya kople münpaoüi. 3 Ifüima, amipongma chix azanle hüikya ningle Jowanpa a ibu jat-libu zan to kaüi. 4 Ipongma chix, Jerusalem zong ma handünchi, Olip Haxnu ma ajongüi. Ifüima Olip haxnu a chongkya haxbang makhange handün hia hannop le ahanüi. Haxnu süifi a shuakux chito paoüi, ilaxle süifi a hannop chito paoüi. 5 Hünzom a ija haxnu anyi ang achangle ahankya haxbang makhange azangle paoüi. 6 Chemtue ija hanpak nguile hüiüihex, ikhato zangkong hia jun ang achangle adwonkya müntüiüi, 7 chichangba zangnak chemchu müntüiüi. Zangnaknu khato ngaxchu jento anyixningkya zangngai tüile ngoüi. Ija hanpak chemtue changüihex ija Jowanpa chix tatae tix awan. 8 Chemtue ija hanpak nguile hüiüihex, Jerusalem makhange tsaothakya tibu jenüi, ija angkya süifi Omang Tinu to ilaxle süifi a Mediterenian Tinu tole jenüi. Ija a zangwa hia tsonu chisüile zanglao atale jenüi. 9 Ifüima Jowanpa a chaxwannu ma wanghompa ang changüi; noknusae chix a Zang changpule shwomüi ilaxle ija mün tuita mawüi chix tsingle laxdaoüi. 10 Shuakuxchi ma Geba makhange shuathongchi ma Rimon alople, ija wankamkam bakle haxsha ang zingüi. Jerusalem a, she akhople tüikya haxtok ibu pangwüi thakma achuakle nwonüi; ija tingnu a, kaitanto zünkai tüikya, üntoxle Benjamin Zünkai makhange Ozong Zünkai alople tamchu Hananel Towar makhange wanghom hwom grepti-ju fyetnui alople tüiüi. 11 Ikhato khünaknu a chaza angkya chemchu chitüile ngoüi. Thamae tingtui adün ang aza-anakya chemchu müntüiüi. 12 Jerusalem ma achax-azanle changkya jat-libu pangwüi Jowanpae okak-olak ahüiüi. Hwom ozün ma tüitanto wüi hwom tsangtsa müibu shanle paoüi; hwom mik hia ibu shanle paoüi. 13 Ipongma Jowanpae hwom huanuma jepakya hia chazakya tüi ang tomüi ilaxle hwome ma zui ma tüikya khünak to soxle shingle tata zan to kakya tüiüi. 14 Judah angkya khünaknu Jerusalem kho-awa ang azanüi. Mixjat mixlibu angkya tuina--hun, khop hia nyi-za, iningkyabu huanuma tsui kopüi. 15 Zan nok thongnui ma tüikya müi, man, mansa, ut hia mantsak, ibu hato chisumüikya okak-olak hüiüi. 16 Ilaxle Jerusalem zan to kale changdaokya jat-libu khama ota toxle tüikyabu pangwüi zangfokya to ikhato Jowanpa Khüthak Zang to shwom ang nguiüi ilaxle ikhato hwome Pomsa Pangpwon saxüi. 17 Owa jat-lie, ikhato nguilaxle Jowanpa to wanghom changpule shwom ang angamle changpuix, ibu haxtok to zangwat ti mündütüi. 18 Ija Pomsa pangpwon münsaxpu le Ijip nokbu angamle jangchang, hwom hato chuwüi chix to münshwompu le angamkya mama jat-libu hato ahüikya okak-olak füi Jowanpae chakmokle changüi. 19 Ija a Ijip nok hia mixnokbu opange Pomsa Pangpwon münsaxpu le angampuix ibu hato ahüi angkya sikngün changle. 20 Ipongma manbu ma laxkya züpakbu ma ngaxchu “Jowanpa hanpak ang atsaopu”, le zale jao apütle changüi. Zangshwom-Hom angkya tiklakbu pangwüi tö-tsap zui angkya khuatsum füi tomwüi otsao changüi. 21 Jerusalem hia Judah ma tüikya fongkhat tiklak komle Jowanpa Khüthak Zang to shwompongma lax ang süile thomüi. Tö koxkya khünakbue ibu müi hia mama töbu lumle song-kha ang twonüi. Chemtue ija hanpak nguile hüiüihex, Jowanpa Khüthak Zang Zangshwom-Hom ma thalex-juataikya chemchu müntüiüi. |
Wancho Naga Bible - OTSAO BAIBEL
Copyright © 2012 by The Bible Society of India
Used by permission. All rights reserved worldwide.
Bible Society of India