WANGSHEMBU MWOT 20 - OTSAO BAIBEL (BSI)

Mesidonia hia Akaia to

¹ Wuk dang füima Pol-e mongong mixbu nyakle asox, ilaxle hwom zong adünle zangwünkya füi hwom ang wünzua salam kox. Ifüima chix Mesidonia to pao.

² Chix ibu haxtok to aham ilaxle khünaknu ang zong adünle kaxhobu apua. Ifüima chix Grik nok to ngui.

³ Ikhato chix lyetkua azom nui. Chix Siria to le ang achwonle ngokya, iponge Jehudi khünakbue chix lang ang azya ngokya awanle lax; idaile Mesidonia akaile chatkya wüi müiüile chixe thüt.

⁴ Beria tokya Pirha sasün Sopata chix füito azui; ilaxle Thesalonika tokya Aristarkas hia Sekunda nyi; Darbe tokya Gaia tamchu Timothi; anaolechu Asia haxtok tokya Taikhika hia Trofima nyi le chix füito azui.

⁵ Hwom achale le üntoxle Troas ma kwom tanle nui.

⁶ An lum pangpua füima kwom Filipi angkya khua ma pao, üntoxle nyix aga füima Troas ma hwom apong, ikhato kwom hatdang tuita nui.

Pol-e Troas oshuk ang Waikya

⁷ Hat azok ma kwom tomle fongsax ang asox. Chix ofüi nyix wüi pao angkya daile Pol-e khünaknu hama ozulole tsüdang kople apua-anole ngo.

⁸ Kwom asoxkya nui homdingkho to lyem wüntik obibi hex atsople tüikya.

⁹ Eutika le amünkya mixsün thangmik ma thungle ngokya; ile Pol-e zangwün ozu alwotkya füito, Eutika to mikngüt thule hüi, oshukma chix mikngüt khaxle jipkya zuma homthün azom kho tokya thuile dütle haxkop. Hwome chix tswonkya thoma chix a ziün le bang.

¹⁰ Ikoxle Pol-e julaxle zikle hüile chix to thuile kün. Chixe: “Taxaban, chix ozün ma wüi tüile”, le thüi.

¹¹ Ifüima chix homdingkho to donglaxle an ashik, ilaxle mongong mixbu füi tomle sax. Hwom füi zanghan chüdün kople zangwünle ngo laxle Pol achex.

¹² Hwome ija mixsün hom to ozün ma chat ilaxle mongsom kop.

Troas makhange Pol Milita to aham

¹³ Kwom achale achex ilaxle khua ma ngale Asos to ka; Pol a ikhato tix khua ma nga angkya. Chix ikhato haxza-haxzale ahamle ka angkya daile, kwom füi ile changhüio le akax.

¹⁴ Otue Asos ma chixe kwom füi apongpuix, kwome chix khua ma angat le lax üntoxle Mitilen to ka.

¹⁵ Imakhangechu kwom khua ma wüi kale ofüi nyix Kaios alop. Nyixta füima kwom Samos to ngui, üntoxle ofüi nyix wüi kwome Milita alop.

¹⁶ Asia haxtok ma chatle hanpak chiashix angkya kuxma, Pol-e Efisia to khua ma ka angkya mongzangwünle tsuak. Chix a Jerusalem to ngui ang mom, ilaxle jangtsuak thüiba Pentekos nyix ikha alopse thüt.

Efisia angkya Tüinao hwom füi Pol Wünzua Kax

¹⁷ Müimüithom tüichong mixmüibu chix füi apong angkya bama Pol-e Milita tokhange Efisia to kaxho apao.

¹⁸ Hwome ikha alopkya zuma, chixe hwom ang thüi: “Asia haxtok to ku onguiwang nyix makhange hünzom füi ku chemle ngole hüidaopuix hünzome awan ngopu.

