WANWÜNKAX 5 - OTSAO BAIBEL (BSI)

Chinunchakkai bama Kaxkhün

¹ Ku sa, ku je-hwon hia mongjang to mongkoxlax tamchu nathalax.

² Ile jangchangba nange zanglom-saikha chemle müile thomüihex ija awanüi, ilaxle nang kaxfa makhange nang ma je tüikya ahoüi.

³ Mix kakonu tunpün a nax-ti tukuxle tikoxlax ilaxle she tunpong a olip münga tukux lyak-lyakle chule tüi ang tsuak,

⁴ ikoxlechu chemtue ibu pangwüi tsuakle hüiüi hex, she-e nang ang khaxkya boma tsütle kakkya toxüi.

⁵ She-e nang a amalum panfang to joüi; she lekya lom a zikmüt-mangkho lom changpu.

⁶ She a khüzün lomtang ma münngo; ikoxle khuafaole ahamle, ilaxle chempang changle ngopuix ija müntik.

⁷ Athax ku kax apahüi, ku sasün-hom, ilaxle kue akax ngokya tütue chu alakle taxasam.

⁸ Iningkya mixcha füi atsaile ngolax! She fülom hato ngaxchu taxsox!

⁹ Nange ile jangchang, amipongma nang ma tüikya achuak-achenkya owawa chak to dongüi, ilaxle nang a ojao chingcha chitüikya khünakbu chak ma tsünpakle paoüi.

¹⁰ Changle, süntsing-münwan chitüikya khünake nang tuina pangwüi laxüi, ilaxle nange chem hanpakma mokmole hüidaopuix ija a owawa kux ang achangdaoüi.

¹¹ Nang müi hia hak bakle sumle, nang a ziklya ma wotle sop-ngoüi,

¹² ilaxle nange thüiüi: “Kue chemtuechu awanle chikople chemthüikyadai? Owawae ku achangle zing ang chikoxle ku büthüi ang tüikyadai?

¹³ Kue ku nwotmix hwom tsai-kax to chiapa. Kue hwom to ojao mong chikox.

¹⁴ Oshukma kua noknu tunthoma ema chilaxle bang.”

¹⁵ Nang kakonu to mongong-chalomkya tüikox ilaxle nang mongkün a she tata ang laxkox.

¹⁶ Mama mixchabu makhange kopkya nang naosombue nang zongto müikya mwot chemchu mokle münfaüi.

¹⁷ Nang naosombu a, mix to chichangle, nang to fong ang tsongle hüi angkya olom.

¹⁸ Idaile nang kakonu füi mongmüikya tüilax ilaxle nange kako ang tankya mixcha füitix nang mongmüikya tüilax.

¹⁹ She a khisa lailaile osün müiwüi müile tüile. She künkak-mongküne nang mong amüile naxthom; she-e she mongkün füi nang ziakople thom ang tomkox.

²⁰ Sasün, nange nang mongkün mama mixcha ang büthüikoxle kox angkya? Nange mix kakonu sünmüi-johang to chem ang osing tüi angkya?

²¹ Jowanpae nang mwot pangwüi ngünle ngole. Nang ojongto paopuix, chixe nyele ngole.

²² Chichangchizangkya khünakbu ochax a kam thakya tuita changle. Hwom a ma ochax sha ma alüile manle.

²³ Hwom ma alüile akumathumkya chitüikya khoma hwom mik max angkya laile. Onua tuita chitoxle hwom ongat ang changkyae hwom zuk-kha chito zunle pao angkya changle.