ZEKARIA 1 - OTSAO BAIBEL (BSI)

Jowanpa e Chix Khünaknu Chix hato Chat ang Nyak

¹ Dairas-e Parsia apünkya zanglao anyi lükya to lyetnukua achyet ma, Jowanpa ajepa Zekariah ang kaxho kox. Chix Berekiah sasün üntoxle Iddo hosu changkya.

² Jowanpa Khüthak Zang-e khünaknu füi akax angkya Zekariah ang thüi: “Jowanpa, ku a hünzom pupa hwom füi tüle mongmale changkya,

³ ikoxlechu athax kue thüipu, ‘Ku hato chat-hüi, üntoxle ku chuwüi hünzom hato chatüi.

⁴ Hünzome a hünpu-hünpa hwom lailaile taxchang. Ku ajebue kaitanto wüi hwom hato ku kaxho apüile, hwom ang chichangchizangle tamchu ochax tsün chingo angkya akaxpu. Ikoxle hwome ku kax chiapa tamchu ija ku kax ma chilax.

⁵ Hünpu=hünpa hwom hia ibu ajebu athax ozün ma chitüi.

⁶ Ku dapa aje hwom makhange kue hünzom pupa hwom ang kaxtom hia kaxkhünbu koxle hüipu, ikoxlechu hwome ibu kax to chiapa ikhoma hwome ija olüix apongle sikngün kop angkya lai. Ifüimatix, Jowanpa, kue chemle texlaxpuix ija ningle hwom to sikngün ang tomkya changa, le tsing laxle mongchat.’”

Ajepae Manbu Ngünkya Mikngün-ohün

⁷ Dairas-e apünkya zanglao anyi lükya to, lyetnukua bünbüta angkya nyixtsa ali nyixkha (ija a Shebat lyetnu changkya), zangnak ma Jowanpa ku ang mikngün-ohün kox.

⁸ Kue mankhi tuita ma ngakya khünak tuita ngün. Chix a haxnucha angkya martul fumsaham khama chix zak. Chix tokfüi ma chuwüi mama manbu--mankhi, mannak, üntoxle mantho, ibu tüikya.

⁹ Kue chix ma atüi: “Alixachong, man ibu a chem hanpak?” Chixe lan: “Ibu chem hanpak hex kue nang hama ahoüi.

¹⁰ Jowanpa ibu a nguilaxle chaxwannu to hule tox angkya hanpakma Jowanpa tsanle apaokya changpu.”

¹¹ Hwome kaxtaimix hama kaxwün wangle thüi: “Kwome chaxwannu pangnu khato hudaoa ikoxle kwome, chaxwannu a chingcha-ashukle tamchu mixe apün-ada laxle tüia, le ngünle toxle.”

¹² Ipongma kaxtaimixe thüi: “Jowanpa Khüthak Zang, Jerusalem hia Judah nok tingnubu füi nang mongmakya zanglao puzombün jao nguile hüile. Nange chingcha ahoüima athaxchu chaxwan-zanghan chemtukuxle tüi?”

¹³ Mongsom kax füi Jowanpa kaxtaimix kax to lan.

¹⁴ Ilaxle Khüthak Jowanpa chem akax daopuix ibu khuapu angkya hanpakma kaxtaimixe ku füi akax. Jowanpa kax a: “Ku otsao tingnu Jerusalem hanpakma kuma mongkün hia tuitex zukya tüile,

¹⁵ dangjajale hia somdangle ngo angkya kopkya jat-libu füi ku ang tüle mongtsikle. Chemthüikoxle kue ku khünaknu füikya ku mongtsik abaxle thompongma, ibu khünaknue ku khünakbu sikngün sisi ziamale chang ang tom.

¹⁶ Ikhoma ku Jerusalem to ku chingcha aho ang chatle nguipu. Ku Zangshwom-Hom a chatle zaile alaiüi, ilaxle tingnu a chatle azünle zingüi.”

¹⁷ Kaxtaimix-e ku ang ija kax apuk angkya akax: “Jowanpa Khüthak Zang-e thüile, chix tingnu a tamchatle ahak-aluale changüi üntoxle chixe Jerusalem to tamchatle fongüi ilaxle ija a chix tingnu changpule laxüi.”

Müizongbu Ngünkya Mikngün-ohün

¹⁸ Mama mikngün-ohün ma kue maihupong ali ozongbu ngün.

¹⁹ Ku füi akaxle ngokya kaxtaimix ma kue atüi: “Ibu müizong a chem hanpak?” Chixe lan: “Ibu a, Judah, Israel, üntoxle Jerusalem angkya khünaknu chiakle sam ang tomkya chaxwannu tsak-zong münwan changle.”

²⁰ Ifüima Jowanpa jantu füikya mwotmok mix mixsün ali aho.

²¹ Kue atüi: “Hwom a chem mok ang nguipu?” Chixe lan: “Hwom a, Judah haxtok komkaile thule asyep üntoxle ija angkya khünaknu chiakle sam ang tomkya jat-libu chabüt-lasün ang tamchu ibu to asongle thok angkya hanpakma nguikya changpu.”