WANWÜNKAX 19 - OTSAO BAIBEL (BSI)

¹ Tsetselopkya ongat khünak ang ngokya füi chem chitüikoxchu otsingtsing ma ngokya wüi sümüi.

² Je-hwon chitüi homtoxle mongtsukya a münmüi; adu ang chithokya tokhange nange thangnak apong ang tomüi.

³ Züizüi khünake ma ongat mwotbu makhange ma alüile amale ilaxle Jowanpa ma tsaitox-kaxfele changle.

⁴ Hakpa-luapabue jento zuikhui hozünzün kople ngopu, ikoxle mixshix-zasae hidaole tüikya ngaxchu thom ang chitho.

⁵ Khwalo ma nange kaxthai akaxle jangchang, nang to sikangünüi: paole azang angkya olom chitüiüi.

⁶ Khünak mixmüie mongkün-chingchale tüi angkya noknusae lompu; mongkün-chingcha ahole changkya a noknusae ma zuikhui ang laxpu.

⁷ Chitüi-chinangkya khünak tuita a chix haxnu-homsabu mwot chem ngaxchu münthap; chix ang zuikhui chitüikya bama abüt angkya jao müntüi. Chix tüle chu naxazong, chixe tuita ngaxchu machi to kop ang müntho.

⁸ Mama alüile wünlax ilaxle mae tsuakkya tukuxle awanle laxlax; ifüima nange awanle kopdaokya mongto texle ataklax ifüima nang ahak-aluale changüi.

⁹ Khwalo ma kaxthai akaxkya khünak sikngün thoto paole azang ang müntho; chix a maxdaoa.

¹⁰ Ongat khünak a shixshixkhaxle chingo angkya oli, ilaxle da tuitae alixachong to apün-adale chichang angkya oli.

¹¹ Nang mongkho nguile jangtüi, nange nang mongtsik adu ang thoüi. Owawae nang to thaikya mokle jangchang, ija a ahaile dantox angkya akhokya shomüi changpu.

¹² Wanghompa mongtsik a mailang ahungkya lailai, chix chingcha a zangwat ti dütkya lailai.

¹³ Susa ongat hwome manu-mapa hwom hato omüt apüi ang thoüi. Olyem ang za-amankya kakonu tuita a homkha ma watti dongle düt ngokya thatha.

¹⁴ Khünak tuitae manu-mapa angkya hom-hax hia ngunsyen mantswonle chang ang tsuak, ikoxle chix ang künkho-mongkho nguikya kakonu a Jowanpae tix fatsuakle.

¹⁵ Zaxkak-mongdomle ngohom lax; jip ngolax, ikoxle nang woknuak ma ngoüi.

¹⁶ Zang wanlombu otya ma thomlax ikoxtix nang tsünlole ngoüi; nange ibu tha-ajaole jangchang, nang ziüi.

¹⁷ Chemtue nange chitüi-chinangkya khünak ang kox-zunle changpuix, ija a Jowanpa ang koxle thomkya ningle changpu; Jowanpae ija nang ang achatle fa-angkya changpu.

¹⁸ Hwome jali awanle laxtang tüipongma masu-masabu to zünsaile changkox. Nange ile chimok thüiningle, nange hwom alüile max-zile chang angkya lom to fongle ngopu.

¹⁹ Owawa ma küntsik-mongtsik jangtüi thüiningle, chixe ija jannong-alüikya kop ang tomkox. Nange chix thama chak tokya tam azün ang jangtho, nange ija chatle chuwüi mok angkya changle.

²⁰ Nange zünkax-saikax to apale jangchang tamchu tsingle kopsele mongtsukya jangtüi, nyixnyixta nang jetüi-hwonlangkya khünak tuita ang achangpu.

²¹ Khünaknue mok angkya mwotlom pangnuli zingle chu ano koxlax, ikoxle ija tsuakle fa angkya a Jowanpae tix.

²² Osing-nüfux tüi angkya a müikya oli münchang; Kaxthai zangwünkyabu füi zasa ang ngokya wüi sümüi.

²³ Jowanpa kax ma laxle tüilax, jangchangba nang, mongzom ma müile tamchu khosün ma tsünlo-zaknuile ngo ang kopüi.

²⁴ Khünak züizüi a ma wikha ma sax sho ang ngaxchu zaxkakle aole.

²⁵ Mongngam füikya mix to sikngün ang tom angkya wüi, ikoxtix chemchu chitsing-chiwanle olan to ngokyabue oli tuita awanle laxüi. Nang jetüi-hwonlangkya mix jangchang, zünsaile changpongma nange awanle laxüi.

²⁶ Zakmax-thünba hia chingcha chitüikya khünake tixwüi mapa to chichangle hwonüi chichangba manu hom ang jwonle apaoüi.

²⁷ Ku sa, nange awanle laxkya zakkya füi tomle, nange chem tsingle thomdaopuix ija ngaxchu asamüi.

²⁸ Mikngün-kaxkhi fa angkya khünak mong ma mix to akak angkya mongjang tüile jangchang thüiningle ikhama sukya kaxfün chemchu müntüi.

²⁹ Zünkax-saikax ma chilaxkya zünte-e tok ma sansüi kop angkya atsingsho.