WANWÜNKAX 23 - OTSAO BAIBEL (BSI)

-6-

¹ Owawa alixachong füi nang fongsax ang thungle changpongma, chix owa hex ija mong ma akhax koplax.

² Huanuma fongsaxse le tsukya nang ma jangtüi, nang lualua to adulax.

³ Chixe fakya sütmüi-lingma to mong apamle taxchang; owatsing chixe nang to thwonle ngokya wüi changtüilax.

-7-

⁴ Nang lualua to saxpu-luawang hwom zapua chilax angkya bama khünzailax.

⁵ Hozang donglaxle ziale ola hosa pile paokya ningle, nang ngunsyen a noxtakya bama wüi bakle hüi ang tsuak.

-8-

⁶ Saxkün khünak tsap ma otuechu fong taxsax chichangba chixe koxkya sütmüi-lingma to onüi saxsele afak-apamle taxchang.

⁷ Chixe thüiüi: “Anaole chu saxkox”, ikoxlechu chixe naxsax tomta le thüikya chichangtüi. Chix mongjang a chix chem hex ijatix changpu.

⁸ Nange chem saxdao laxpuix pangwüi fatle alaiüi, ilaxle nange ipong müile zangwünkya a obato samüi.

-9-

⁹ Ongat hama tutex zangwün ang taxazongzi; chixe ija to müile le münthüi.

-10-

¹⁰ Bangkya longzi-manghua otuechu taxachex chichangba zasa-khaxsa changdaobale hwom haxtok pale taxlax.

¹¹ Jowanpa a hwom khose angkya janzüi changpu, ilaxle ija zangwün bama chix nang füi alaüi.

-11-

¹² Nang nwotmix to mongkoxle apalax ilaxle tsuakkya tukuxle chix angkya awanle laxkox.

-12-

¹³ Naosom to zünsaile chang angkya bama mongao taxtüi. Sansüi füi fitle zünkyae hwom münlang.

¹⁴ Wünhax-thüikoxle ijaetix hwom khüzün khosünle changüi.

-13-

¹⁵ Ku sa, nang jetüi-hwonlangkya khünak ang jangachang, ku mong huanuma müiüi.

¹⁶ Nange hwonkax-jekax zangwünle atatkya zuma ku ang mongngamkya tüiüi.

-14-

¹⁷ Ochax khünakbu to osingkya taxtüi; Jowanpa chathua zale tüi angkya tix nang hünlit ang laxkox.

¹⁸ Ile jangchang thüiningle nang khüzün zangngai ma tüile.

-15-

¹⁹ Apalax, ku sa, jetüi-hwonlangle tüilax ilaxle nang khüzün bama mongzule ajangkya tüilax.

²⁰ Angangle juling-saxsaxle changkyabu füi tomsax-tommokle taxchang.

²¹ Angangle juling-saxsax ngokya khünakbu a tuimix-nuakmix chifün to thaidao angkya changle. Nange mokkya mwot pangwüi ang sax angkya tamchu jip angkya tata jangchang, alüile chingo homtoxle nange nyikhwon awun angkya ataküi.

-16-

²² Hünpa kax to apalax; chix chitüi thüikoxle nang ozün ma ngose chichang. Chemtue hünnu azule changüihex, she hato she füi nang mongzom müikya ahokox.

²³ Otsingtsing, je-hwon, awan-atsingkya, ilaxle müikya:ibu hanpakma otha koxkoxchu asupu, ikoxle ija nang zongto hangle chiawüt angkya thanu-juapa changle.

²⁴ Otsao khünak honu-hopa hwom ang mongmüi angkya olom tüipu. Jetüi-hwonlangle tüikya masa tuita bama nang ang mongngam tüi ang tsuak.

²⁵ Nang bama hünnu hia hünpa hwom ang mongngamkya tüi ang laxkox; hünnu ang ija mongmüi laxkox.

-17-

²⁶ Müile mongkoxle apalax, sasün, ilaxle ku tsün a nang hanpakma tuita apyen angkya ang naxchang.

²⁷ Ma tsangtsa hangkya hia chichang-chizangkya shekobu a mix mik amüt angkya tai changpu.

²⁸ Ahuxmixbu lailaile ibue nang lom tanle ngole ilaxle hwome khünakbu huanuma mongong chitüikyabu ang achangle.

^29-30 Angangle juling-saxsaxle changkya mix, opange lüwut-lüwon juling ang azongpuix, ibu ku hama ahohüi, ilaxle mafüi alüile mongma kop üntoxle chingcha-ashukle ngokyabu kue nang hama ahofang. Khünak ibue jento sikngün apüile ilaxle jento kaxthup-ngaotünle ngole. Hwom mikbu a aji dongle khile, tamchu shanle toxfang to chakmok-janlangle.

³¹ Ija zawan khato je pongma tomkhile, huba tsutsule othong to jule ngünkoxchu, nang to ju füi thwontsingkya tüi ang taxtom.

³² Ofüinop nang a oje füikya pue tudaokya ningle bangüi.

³³ Nang miksho ma changchanglangle ngünkya tüiüi, ilaxle nange khangka hingle aju-ajang ang tamchu tsaothale zangwün ang chithole changüi.

³⁴ Nange nang a lyading ma shuile ngokya ningle, ikoxlechu ija lya awingle alox ngokya ningle thütüi.

³⁵ Nange thüiüi: “Ku to fit-müile tamchu hong-hele changdao koxlax, ikoxlechu kue ija texle münatak. Ku büthüikoxle zo ang chithopuix? Kue ju tamling koxtix müi-angkya changle.”