WANWÜNKAX 8 - OTSAO BAIBEL (BSI)

Je-hwon Achuakle

¹ Apalax! Je-hwone nyakle ngole. Tsing-wankyae she zing alüile atat ang koxle ngole.

² Lomzui ma haxnukho to ilaxlechu lompong ma she ajongle.

³ Tingnu to nopkya panja ma, zünkai hama, she-e nyakle:

⁴ “Kue hünzom pangnusa füi akaxpu; kue chaxwan tokma tüikya pangnusa nyakpu.

⁵ Nang mazia hexnyi? Zia angkya awan koplax. Nang ongat hexnyi? Khangka zai angkya awan koplax.

⁶ Kutsai-kukax zukyabu to apalax; kue nang füi akaxkya pangwüi otsingtsing changle.

⁷ Kue chem akaxpuix ija a kaxtsing jaojao; kaxthai zangwün ku zongto nushix dongkyabu changle.

⁸ Kue chem akaxpuix pangwüi changkyakya wüi; othai chichangba chichangkya lom to zunle paofang chemchu müntüi.

⁹ Tuitex füikyabu zongto ibu pangwüi tsaothale; müile apuale fadaokyabu zongto ija a tangtho.

¹⁰ Khop-jan füi ngaxchu kue adangle fakyabu wüi zünle koplax; atsaokya hun füingaxchu awan-atsingkya wüi zünle koplax.

¹¹ “Ku a je-hwon changpu, ku a liknu füi ngaxchu sümüi; ku Füi afyen angkya nange laxse tsukya chemchu müntüi.

¹² Ku a je-hwon changle, ilaxle ku ma mongjang tüile; ku ma awan-atsingkya tamchu sukya kaxfün fa angkya tüile.

¹³ Jowanpa chathua zakya a ochax thua anukya changpu; kue kün-ngam mongngam hia tsaichong-kaxbongle tüikya thua anule, chichang-chizangkya zangwünbu hia othai lomtangbu thua ku anule.

¹⁴ Kue mwottho zingpu ilaxle ibu mokle paopu. Ku ma awan-atsingkya tüipu, ilaxle ku a tsak-zongle tüile.

¹⁵ Wanghombu to kue apün ang fongpu pünpa-chongwangbu to müikya wanlombu zing ang fongpu.

¹⁶ Chaxwannu ma apün-awangkya pangnusae wüi kue fongle tix apünpu, iningle nguawang hia wangnak-wangshembue chuwüi kue fongle tix apünpu.

¹⁷ Kue ku to mongkünkyabu to mongkünle; opange ku lompuix ibue ku ataktsuaküi.

¹⁸ Ahak-alua angkya hia achuak-achenkya kox ang ku ma tüile, okop-olwot hia tho-lün angkyachu ku ma tüile.

¹⁹ Nange ku angkya chem koppuix ija a tsaothakya hun füi ngaxchu wüi sümüikya changpu, tsaothakya khop-jan füi ngaxchu amüikya changpu.

²⁰ Ku otsao khünakbu lomtang ma ahampu; kue sukya kaxfün lomtangbu topu.

²¹ Ku to mongkünkyabu ang tüi-na koxpu, ilaxle hwom homkha tuiza-nakombu füi awang ang tompu.

²² “Jowanpae pongwang ma ku zingpu, kaitanto chix chak-mwot khama pongwang lükya.

²³ Ku a owang pongma zingkya changle, pongwang ma wüi, chaxwannu mazing tanto wüi.

²⁴ Ku a molo tinubu thoto wüi puxkya changle, shuasa tijen tuita matüi tanto wüi a.

²⁵ Ku a haxnubu thoto wüi puxkya changpu, onui ma haxhuabu danle machang tanto wüi a,

²⁶ Zang-e chaxwannu hia kothobu zingle machang tanto wüi a chichangba chakpuix tukux haxdwon tuita mazingba wüi a.

²⁷ Chixe zangding onui ma danle chang pongma ku tüile ngokya, molo-tinu akaile haxtua-zangnam pünle chang pongma a.

²⁸ Chixe zangding to zangfwom danle chang pongma tamchu chixe molo-tinu tümikbu daple chang pongma ku tüikya.

²⁹ Chixe tilo-tinu angkya tibu ang kaxtom koxle chixe thütle koxkya to kaile ti chidong angkya akax pongma ku tüikya. Chixe chaxwannu chifün zaile chang pongma ku tüikya.

³⁰ Zingpa tuita ningle ku a chix tokfüi ma tüikya, kue jento chix mongmüi otong ningle changkya.

³¹ Chaxwannu füi mongmüi ilaxle khünaknu füi pwonla dong.

³² “Athax, tsünzün-hom, ku kax to apalax. Kue chemle akaxpuix ile moklax, ilaxle nang mongmüile ngoüi.

³³ Nang hama chem anwot-anole changpuix ija to apalax. Jetüi-hwonlang lax; ija tha ajaole taxchang.

³⁴ Opange ku kax ma laxpuix: opang nyixfokya to ku hom zünkai ma ku hom fülom nyele ngopuix, hwom mongmüile ngoüi.

³⁵ Opange ku atak tsuak puix hwome khüzün koppu, ilaxle ibu füi Jowanpa ang mongmüikya tüiüi.

³⁶ Opange ku atak ang chithopuix hwom lailai to thomzünle; owae ku thua anule changpuix chixe zik to luapu.”