WANWÜNKAX 22 - OTSAO BAIBEL (BSI)

¹ Mün müikya hia huanuma tüinangkya nyi opupu laxüile nang ang zün ang jangtom, mün müikya wüi tazün.

² Ija a tüipa-nangpa hia chitüi-chinangkya nyi tomkux changpu: hokhi pangnyi wüi Jowanpae zingkya changpu.

³ Mik-hing-nakakya khünakbue thama hüile ngokya ngünle ilaxle ija tsiakle toxle, ikoxle khangka chizaikya mix küithole ikhato nguile koxle ilaxle wanzing to tix khaxtok to top angkya laile.

⁴ Jowanpa kax ma laxlax tamchu puinaile tüilax jangchangba nange ahak-aluakya, münchong hia tsünlo-zaknuile ngo angkya pangwüi kopüi.

⁵ Nange ma khüzün to mongkünkya jangtüi, lomjang to chichang-chizangkya khünakbu amankya taibu füi atsaile ngolax.

⁶ Naosom hama hwom chemle ngoüihex ija apuale laxkox, ija hwome tsünjang masule mong ma thomüi.

⁷ Tuimix-nuakmixbu a hakpa-luapabu da changpu. Thashe ma ngun laxlax jangchangba nang a ngun koxkya pa da ang achang ngoüi.

⁸ Nange chisukya kaxfün oli saile jangchang, thama nyemle laiüi, ilaxle nange mix to afangle thomkya zakle paoüi.

⁹ Chingcha-chakzun tüikox ilaxle nang süt chitüi-chinang füi tom-hanle changkox. Ija khoma nang to mohimankya tüiüi.

¹⁰ Tsaichong-kaxbongkya khünak füi atsaile ngolax, ile jangchangba atsi-ala ngo angkya, ohyet-otsi, chichangba münlünkya, ibu chemchu müntüipu.

¹¹ Nange küntsao-mongtsaokya to hia chingcha zangwün to kün-luakya jangtüi, wanghompa a nang zuikhui ang changüi.

¹² Jowanpa mike hwon-hi-je to nyele hungole, ikoxlechu mongong angkya chitüikya zangwünbu a chixe tswonle awütle.

¹³ Zaxkak mix a hom ma ngole homle; homtho to laikoxle mailangpae hwom kople nakchangle hwome thüile.

¹⁴ Chinunchakkai a tuita kam thakya changpu: opang füi Jowanpa mongmakya tüipuix, ibu a ima amanle.

¹⁵ Opo ma naosombue ongat ningle ajangkya chitüile mokle, ikoxlechu sansüi müikya füitix ibu chix füi atsaile pao ang tomle.

¹⁶ Nange tüi-nangkya mix ang hingho-najo koxle jangchang chichangba nang ahak-alua angkya hanpakma chitüi-chinang to afomle shingle jangchang, nang a sisi-mix tuimix-nuakmix ang achangüi.

Hwonkax-jekax tsübün

¹⁷ Apalax, kue nang hama jetüi-hwonlangkya mixe akaxkya apuale koxfang. Hwom hwon-nwot-jaono to müile otua lomlax,

¹⁸ nange ibu mong ma kople jangchang tamchu ibu zangwün tswonle wünkya jangtüi, nang ang mongmüi tüiüi.

¹⁹ Kue nang ang Jowanpa to nang mongong naxtüikoxse texpu; ikhokho ma kue ibu athax nang hama wün ang sütpu.

²⁰ Kue nang hanpakma hwonkax-jekax tsübün zale thomdaoa. Ibu ma tsing-wanle lax angkya hia müikya zünkax-saikax tüile.

²¹ Ibue nang ang otsingtsing chemtomta hex ija apuale faüi. Ifüima chemtue nang ija lomle atak ang tsanle apaoüihex, nange kaxlan otsingtomtata laxlaxle chatüi.

-1-

²² Nange thodaobale tuimix-nuakmix to ajao-adale taxchang; khwa ma wünle fakox angkya khünak owachu chitüile chingchapaküi le ajongkya khünakbu thajao-wünhaile taxchang.

²³ Ija tsetwon-zangwün ma hwom khosele Jowanpa ajongüi ilaxle hwom to aza-anale changkyabu to chixe aza-anale changüi.

-2-

²⁴ Küntsik-mongtsik füi tamchu changnong-pünthomle tüikya khünak füi zuikhui taxzing.

²⁵ Nange hwom jaopobu awanle koplaxle ibu tamchatle lüi ang chithole changüia.

-3-

²⁶ Owawa thashe tsangthom angkya bama tsaosaxle hünlit taxkop.

²⁷ Nange ija tsangthom ang chithole changkya zuma, hwome nang lya ngaxchu chitoxle paoüi.

-4-

²⁸ Hünpu-hünpa hwome toxkya longzi-manghua achik-achexle taxchang.

-5-

²⁹ Owawa mwot müile mokle alaikya mix ku hama ahohüi, kue chix wanghom pomtho ma ajong ang.