WANWÜNKAX 26 - OTSAO BAIBEL (BSI)

¹ Tsonue nyenti dütkya hia tsaxtu pongma zangwatkya chisukya ningle mongkho chinguikya khünak achuak-achenle changkya ojao münpax.

² Othuak-ozome nang to, nang hato ija nguikoxle asule chichang thüiningle chem münthüi. Ibu a pile ahamkya zangzung chikoxkya osabu ningle changpu.

³ Nange man to zu füi fit angkya wüi, mantsak dingkux ma zu lang angkya wüi, ilaxle ongat khünak to wyen angkya wüi changpu.

⁴ Ngatkax-nguikax to chix lailaile ngat-nguile kaxlan fakya taxtüi, ile jangchangba nang chuwüi ija kax atüikya khünak füi tomwüi ongat ang changpu.

⁵ Ongat kaxtik to ongat kaxlan fakox, ile chichang thüiningle chix mik-hu ma alüile chix a jetüi-hwonlangkya mix changpule ngamkya tüiüi.

⁶ Nange ongat khünak ang zangwün ang jangtom, nange nang nakua sex angkya laiüi; ija nange tingtui ahyen ngokya ang changpu.

⁷ Chathuke hwom cha asha thomkya ningle mongkho chinguikya khünakechu wanwünkax twon ang tsuak.

⁸ Ongat khünak tuita achuak-achenle changkya a kaisa mik ma longnu apüt ang azong ngokya thatha changpu.

⁹ Mongkho chinguikya khünake wanwün tsai-kax tswonle changkya a jutokmix tuitae chak angkya hux kex ang azongkya thatha changpu.

¹⁰ Owawa le-zyenüi ongat khünak tuita mwotmok ang se-lomle changkya a ikhama mokkya noknusa ang mongma ang tomkya tuita changpu.

¹¹ Mongkho chinguikya khünak tuitae tütali ongat mwot mokle changkya a mae fatle awüt toxdaokya hato chatle tamchatkya hi ningle changpu.

¹² Je-hwon chitüi khato jetüi-hwonlangkya mix ningle thütkya khünak tuita füi a mongkho ojao chinguikya anga tuita wüi sümüi.

¹³ Zaxkak mix homkha angkya otuechu chilaile büthüikoxle changpuix? Hwom ang mailangbu thua za angkya chemtüikya?

¹⁴ Kahak daptox-haktox le ngokya ningle zaxkakmixbu a hwom lya ma lik-lople ngole.

¹⁵ Khünak züizüi a ma wikha ma süt-sho ang ngaxchu aole zaxkakle.

¹⁶ Zaxkak mixe, ma füi sümüile kaxlan fatsuakkya mixsün anüt füi ngaxchu chix wüi jetüi-hwonlangkya mix changpule thütle.

¹⁷ Chix mwot chemngax chitüikya khato mix kaxma ma alatkya khato womle bangkya mixsün a lomnutang to zikle leüi hi to hona ma bele kopkya ningle changpu.

^18-19 Owawae owawa to chichangle hwonle kop üntoxle chix abaokya changwüi le atsingkya khünak a thomzünle kopkya li chang-pax füi ahaoxkya ongat khünak changpu.

²⁰ Ha chitüi thüikoxle wün maxle paoüi; khualop chitüi jangthüiba hyet a zakmaxüi.

²¹ Longnake wündix akhikle thomkya ningle ha füi wünchua laile achua thomle, ija lailaile tingtui adünkya khünake zangwün ashuk ang chikoxle thomle.

²² Khualop a tiwüi ti! Ija joksele kem monge chemtukux luapuix!

²³ Nang mongtex otsingtsing ngai ang chitomkya chilaxli zangwün a muakya haxtik to huxkya jikjepkya tik ka-hux ningle changpu.

²⁴ Künkux-mongkwom khünake chix tunmüi zangwünbu nuakfüi ma miktsak zuile thomle.

²⁵ Ibu zangwün müile atatkoxlax, ikoxlechu chix to taxong, chemthüikoxle chix mongkha a dingkux kople miktsake awang laxle tüile.

²⁶ Miktsak-mongwom chitüikya ningle chix atsing ang tsuakkoxlax, ikoxlechu chixe mokkya ochax mwot noknusae ngün ang kopüi.

²⁷ Mix aman ang kam thale changkya khünak ma kam ma mawüi manle. Longnu a owae atüile wangpuix chix ding mawüi dütüi.

²⁸ Owawa mongto kakkoxkya a chix thua anukya changpu. Khohangle zangwünkya a chix amüt ang tungkya changpu.