WANGSHEMBU MWOT 3 - OTSAO BAIBEL (BSI)

Chafai-mix tuita Amüikya

¹ Nyixta tsomfüi zangjop tue Pitar hia Juhan nyi Zangshwom-Hom to ngui.

² Ikhama “Osün müikya zünkai”, le nyakkya zünkai ma, puxpong tokhange wüi ile puxkya chafai tuita tüikya. Zangshwom-Hom to nguikyabu ma ngun ju ang nyixfole chix a ikhama apüile tox.

³ Otue chixe Pitar hia Juhan nyi nguiüi ngünle lax, chixe hokhi ma ngun ju.

⁴ Okhie chix to tangthole hu ilaxle Pitar-e thüi: “Kukhi to hulax!”

⁵ Ikoxle hokhi angkya ngun tükopüi jao le onglaxle chixe hokhi chito hu.

⁶ Pitar-e chix ang thüi: “Ku ma ngun ojao müntüi, ikoxlechu ku ma chem tüipuix ija kue nang ang fapu: Nazareth nok Jisu mün ma kue nang ajong üntoxle aham ang tompu!”

⁷ Ifüima chixe tsaxchi chak ma chix syetle ajong. Ima wüi thuile ija mixsün chikux mongle chafaikya müi;

⁸ chix fütle ajong, ilaxle noxpakle aham ang süt. Üntoxle ahamle fütngale Zang achuakle chix Pitar hia Juhan nyi füi tomle Zangshwom-Hom to dong.

⁹ Zangshwom-Hom ma tüile asukya khünak noke wüi ija khünake: Zang a ohünotün wüi changpu le achuakle ahamkya ngün;

¹⁰ Ikoxle otue hwome ija mixsün a “Osün müikya zünkai” ma jusax mix ang ngokya chafai mix changpu le awanle lax; chix ile changkya ngünlaxle hwom pangnu wüi abüt ilaxle khosamle tangle hu.

Zangshwom-Hom ma Pitar Kaxho

¹¹ Ija mixsüne Pitar hia Juhan nyi to künle ngoponge “Solomon Nya-o”, le nyakkya khama, hwom hato khünaknu khosam abakle asox.

¹² Ibu khünaknu ngünkya zuma Pitar-e hwom ang thüi: “Israel khünaknu, ija mixsün faile ngokya amüikya ngünlaxle abütpia üntoxle kwom to ile akhingle büthüikoxle hupu? Ija mixsün aham ang koxkya a kwom tsakzong chichangba kwom tsaokya makhange changpu le hünzome texpia?

¹³ Abraham, Isak hia Jakop hwom Zang, kem putong hwom Zange chix Hosa Jisu fuazang ang koxdaoa. Hünzome chix pünpa-chongwangbu chak to kox, üntoxle Pitar-e dan angkya kax tsuak füima ngaxchu hünzome chix thüntho ma wüi Jisu tha ajao.

¹⁴ Chix a otsao tamchu sukya mix changkya, ikoxlechu hünzome chix chilax, itülüi hünzome Pilat ma mix mik amüt daokya mix wüi danhüile ju.

¹⁵ Athaxpi hünzome khünak khüzün lom to zunkya mix langle awüt. Ikoxlechu Zange chix zidaokya chatle azün, ilaxle kwome ija ma mikshoe jao ngünle.

¹⁶ Ija mixsün ang aham angkya zong a chix mün ma koxkya changle. Hünzome chem ngün üntoxle chem awanlaxpuix, ija a chix mün to ongkya makhange tsuakkya changle; hünzom pangnu thüntho ma chix ile amüi ang tomkya Jisu to mongongkya makhange changle.

¹⁷ “Üntoxle athax a, tüinaohom, hünzome tamchu hünzom lompabue Jisu to chempangle hwondao laxpuix, hünzome chitsingkya tokhange changdaoa le kue awanle.

¹⁸ Kaipong ma wüi ajebu tokhange Messaiah-e sikngün apong angkya hexle Zange aje ang koxle thomdaoa; üntoxle chixe ile otsingtsing ma changle hüi ang kox.

¹⁹ Idaile ochax tokya mong chatlax, ilaxle Zang hato hüilax, ikoxletix chixe hünzom ochaxbu fwotle awüt faüi.

²⁰ Ikoxle tix Jowanpa-e hünzom chasa ma azün angkya hanpak ahüiüi üntoxlechu ikoxtix chixe hünzom hanpakma Messaiah ang achangkya Jisu chix wüi hünzom hato ngui ang koxüi.

²¹ Zange chix otsao ajebu makhange kaiwüi aje ang koxle thomdaokya ningle, Zange pangnu li wüi hozün ang achangle mazing tanto chix a zangkangting towüi nui angkya changle.

²² Chemthüikoxle Mosa-e thüile, ‘Chixe ku ahüikya ningle, hünzom a khünaknu kha angkya, Zang hünzom Jowanpa-e hünzom hato ajepa tuita ahüi angkya changle. Chixe apuakya pangnu kax ma hünzome lax angkya changle.

²³ Owawae ija ajepa kax ma chilax jangthüiba, chix a Zang khünaknu füi ajanüi ilaxle azik-amütüi.’

²⁴ Ajepabu, Samuel üntoxle chix füima hüikyabu pangnu, hwom opang ma Zang tokhange hüikya kaxho tüilaxpuix, hwome anyixkya chaxwan zanghan hia tunu wansa bamachu wüi akaxle.

²⁵ Ibu chix ajebu makhange Zange tsaokya kax hünzom hanpak changle, üntoxle hünzom putong Abraham füi: ‘Nang sixli makhange chaxwannu angkya khünaknüsa nok towüi mohimanüi’, lükya Zang Tsaotsüt bama Abraham sixli a hünzom changpu.

²⁶ Idaile hünzom pangnu wüi chisu chitangkya lom ma ngokya chat ang kox ilaxle mohiman angkya hanpakma, Zange Jisu zünle kop ilaxle pongwang ma hünzom hato ahüi.”