¹⁹ Jehudi khünakbue lang ang tungkya tokhange ku hato hüikya zothup akaile thuakjokkya hia mikfi füi Jowanpa da tuita changpu le kue ku mwot mokle hüidaoa.

²⁰ Hünzom hato noktu ma hia kako ma apuk apuale tamchu anwot-ano le hüipongma hünzom to fongse a lükya olom ma kue otuechu hulanle chitoxkya hünzome awan ngopu.

²¹ Hwom pangnu wüi ma ochax tokya Zang hato chatle, Jowanpa Jisu shwom angkya changle le Jehudi khünak hia mixnok pangnu ang wüi kue otsing tomtata ma kaxkhün tomwüi fadaoa.

²² Ikhato ku chemle changüihex münawan, ikoxlechu Otsao Chasa kax ma laxle athax a ku Jerusalem to paoüi.

²³ Kun ma sho angkya hia sikngüne ku tanle ngole le tingnu pangkha towüi ku ang kaxkhün fale hüikya tata kue awanwüi.

²⁴ Jowanpa chingcha bama Kaxho Müikya apuk angkya, Jowanpa Jisu-e ku ang koxkya mwot, ija ku mwottho mokle jangtho laxba, ku zongma ku tsün chemchu münchangle texpu.

²⁵ “Zang Wangting bama apuk-apua ang ku hünzom khato ahamle ngopu. Ikoxle athax a hünzom opupuechu ku sün chatle ngün ang münkopüi le kue awanle.

²⁶ Idaile anyix kue hünzom ang otsing tomtata ma ngaipu; hünzom owawa jangmax jangsamba, ku ma chem tsaitox kaxfe angkya müntüipu.

²⁷ Chemthüikoxle kue Zang tutex pangnu hünzom hama chingai homle chitox.

²⁸ Ma hanpakma alüile ilaxlechu Otsao Chasae nang ang nyelaxo le koxkya pangnusa hanpakma khünkhile nye ngolax. Chix Hosa zi ang koxkya makhange ma ang achangkya Zang müimüithom ma chunnyetmix ang achanglax.

²⁹ Ku cha achex füima, chisumüikya shwonbu hünzom hato hüiüi, ilaxle hwome othom angkya chunbu komle thomjoüi.

³⁰ Hwom füito mongong mixbu chichangkya lom to chüile apao ang hünzom khama züizüie atse le zangwün angkya hanpak tuita hüi angkya changle.

³¹ Mik hingle ngolax, üntoxle zanglao azom bama kue mikfi ajenle, zangnak zangngaile hünzom pangnusa hama apuakya kaxbu pangwüi mong ma thomlax.

³² “Üntoxle athax a kue hünzom Zang tamchu chix chingcha Kaxho chak to koxpu. Chixe hünzom ang chasa ma tsakzong koxüi ilaxle chixe ma khünaknu nok hanpakma thomkya mohiman hünzom ang koxüi.

³³ Kue mixkux, jan, hun, chichangba nyiza tütatochu za münlo tox.

³⁴ Ku hanpakmachu üntoxle ku füikya üithobu hanpakmachu wüi tütalichu kue ija ku chak füitix wüi moklaxle okhongui le lax-twonkya hünzome awan ngopu.

³⁵ ‘Kopkya mix füi koxkya mix mongmüi wüi achongkya’ le Jowanpa Jisu-e akaxkya kax mong ma koplaxle, kue mokkya ningle azongle mwot moklaxle keme chitsuak chiman mix to fong angkya changle le pangnu li-lom ma kue hünzom hama apuadaoa.”

³⁶ Otue Pol-e zangwün ashukpuix, chixe hwom füi tomle chikux athong laxle Zang to jop.

³⁷ Hwome chix füi akünle wünzua tun apongkya zuma hwom pangwüi sop.

³⁸ Hwome chix chatle tam münngünüi le akaxkya chix kax khoma sisile hwom ang mongma. Üntoxle hwom khua ha alople chix füi tomtomle hüi.