WANWÜNKAX 7 - OTSAO BAIBEL (BSI)

¹ Ku sa, kue akaxkya kax texle ataklax ilaxle ku mok ang akaxkya otuechu taxalak.

² Kue chem akaxpuix ija moklax, jangchangba nang ozün ma ngoüi. Nange nang mik sünle thom ang chemtukux khünzaipuix itukuxle ku hwon-nwot kax ma laxle tüi angkya bama khünzailax.

³ Ku hwon-nwot a othuithuima nang füi thomlax; ija nang mongkha ma zale koplax.

⁴ Je-hwon to ma na-nao tukuxle hukox, ilaxle mongjang to amüikya ma zuikhui tukuxle hukox.

⁵ Ibue nang mix kakonubu füi atsaile thom ang thoüi, tüle-tüle tunmüi zangwün ang awankya mixchabu füi a.

Chichangchizangkya Mixcha

⁶ Hanpak tuita ma kue ku hom thangmik makhange hule changkya,

⁷ ipongma kue chemchu matik-mawankya naosünbu ngün, ikhamachu tamsüile tuita angapa atsingshole ngünle lax.

⁸ Chix a mixcha tuita ngokya homzong chikao lomfole ahamle tüikya. Chixe a she homzui makhange lengokya.

⁹ Ija a hansong zangnak füima changkya.

¹⁰ Ifüima she-e chix apongle lax; she a tsangtsa hangkya mixcha tuita ningle zapua laxlaxle tüikya ilaxle she-e ija ziasyen lomle ngokya.

¹¹ She a tüle mongchongkya tamchu ojao thünzak chitüile tingjang lomnu to ahamle ngokya mixcha tuita changkya.

¹² She-e onuk-ozong to tanle nyengo, tampong a tingjang-lomnu to, tampong a thalex-wünwan nui to tanle ngo.

¹³ She-e ija mixsün to künle hüi ilaxle chix füi tun apong. Chix to mik-mik ma tangthole hu ilaxle akax,

¹⁴ “Aja kue ku tö koxpu ilaxle kue tö koxkya kha angkya müi saxlax.

¹⁵ Ikhoma ku nang lomle laikya changpu. Kue nang nam-atakbae le sungle ngokya, ikoxle athax kue nang ataktsuakpu!

¹⁶ Kue ku lya a Ijip nok tokya wünkya jaknyi nomle zingdaoa.

¹⁷ Kue ija to jingso, aloi-ti hia sinamon füi haple changdaoa.

¹⁸ Oman! Zang angaile mongkün mwot mok-hax. Künyi tata ahuijak ma huanuma mongmüile changüi.

¹⁹ Ku kakopa a hom ma müntüi. Chix a mixting to paodaoa.

²⁰ Chixe ngun huanuma laxlaxle toxdaoa ilaxle chix a hatdang anyi füimatix chatüi.”

²¹ Ikhoma she-e chix jikle laxtsuak, ilaxle chixe she füi zaxhun ma zangwün ang süt.

²² Maihupong ma lang ang syetle paopupule she füifüi azuile lenui, müikhi tuita tai ma manpupule

²³ ojong khato chix to sanjun füi tople changüihex. Chix a ozop khato paoüi osa tuita ningle changkya: chixe chix khüzün a thama ma tüile le chitik.

²⁴ Idaile athaxpi, sasün-hom, ku kax to apalax. Kue chem akaxpuix ija to nathalax.

²⁵ Iningkya mixcha tuitae nang mong jik-shemle lax ang taxtom; she mantole taxazüi.

²⁶ Khünakbu tsün amakya hia mik max ang tomkya otong a chix changle.

²⁷ Nang she hom to nguile jangchang thüiningle, nang a amalum lom chitole ngokya changpu. Ija a mikmüt hanpakma hexlom changpu.