WANWÜNKAX 3 - OTSAO BAIBEL (BSI)

Tsünzünbu ang Adangle fakya

¹ Ku sa, kue nang hama anwot-anole fakya taxalak. Kue chem mok ang akaxpuix ija jento mong ma kople thomlax.

² Ku hwon-nwote nang a tsünlo-zaknuile ngo angkya tamchu ahak-alua angkya faüi.

³ Kax ma laxle tüikya hia mongong-chalom nang chak angkya pao ang taxtom. Ibu a nang dingkux ma adangle kha thomlax; ibu a nang mongkha ma zale thomlax.

⁴ Nange ile jangmok thüiningle, Zang hia khünak pangwüi nang füi mongmüiüi.

⁵ Nang mong makhange abakle Jowanpa to mongongkya tüikox. Nange chem awanpu le texpuix otuechu ija to onglaxle taxngo.

⁶ Nange mokkya pangnu ma Jowanpa texle ataklax, ile jangchangba chixe nang ang changkya lomtang ahole faüi.

⁷ Nang zongzong ma nang a jepa tuitale taxajang; ikoxle tangthole Jowanpa kax ma laxle tüilax ilaxle thaikya mwot taxmok.

⁸ Nange ile jangmok thüiningle, ija a müikya hinghai tuita ningle changüi. Ijae nang mak amüiüi ilaxle luakle kakkya adangüi.

⁹ Nang haxtok ma puamünkya kha angkya sümüikya Jowanpa ang to apüile koxle makhange chix achuak-achen kox.

¹⁰ Nange ile jangmok thüiningle nang pung a sax füi awangle ngoüi, ilaxle nange athünle thom angkya onüi chitüile nang ang grepti-ju huanuma tüiüi.

¹¹ Ku sa, chemtue Jowanpae nang achangle faüihex, ija to nathale apa koplax ilaxle ija a kaxkhün tuita ang laxlax.

¹² Chemle ma mongzom müikya su-sa tuita honu-hopae achangle fapuix, ija lailaile Jowanpae chixe mongkünkyabu achangle fale.

¹³ Owa jetüi-hwonlang mix ang achangpuix tamchu tsing-wankya lax ang nguipuix: mongmüi mix a chix changpu.

¹⁴ Hun-khop füi ngaxchu ija ma wüi olüi huanuma tüile; ija a nang zongto hun füi ngaxchu wüi thanu changle.

¹⁵ Je-hwon a liknu füi ngaxchu thalix changpu; nang monge laxse tsukya tütachu ija füi apyen ang müntsuak.

¹⁶ Je-hwone nang ang tsünlwot fale, ifüi tomle tuina hia achuak-achenkya chuwüi fale.

¹⁷ Je-hwone nang tsün tuita pwonla tsün ang achangüi ilaxle ija akaile chem thomzün chitüile le ang tomüi.

¹⁸ Jetüi-hwonlangkya mix ang achangkya a mongmüi mix changpu; je-hwone hwom ang khüzün faüi.

¹⁹ Jowanpae chaxwannu chix je-hwon füi zingle alai; chix je-hwon makhange chixe zangding onui ma dan.

²⁰ Chix je-hwon makhange shuajenbu jen ang tom ilaxle zangfwom makhange chaxwan tok to zangwat ang tom.

²¹ Ku sa, nang je-hwon hia mongje to künle thomlax. Ibu otuechu nang angkya atsaile pao ang taxtom.

²² Ibue nang ang pwonla hia mongmüie awangkya khüzün faüi.

²³ Nang lomtang ma nang chikho suakya tamchu thomzün-maklax chemchu chitüile le ang thoüi.

²⁴ Lyading to dongüima nang chazakya chemchu müntüiüi, ilaxle zang angaile mikngüt müile jip ang thoüi.

²⁵ Chichangchizangkyabu hato asünle hüikya zangchei-zangwat ningkya thua nang za-ngo angkya chemchu müntüi.

²⁶ Jowanpae nang sünle thomüi. Chixe nang mix tsün ma man ang müntomüi.

²⁷ Nange mokle tsuaktang tüipongma, fongse lükyabu to asunle laxkox.

²⁸ Athax fongle koxtsuak tang tüingale nang tomzibu ang ngainopkya tha tanhüile taxthüi.

²⁹ Nang tomzibu zongto oma mwot chemchu taxsua; hwom a nang to onglaxle nang homzui ma ngopu.

³⁰ Nang zongto oma mwot chemngax chimokkya khato chemtsai: chemkax chitüikya owawa füi ala-ashale taxchang.

³¹ Changnong-pümthomle tüikyabu to osing taxtüi chichangba hwom lailaile mok ang mongzangwünkya taxtüi,

³² chemthüikoxle chichang-chizangkya mwot mokle ngokyabu thua Jowanpa anule, ikoxlechu otsao khünakbu to chixe mongong-chalomkya tüile.

³³ Chichangchizangle tüikyabu homkha to Jowanpae thuakzomkya koxle, ikoxle otsao khünakbu homkha to mohiman koxle.

³⁴ Mix chanyi-wanjaile tüikyabu chixe münlom, ikoxle puinaile tüikyabu hato chixe chingcha ahole.

³⁵ Jetüi-hwonlangkya khünakbue achuak-achenkya kopüi, ikoxle ongatbue hwom künmax-mongshankya to janbo langüi.