WANWÜNKAX 17 - OTSAO BAIBEL (BSI)

¹ Thamae awangle tüikya homkha to püntuxle fongkha saxngokya füi mongsomjale an-zan tuita saxkya wüi amüikya.

² Tsing füikya da tuitae, chix hopupa sasün laxli chitüikya tuita to athaklaxle chix mantswon ahak-ahanle laxüi.

³ Hun hia khopbu a wün füi wanle anopu, ilaxle khünaksa kün-mong a Jowanpae wanpu.

⁴ Ochax khünakbue ochax tutex to nathale, ilaxle atsekyabue tselop-khuatwon zangwün to nathale.

⁵ Nange mixshix-zasabu chanyi-wanjaile jangchang, nange ija hwom zingkya Zang adapu. Owawa shoma to nang ang mongmüikya jangtüi thüiningle nang ang sikangünkya tüiüi.

⁶ Pu-pi hwom a ma su-sa hwom ngünlaxle mongngamle. Ija a manu-mapa hwom ngünlaxle naosom ang mongngamkya ningle changpu.

⁷ Chathuazale tüikya khünakbue otuechu tsaithai-kaxnyaile münchang, ija ningle ongatbu angchu mongong fang zangwün chemchu müntüi.

⁸ Owawae zuizun mwot a tuita chajik-muashem mwot ningle thütle; ija füi pangwüi moktsuaküile hwome thütle.

⁹ Nange ma to khünaknue luakya lomkya jangchang, ma zongto thaile changpongma hwom ang thailakkya tüikox. Thaikya oli mong ma koplax ngokyae zuikhui füi fang angkya alai tsuakle.

¹⁰ Jetüi-hwonlangkya mixe tamsakya ma wüi, angapae chix to hota ma fitle zünkox ngaxchu awanle kop ang chithokya awanle laxle.

¹¹ Chichangchizangkya khünakbu hato zikmüt-mangkho a, jento tuwuk adünle ngokya kaxho fakya khünak tuita ningle nguiüi.

¹² Chemchu chichangkya mwot to thangle ngokya züizüi ongatbu apongkya füi hosabu asam laxle chepnu pa tuita apongkya wüi sümüi.

¹³ Nange müikya to oma füi olüix khomle jangchang, nang homkha angkya ochax otuechu atsaile ngo ang müntho.

¹⁴ Tsetwon-khualop zangwün owang wangkya a tuita tsyen dap angkya tilom züile tilyet owang wangkya ningle changpu; alüile zia mama-maba wüi ija azaklax.

¹⁵ Sukya mix chisukya ang ahai chichangba chichang-chizangkya khünak azangle pao ang tom: ile changkya pangnyi thua wüi Jowanpa anule.

¹⁶ Lainwot-ngaknwot hanpakma ongat khünak tuita hanpakma ngun-syen bakkya ma olüi chemchu müntüi, chemthüikoxle chix ma laxli tutex chemchu müntüi.

¹⁷ Zuikhuie othuithuima tata hato mongkün ahokya wanlom. Sikngün-tuitai tom-hanle chichangangba haxnu-homsa ang ngokya ma chemtüi?

¹⁸ Owawa tutex ma mongkho chinguikya khünake tix wüi owawa thashe bama hünlit lax angkya tsaosaxle changüi.

¹⁹ Ochax laxse lomkya a tingtui adünsele mongtsukya changpu. Nange jento kahak-wüntakle chichang thüiningle, nange tingtui ahyen ngopu.

²⁰ Owae ochax bama ajang ilaxlechu ochax zangwünle changpuix, chixe müikya ataküile ong angkya onui müntüi: omama wüi ataküi.

²¹ Opang su-sa hwome ongat mwotbu mokle changpuix, ibu honu-hopa hwom ang sikngün-mongthang boma chemchu mütüi.

²² Mongmüile ngokyae nang tsangtsa fanmüile thomüi. Othuithuima mongsik-ngünlanle ngokya a zaze-zazele zi ang tomkya changpu.

²³ Chichangchizangkya kaxfünpabue huxsa zuizunbu laxle, ikoxle sukya kaxfün a chifa.

²⁴ Jetüi-hwonlangkya khünake je füi mok angkya to hule, ikoxle ongat khünak tuitae malom-malom tokhange owang wangle.

²⁵ Ongat-ongüi naosome mapa hwom hato mongma apüile ilaxle manu hwom hato künmax-mongshan angkya apüile.

²⁶ Chemchu chitikle changkya khünak ang tsangthom ang tom angkya a olom münchang; müikya khünakbu to sikangünle changpongma sukya kaxfün a cheichak le amale.

²⁷ Atsingshole awanle ngokya khünak tuitae othuithuima zang münwün. Dangjajale ngokya khünakbue füichi-thochi tikle ngopu.

²⁸ Tun aluile chiakhao homle dangjajale jangngo thüiningle ongatbu to ngaxchu jetüi-hwonlangkya khünak le hu ang tsuak.