WANWÜNKAX 20 - OTSAO BAIBEL (BSI)

¹ Alüile juling-saxsaxle changkyae nang olyem ang azing ang tamchu ongat ang achangle. Jutok-saxnga le chang angkya a ongat.

² Tse le ngokya mailangpa thua zakya ningle mongtsik ngokya wanghompa thua zalax; chix mongtsik ang tomkya a tuita pakfün-shalo changpu.

³ Ongat khünak tütapuechu zangwün atsat ang tsuak; ibu füi atsaile ngo angkya a tuita achuak-achen fang changpu.

⁴ Manzai tue thomo-manzaise chitsukya manzai mixe puamün tuk ma züt angkya chemchu müntüiüi.

⁵ Khünak tuita mongjang a tüküi mong tokya ti ningle, ikoxle awan-atsingkya khünak owawae ija khole laxtsuakle.

⁶ Noknusae wüi ma müikya hia sukya mowün amüile zangwünle, ikoxle otsingtomtata ma iningle mix owawa atak ang azonglax!

⁷ Otsingtsing zangwün tamchu sukya mwot mokkya hopa tüikyabu a tüle shomüikya su-sa hwom changpu.

⁸ Wanghompa kaxfün nui ma thungle ilaxle hukya füi tomle chixe chichang-chizangkya awanle laxle.

⁹ Chix ochax füi atsaile tüile tamchu khangka tsaothale tüile otsingtsing akax angkya khünak owawa tüicha?

¹⁰ Tuak hia mama othüt müile chitwonkya khünakbu füi Jowanpa anukya tüile.

¹¹ Naosombue ngaxchu mokkya mwot makhange ma chem hex ija ahole; hwom chisu-sukya hia chimüi-müikya nange akax ang thoüi.

¹² Jowanpae kem ang ngün angkya mik tamchu atat angkya na koxle thompu.

¹³ Nange ma hanpak jipbashui le ahomle jangngo, nang tuimix-nuakmix ang achangüi. Chak-chak chingaile mwot mokngolax jangchangba nang ang sax angkya süt okhonguile tüiüi.

¹⁴ Tha shak mixe othuithuima otha tsakle le thüile, ikoxle chix laile paolaxle chixe thanai ma kopkya bama tsaichong-kaxbongle.

¹⁵ Nang chem zangwünpuix ija nange awanle jangchang, nang ma hun hia khop füi ngaxchu thalix nang ma tüile.

¹⁶ Owawae wünpa tuita thashe thom angkya tsaosaxle hünlix laxle jangchang, chixe ma tuina ija tsangthom ang koxle apao angkya wüi.

¹⁷ Nange chichang-chizangle kop-lokya tuita sütmüi-lingmüi ningle mongzom ma müile saxlaxkoxlax, ikoxlechu nyix-nyixta a ija wikha ma awangkya sak ningle changüi.

¹⁸ Müikya zünkax-saikax koplax jangchangba nange tho-lünkya tüiüi; ziakople chichangkop homtoxle jansuma zan to single taxchang.

¹⁹ Zaman mix tun ma huxsa zangwün tsyenle thom ang müntho. Alüile zangwünkya khünakbu füi atsaile ngolax.

²⁰ Nange manu-mapa to thuakzomle jangchang thüiningle nang tsün a zangnak fangto wünmax paokya ningle ashuküi.

²¹ Nange tuina chemtukux chwonle koppuix, itukux ijae nang zongto chem-mwot münthap.

²² Thaikya tsangthom angkya nang tata akhang ma taxlax. Jowanpa to onglax jangchangba chixe achangle zingüi.

²³ Tuak othüt hia long müile chitwonkya khünakbu thua Jowanpa anukya tüile.

²⁴ Kem le angkya lomtang a Jowanpae tix fün-wün changpu; jangchangba ma tsüne ma ochito zunle ngopuix owae tsingle lax ang tsuaküi?

²⁵ Zang ang tökya koxüihex-ole tsaoüi thoto nange müile ajangle kop angkya oli changpu. Chichangthüiba ofüima nang mongma angkya ataküi.

²⁶ Jetüi-hwonlangkya wanghompa-e thaile mok ngokya khünak atak tsuakle, ilaxle ojao chingcha chitüile chix to sikangünle.

²⁷ Jowanpae kem ang tutex-mongtsang fale thomle; kem ma thoto azwon ang müntho.

²⁸ Chixe sule, mongong-chalom füi tamchu otsao ma apün-adale ngokya kople wanghompa chix tüntong ma ngo ang kopüi.

²⁹ Keme khüse tsak-zong zaopu ilaxle azule khothokya e-sele changpu.

³⁰ Tampong keme ma lomtang alüixle changpongma mongto kak angkyachu apongle laxle.