WANGSHEMBU MWOT 23 - OTSAO BAIBEL (BSI)

¹ Pol-e nguawangbu to tangthole hu ilaxle akax: “Kutüi kunaohom! Anyix kople Zang pomtho ma ku tsün bama ku khangka tsaotha le otya ma wüi tüitan.”

² Nguakho Anania-e ozuima ngokyabu ang Pol to tun ma fit ang tom.

³ Pol-e chix ang thüi: “Tütakoxchu Zange nang to chak chimokle müntüiüi, nang a otok to thun füi pale atsyet thomkya katuk changle! Nang ikhama wanlom ma ku bama kaxfün fa ang ngo ilaxle ku to fitkox le tomle nange wüi wanlom chito!”

⁴ Pol hama namle ngokya khünakbue chix ang thüi: “Nange Zang nguapa adale!”

⁵ Pol-e lan: “Tüinaohom, kue chix nguapa akhokya changpu le chiawankya changa. Otsao Lai ma tüile: ‘Nange ma thak ma apün-adakya mix ang kaxma taxthüi.’”

⁶ Otue Pol-e othom khama züizüi a sadukibu changa üntoxle mamabu a farisibu changa le ngünpuix, chixe nguawangbu füi azaxle akax: “Kutüi kunaohom! Ku anu apa hwomchu wüi farisi changkya daile ku chuwüi farisi changle. Kue zidaokya chatle azangle zoüi le ongkya khoma ikhama ku tsetwon angkya laipu!”

⁷ Chixe ija kax akaxkya füi shemle farisi hia sadukibu hyet ma süt, ilaxle hwom othom ahan.

⁸ (Sadukibue khünak zidaokya chatle azangle münzoüi, ilaxle kaxtaimixbu hia chasabu müntüile thüi; ikoxle farisibue ibu azom pangto wüi ong).

⁹ Hwom süzong süzongle akhong, ilaxle wanlom awankyabu khama züizüi farisi othomkha angkyabu ajong ilaxle kaxza zongle akax: “Kwome ija mixsün ma thaikya kha ojao münatak! Owatsing, chasa chichangba kaxtaimixe chix füi akaxdao koxtüi!”

¹⁰ Hwom khama kax ma alankya hyet ma shu, ikhoma hwome Pol ashik akhix lewüi awütüi le süpahi lompa zale ngo. Idaile chix julaxle othom kha angkya Pol zanhu nui to dün angkya süpahibu ang kaxkox.

¹¹ Ofüi ja Pol zuima Jowanpa ajong üntoxle akax: “Taxza! Nange ija Jerusalem ma ku bama kaxkhi fadaoa, ilaxle nange Rom tingnu machu fa angkya changle.”

Pol Lang ang Tungkya

¹² Ofüinop züizüi Jehudi khünakbu asox üntoxle Pol lang angkya azua. Ibue Pol malang tanto chemchu münsax münlingpule tsaosax.

¹³ Ija onotomle tungkya khama mixhuak punyi tüikya.

¹⁴ Ifüima hwome nguakhobu hia tüichong mixmüibu hato pao üntoxle thüi: “Kwome nok notom laxle, Pol malang tanto chemchu münsax münlingpule tsaosax daoa.

¹⁵ Athax a hünzome tamchu nguawangbue Roman süpahi lompa hato chix bama anaolechu tsaitong kaxza sümüile awanle laxse tsupu, le atsing laxle, Pol hünzom hato ajohüi le kax koxkox. Ilaxle chixe ikha kopüi thoto wüi chix lang ang kwom atha anyemle ngoüi.”

¹⁶ Ikoxle Pol hona hosae ile tungkya atatle lax, idaile zanhu nui to donglaxle chixe ija Pol hama wün.

¹⁷ Ifüima Pol-e alixachong tuita selaxle thüi: “Ija naosün süpahi lompa hato paokox; chix ang chix füi wün angkya zangwün oli tuita tüile.”

¹⁸ Ija alixachonge chix paole süpahi lompa hato apüi ilaxle thüi: “Kople thomkya Pol-e ku selaxle ija naosün nang hato paokox le thüipue apüipu. Chix ma nang füi chemchem akax angkya oli tüileta.”

¹⁹ Süpahi-Lompa-e chix chak ma syetle lax, nukzong to pao ilaxle atüi: “Nange ku hama wünse lükya kax chem tüikya?”

²⁰ Chixe lan: “Pol bama tsaitong kaxza sümüile awanle laxsele atsing laxle, Jehudi nok pünpa-chongwangbue ngainyix nang ma Nguawangbu hato Pol johüi le ju angkya azuadaoa.

²¹ Ikoxlechu hwom kax ma lax angkya münchang, chemthüikoxle mixhuak sün punyi onüi khünake chix hanpakma ziakople tanle nuiüi. Ibue chix malang tanto chemchu münsax münlingpule tsaosaxdaoa. Athax hwome ile mok ang achwon ngole, ikoxle nange chemle lanüihex lanlan le hungole.”

²² Chix hama wünkya kax owa hamachu taxakax-ole zünlaxle süpahi lompae ija naosün pao ang kox.

Pol a Gowarnor Felik hato Pao

²³ Ifüima süpahi lompae chix fang angkya alixachong nyi selaxle thüi: “Kaisaria to ka ang süpahi ho-anyi achwonlax, ifüi tomle mankho ma ngakya süpahi puzom bün üntoxle pax füikya süpahi ho-anyi koplax, üntoxle ajaja wüi aku baji ma achex ang achwonlax.

²⁴ Pol nga angkya man laxkox, ilaxle chix Felik hato haxmüi zangmale apüikox.”

²⁵ Ifüima süpahi lompae laiza ile zale kox:

²⁶ “Klaodia Laisas tokhange achuak achenkya Gowarnor Felik hato: Salam.

²⁷ Ija mixsün a Jehudi khünakbue kop laxle balang langsa. Kue chix Roman nokpu tuita changpu le awan ang kople, idaile ku süpahibu ziklaxle sünle kopwüi.

²⁸ Hwome chix ma chem bama kaxhux fepuix ija awanse tsulaxle kue chix hwom nguawangbu hato jopu.

²⁹ Ikoxle tomtatale chix langtang üntoxle kun ma shotang chix ma thaikya kue münatak tsuak; chix ma kaxhux fekya bama hwom wanlom bama atüi-atua ano koxtix müikya lima tüile.

³⁰ Jehudi khünak züitabue chix lang ang tungle ngole le atatlaxle kue chix nang hato akat koxwüi müiüi changa le texle atakkya changa. Chix ma kaxhux fekyabu füi, chix to nang pomtho ma angaile salaxle kue akaxdaoa.”

³¹ Süpahibue ija kaxtom apa. Ija jaja wüi hwome Pol Antipatris alople laxlax tox.

³² Ofüi nyix chama ahamkya süpahibu zanhu nui to chat üntoxle mankho ma ngakya süpahibu chix füi tomle pao ang dantox.

³³ Hwome chix Kaisaria to apüi, Gowarnor chak to laiza kox ilaxle Pol chuwüi chix ang koxle tox.

³⁴ Gowarnor-e laiza ilaxle Pol ma chix opupu nok tokya hex le atüi. Otue chixe Pol a Silisia tokya changpu le awan ang kop,

³⁵ chixe thüi: “Nang ma kaxhux fekyabu ngui lütix kue nang kax apaüi.” Ifüima chixe Pol Herod hom to nyele thom angkya kaxkox.