WANWÜNKAX 16 - OTSAO BAIBEL (BSI)

¹ Keme ma mwotthobu zing ang tsuak, ikoxlechu tsaishuk-kaxshuk a Zang ma tix tüipu.

² Nange mokkya pangwüi sule tüile le nang thütle ngokoxlax, ikoxlechu nang tutex kaxfün fakya a Jowanpa tix changpu.

³ Nang mwotthobu to Jowanpa ang mohimanhüi thüilax, jangchang thüiningle nange ibu mwottho oza alaile mokle le ang thoüi.

⁴ Jowanpae zingkya pangnu li ma oshuk-oza tüipu; ikoxle chichang-chizangkya khünakbu oshuk a oli thukya thama changpu.

⁵ Künngam-mongngam füikya khünak pangwüi thua Jowanpa anule; chixe hwom apong angkya ma sikngünbu tsiakle le ang müntom.

⁶ Kax ma laxle tamchu mongong-chalomle tüile, jangchangba Zang-e nang ochax thailak tüiüi. Jowanpa kax ma laxle tüilax, chichang-chizangkya nang füi chemchu münapong.

⁷ Chemtue nang Jowanpa mong amüile changüihex, nange nang zanpabu ma zuikhui ang achang ang thoüi.

⁸ Tsaithai-kaxnyai laxle kopkya tüpong-tüpong tüikya füi, otsingtsing moklaxle kopkya ikuxküsa wüi sümüi.

⁹ Nange mwotthobu zing ang tsuak, ikoxlechu nang mwotlom Zang-e tix zunpu.

¹⁰ Wanghompa-e Zang tsak-zong füi zangwünle; chix kaxfünbu a othuithuima sule.

¹¹ Tuak ma thütkya hia olwot-ojang thütkya tamchu tha-jua hangkya otyatya ma mok angkya Jowanpa mongtex changpu.

¹² Wanghombue ochax füi adu ang müntho, chemthüikoxle tingjit-nok-awa angkya janzüi a sukya mwot mokkya matix tüipu.

¹³ Wanghompa-e kaxtsing zangwünkya apase tsupu ilaxle kaxtsing zangwünkyabu chima chix khosekya tüiüi.

¹⁴ Jetüi-hwonlangkya khünake wanghompa ang mong amüi thom ang azongüi; wanghompa ang mongtsikle jangchang, owawa mik max angkya ataküi.

¹⁵ Wanghompa mongzom ma müikya a tso-hi-wa zit ma zangwat ang koxkya zangfwombu ningle changpu-khüzün a ikhama tüile.

¹⁶ Hun hia khop tüikya füi je-hwon hia tsing-wankya tüikya wüi amüikya: onüi müikya changpu.

¹⁷ Müikya khünakbu a ochax tsiakle toxkya lomtang ma ahamle; idaile nang ochito lepuix ija to müile hukoplax: ija ma nang azang ang tsuak.

¹⁸ Mongngame olithule max angkya lom to zunüi, ilaxle mix to asongle hukyae ma adüt angkya lom to zunüi.

¹⁹ Ngamkya mix ang achang üntoxle pa-lole kopkya tuina tom-hankya ma womkya füi puinai üntoxle zasa ang ngokya wüi sümüi.

²⁰ Nang hama chem anwot-anole fapuix ija to mongkoxlax, jangchangba nange tho-lünle changüi; Jowanpa to mongongkya tüilax, jangchangba nang mongmüile ngoüi.

²¹ Jetüi-hwonlangkya hia tsün ziadaokya a chix ma tsing-wankya tüikya ma awanle laxpu. Chixe chemtukux zangmüi wünpuix, itukuxle chix füito azuise tsupu.

²² Jetüi-hwonlangkyabu hanpakma je-hwon a khüzün tümik changpu, ikoxle ongatbu ang anwot-anole chang ang azongkya a tuita hanpak ashixkya zaza.

²³ Jetüi-hwonlangkya khünakbue akaxüi thoto ajangle kople; hwome chem akaxpuix ija a sisile to-zile changse tsutsu.

²⁴ Chingcha zangwünbu a nax-ti ningle—le ma tijongle tamchu tsangtsa hanpakma amüikya.

²⁵ Nange sukya lomtang changpule ajangkya lome zikmüt-mangkho lom to alyet angchu tsuak.

²⁶ Mwt mok mix azamkyae chix ang azongle mwot mok ang tomle, chemthüikoxle chixe ma wokfwot amüi angkya chang koxle.

²⁷ Ochax khünakbue mix thomzün angkya olombu to hule; hwom zangwünbu ngaxchu ochax to thutle wün achuale.

²⁸ Khualop-zangwün a chichang-chizangkya khünakbue apukpu; ibue tingtui adün ilaxle üitho amütle.

²⁹ Changnong-pünthomle tüikya khünakbue ma üitho dyenle ilaxle hwom hato thama apüile.

³⁰ Watyax-zonghakya khünak chingünle taxtüi; hwom ma tutex oma lita tüile.

³¹ Tsünlo-khothole ngokya a otsao hingho changpu; azu-khothokya a fuazangkya khohom changpu.

³² Tsak-zong füi tüikya füi adukya tüikya wüi amüikya changle. Tingnu-noknu thakma apün-awang ang tsuakkya füi ma alüile akumathum ang thokya wüi amüikya changpu.

³³ Zang mongtex awan ang khünaknue nantakle, ikoxlechu ija to lan angkya a Zang mongtex changpu.