WANWÜNKAX 21 - OTSAO BAIBEL (BSI)

¹ Chixe chemle shuasa ti jenle le angkya oshua chwonpai ma züile koxpuix ija lailaile Jowanpae ochwonpai ma wanghombu tutex akumathum ang thole.

² Nange amokmok pangwüi changkyakya wüile nange thütkoxlax, ikoxlechu Jowanpae nang tutex to hule le texle ataklax.

³ Masüi-mix-chilüile chem supuix ija moklax; ijae Jowanpa ang chix hato tö apüile koxkya thak to mong amüile.

⁴ Chichangchizangkya khünakbu a hwom mik-hu-chakzam chimüikya hia mongngame akumathumle thomle, ilaxle ija a ochax changpu.

⁵ Olom ziakople müile zinglax jangchangba nang a huanuma tüinangle changüi; ikoxle nange lebama wüi chakjule jangchang thüiningle nang ang otuechu okhonguile müntüitoxüi.

⁶ Chichangchizangkya lom tokhange nange kopkya tuinabu a lebama wüi samle paoünüi, ikoxlechu mik-amüt angkya wikha to nang masho tanto münsam.

⁷ Chichangchizangkya khünakbu a hwom changnong-pünthomle tüikya ma maxle; hwome chem supuix ija münmokpule angamle.

⁸ Thaile ngokya khünakbu a hwom lomchei to ahamle; ikoxle chemchu chitsingkya mixe chem supuix ija mokle.

⁹ Homkha ma zaman mixcha füi tomle ngokya füi homtok to ngokya wüi sümüi.

¹⁰ Chichangchizangkya khünakbu a ochax hanpakma woknuak maxle; hwom ma owatochu chingchakya müntüi.

¹¹ Chichangchizangkya khünak tuitae chemtue sikngün apongpuix, ojao tutex chitüile ngokya khünak tuitae ngaxchu oli tuita awan ang kople. Chix hama chem anwot-anole koxpuix ija makhange jetüi-hwonlangkya mixe tsing-wankya kople.

¹² Zang, owa otsao hex, chixe chichang-chizangkya homkha to chempang changpuix ija awanle, ilaxle chichang-chizangkya khünak chixe thomle düt ang tomüi.

¹³ Nange chitüi-chinang khünak sopkya to na münthapu le angamle jangchang, süfonghüihule nang sopkyachu münatatüi.

¹⁴ Owawa nang füi küntsik-mongmale jangchang, hingho-chaktwonsa zuile koxkyae chix adangüi.

¹⁵ Chemtue sukya kaxfün koxle tsuak puix, müikya khünakbu mongmüile, ikoxle chichang-chizangkya khünakbu hato mongma angkya apüile.

¹⁶ Müikya tutex füi atsaile paokyabu hanpakma zikmüt-mangkhoe tanle ngole.

¹⁷ Shixshixkhaxle, jutok-saxngale tamchu ahak-aluale ngokya to mongkünkyae nang otuechu tüipa-nangpa ang münachang.

¹⁸ Müikya khünakbu hato apüi ang azongkya thama ma chichang-chizangkya khünakbu alüile ma sikngün ang kople.

¹⁹ Za-amankya hia kaxthup-ngaotünle ngokya mixcha füi tomle ngokya füi faokha to matata ngokya wüi sümüi.

²⁰ Jetüi-hwonlangkya khünakbu a tüinangle tamchu mongtex ma ngo ang kople, ikoxle ongat khünakbue ongun-osyen chemtukux chwonpaile koppuix itukuxle lebama baktsuakle.

²¹ Chingcha-mongkün tamchu sützia-mwotzia ma ngokox jangchangba nang tsünlole ngo ang kopüi; mixe nang to e-sele changüi tamchu müile hu-meüi.

²² Jetüi-hwonlangkya süpahi lompa tuitae mixtsak naomüibu füi ziakople homkya tingnu tingtak laxle tamchu hwome mongong-chachongle tüikya pan daplaxle lax ang tsuak.

²³ Nang thama füi atsaile ngose jangtsu, nange chem akaxpuix ija bama khünzaikya tüilax.

²⁴ Ku hama mongngam füikya mix ahohüi, kue nang hama khünak ang khünak le chinyakkya mix ahofang, ongam hia ojao mixshankya chitüikya mix a.

²⁵ Mwt münmokpule angamkya zaxkak mixe ma alüile lang ngopu;

²⁶ hwome laxsele tsukya bama ajang angkya a hwom mwot changle. Ikoxlechu otsao khünakbue kox ang thole, mongtsutsule koxle.

²⁷ Chichangchizangkya khünakbue chix tö apüile koxpongma Jowanpa ang mong münmüi, tamnüile chu tutex oma füi hwome tö apüile changpongma chix a ija thua anule.

²⁸ Atsekya khünake fakya mikngün-kaxkhi ma ong angkya jao müntüi, ikoxlechu ija bama zule ajangkya mix zangwün a pongle kople.

²⁹ Otsao khünakbu ma hanpakma atsingshole awan ngopu; chichang-chizangkya khünake otukux tsuak puixle atsing angkya wüi.

³⁰ Jowanpa nang füi apüile jangtüidao thüiningle, khünak je-hwon, khüzi anaxkya, mongtex zukya: ibu chem mwot angchu münchang.

³¹ Nange zan to ka ang manbu achwonle chang ang tsuak, ikoxlechu zan to anao ang tom angkya a Jowanpae tix changle.