ZEFANIA 2 - OTSAO BAIBEL (BSI)

Künlop-monglüi hanpakma bama Chingcha Jukya

¹ Zak chitüikya jat-li, hünzom ang khangka hinglax,

² zangwin to tsaxfa ningle pikle pao thoto, Jowanpa mongtsik wünchua nang hato mahüi tanto, chixe chix chabüt-lasün ahole changüi hanpak thoto.

³ Jowanpa hato chatkox, haxtok angkya puinaile tüikya khünaknu pangwüi, hünzom chix kaxtombu kax ma laxle tüikyabu. Chem supuix ija mokkox, ilaxle Jowanpa tuntho to malualua to puinaile changlax. Ile jangchang thüiningle Jowanpae chix mongtsik ahokya nyix hünzom azangle pao ang tsuak.

Israel Nok Akhople Tüikya Jat-libu Olithukya

⁴ Gaza tingnu ma owachu danle müntoxüi. Ashkelon a awütle toxdaoüi. Ashdod angkya khünaknu a tsomtho ma wüi jwonle apaoüi, ilaxle Ekron angkya khünaknu hwom tingnubu angkya jwonle apaoüi.

⁵ Hünzom Filistia nok, opang tinu achole ating-anokle tüilaxpuix, hünzom olithupu. Jowanpae hünzom hanpakma zangwün tsuakdaoa. Chixe hünzom olithuüi, ilaxle hünzom mixhuak tuita danle chitoxüi.

⁶ Tinu kax ma tüikya hünzom haxtok a kotho ang achang laxle chunnyetmixbu pomsa hia chun pombue awangle tüi ang tomüi.

⁷ Judah khünakbu opang atale toxpuix, hwome ija hünzom haxtok laxüi. Hwome ikhato hwom chunbu danle fumtsüt ang tomüi ilaxle hwom Ashkelon hombu ma pomüi. Jowanpa hwom Zang hwom füi tomle tüiüi ilaxle hwom tamchatle ahak-aluale tüi ang tomüi.

⁸ Jowanpa Khüthak Zang-e thüi: “Moab nok hia Amon nokbue ku khünakbu adix-adale ajaokya, ilaxle hwom haxtok hwople kop ang thoüile kaxngam akaxkyabu kue atatle hüidaoa.

⁹ Ku chemle otsingtsing Jowanpa, Israel nok Zang changpuix, iningle kue, Moab hia Amon nokbu a Sodom hia Gomorah amütkya lailaile otsingtsing ma amüt angkya kue tsaopu. Hwom a othuithui hanpak ang hum tswomlua ang achang paoüi. Ija a tamchatle chimüi angkya thama ang changüi. Ikhato hingzange awangle changüi. Ku khünakbu opang ota toxle tüilaxpuix, hwome ibu haxtok laxüi.”

¹⁰ Ile Moab hia Amon nokbu a, hwom mongngam hia mix to asongle hukya tamchu Jowanpa Khüthak Zang khünaknu adix-adale changkya khoma sikngün ang tom angkya changle.

¹¹ Jowanpae hwom chabüt-lasünle chang ang tomüi. Chixe ija chaxwannu angkya baozangbu chem angchu chichangle ahikle awütdaoüi, ifüima jat-li pangnusae, ma chaxwan khokho to chix to shwom-töle changüi.

¹² Jowanpae Etheopia nokbu zi ang tomüi.

¹³ Asiria amüt angkya hanpakma Jowanpae chix tsak-zong twonüi. Chixe Ninewi tingnu a khünak chingokya tingnu tamchu ti ojao chitüikya sak-hax ang achangle awütüi.

¹⁴ Ejongkha a mali-mali müi ozyembu ngokya nuiting ang achangüi. Okhuxbu a ija male paoünkya khato ngoüi ilaxle thangmik makhange kuku le ngaoüi. Okhabu fülombu ma ngaoüi. She hom angkya sedar pünbu pünle amaüi.

¹⁵ Matsak-mazong bama mongngam laxle owae chemthüithoüi le ngokya tingnu to ile changüi. Ikhama ngokya khünaknue chaxwannu ma hwom tingnu ma akhopu le thütle. Ijakha chemningkya chilaxli onui ang achangle paoüihex! Ikha a faomüibu ngwotnui ang achangüi. Ikha akaile lekya khünak pangnusae wüi ikha ngünlaxle khangmun ajongle khomtsi.