WANGSHEMBU MWOT 16 - OTSAO BAIBEL (BSI)

Timothichu Pol hia Sila nyi Füito pao

¹ Ilaxle Pol Darbe hia Lastra to aham. Ikhato Timothi le amünkya Jisu Khrista to mongongkya naosün tuita tüikya; chix honuchu wüi Jehudi cha mongongkya khünak tuita changkya, ikoxle hopa a Grik sün changkya.

² Lastra hia Ikoniam angkya tüinaobu noke wüi Timothi mo müile le wün.

³ Pol-e Timothi a chix füi tomle laxlax toxse tsu, idaile chixe chix ang Khwonzüt-Zom zingle kox. Ija tuitui ma ngokya Jehudi khünak noke wüi Timothi hopa a Grik sün changpu le awankya khoma chixe ile mok angkya lai.

⁴ Hwome tingkhuabu kaile lekya ma wangshembu hia tüichong mixmüibue Jerusalem ma wünle tsuakdaokya wanlombu mongong mixbu hama apukle kox üntoxle ibu to kax ma laxle tüi angkya hwom füi akax.

⁵ Ile müimüithombu mongong ma shingmong ang tom üntoxle nyixfokya to mixhuak tsa ang tom.

Troas ma Pol Mikngünohün

⁶ Otsao Chasae hwom ang Asia haxtok to anwot-ano ang chitom koxle hwom Frigia hia Galatia chaxwan to faole aham.

⁷ Hwom Misia longzi pong to nguikya zuma, hwom Bithinia chaxwan to nop ang azong, ikoxle Jisu Chasae hwom abax.

⁸ Idaile hwom Misia akaile le üntoxle Troas to ngui.

⁹ Pol-e ija ja mikngün ohün ngün. Ijama chixe Mesidonia tokya mixsün tuita ajong laxle: “Mesidonia to nguilaxle kwom to süfonghüi!”, le chix sekya ngün.

¹⁰ Pol-e ija mikngün ohün ngünkya füi shemle kwom Mesidonia to pao ang achwon, chemthüikoxle ikha tokya khünakbu hato kaxho apua ang Zange sekya changpu le kwome lax.

Lidia Khristan ang Achang

¹¹ Khua ma kale Troas angkya kwom tangthole Samothra to ta, ilaxle ofüinyix Nepoli to ngui.

¹² Ija makhange cha ma paole, Mesidonia ma owang lükya Distrik ma tingnu tuita Filipi to ngui; ija a Roman tingzong changkya. Ija tingsho ma kwom obibi nyix hex nui.

¹³ Nazakle nuikya nyix kwom tingkhua pan thaile shua tüikya chito Jehudi khünakbue zangjopkya nui tüiüi le thütlaxle pao. Thunglaxle kwome ikhama asoxkya shekobu füi zangwün.

¹⁴ Kwom kax apakyabu khama Lidia, Thaitira tokya, baxnat nyinu thalexkya mixcha tuita tüikya. Pol zangwün to mongkoxle apa angkya she ang Jowanpa-e mongka daple kox.

¹⁵ She füi tomle hwom homkha pangwüi bapti. Ifüima she-e kwom selaxle thüi: “Kuchu Jowanpa to ongkya mixcha tuita changpu le hünzome janglax thüiba, oman, nguilaxle ku hom ma ngolax.” Ilaxle she-e tütakoxlechu kwom ngui angkya wüi changpu le kwom se.

Pol hia Sila nyi Filipi angkya Kun ma Sho

¹⁶ Nyixta kwom zangjop nui to pao pongma dahaicha ang ngokya shekosa tuita apong. She ma haxshix chasa wanglaxle, athax füichi ma chemle changüihex, ija akax ang tsuakkya zong koxle thom. Ile füichi osho apuale fakyae achakle hopupa hwom ang ngun huanuma alaple kox.

¹⁷ “Ibu a Taitax Zang dabu changpu! Hwome hünzom hama hünzom khosün angkya olom apuale!”, le kaxzex nga le she-e Pol kwom man to.

¹⁸ Obi nyix hex she-e ilele wüi chang. Ikhoma Pol-e ngwomle shulaxle aküile hu üntoxle ija haxshix chasa füi sale akax: “Jisu Khrista mün ma tüikya zong füi kue nang ang kaxtom fapu, nang ija mixcha angkya laiün!” Imawüi ija haxshix chasa she angkya laile pao.

¹⁹ Ija shekosae hwom ang ngun achakle alap koxngokya owüi ashukpu le awankya zuma she hopupa hwome Pol hia Sila nyi koplaxle pünpa-chongwangbu hato noknue ngünle linle apüi.

²⁰ Hwome hokhi Roman alixachongbu hato apüi üntoxle thüi: “Ija nyi a Jehudi khünak changle, ilaxle hokhie kem tingsho ma tingtui adün ngole.

²¹ Okhie kem wanlom füi opüipüi anwot-ano ngole; kwom a Roman khünak idaile kwome ibu pongle kop ang hia iningle mok ang müntsuaküi.”

²² Khünakbuchu wüi afomle hakle hokhi to zothup; Alixachongbue Pol hia Sila nyi nyiza akyet üntoxle hwom ang hokhi to fitmüi angkya kaxkox.

²³ Nammüi le müikya füima hokhi a kun to sho. Okhi to shingmongle khakthom angkya nyetmixbu ang kaxkox.

²⁴ Ija kax koplaxle kun nyetmixe hokhi kun süzukya khato sho üntoxle hokhi chika ma pünkhao wo laxle asaole atsetle among thom.

²⁵ Awünningle tsüdangkhae Pol hia Sila nyie Zang achuakle zangjop ilaxle tsaingao le ngokya, ikoxle kople thomkya mamabue hokhi zing apale ngo.

²⁶ Allele bütix tixnu sile kun homting chifün tokhange sile alox. Allele kahakbu dap, kople thomkya khünakbu chak angkya janbüibu düt.

²⁷ Nyetmix zo, ilaxle kahakbu pangwüi daple ngünkya zuma kople thomkya khünakbu pangwüi paole azangüna le chixe thüt; ikhoma alüile zi ang azong.

²⁸ Ipongkhae Pol-e chix zak iwüi kapu le akhong: “Alüile nang to chak taxmok! Kwom pangwüi ikhato tüile!”

²⁹ Ifüima kun nyetmixe wüne nyanhüi le nyak, hommong to zikle dong, ilaxle Pol hia Sila nyi chitong ma abünle nguak.

³⁰ Chixe hokhi homtho to alailaxle ataüi: “Ku azang ang kue chem moküi?”

³¹ Okhie lan: “Jowanpa Jisu to onglax, jangthüiba nang ilaxle nang homkha pangwüi azangüi.”

³² Ifüima hokhie chix tamchu hwom homkha pangnu hama Jowanpa kax apua.

³³ Ija ja ipongponge wüi hokhi chixe pao, ilaxle makbu sole kox, ilaxle hwom homkha pangwüi bapti.

³⁴ Chixe Pol hia Sila nyi chix hom kople apüi ilaxle hokhi ang sütling kox. Athax a chixe Zang to onglaxle, chix tamchu hwom homkha pangwüi mongmüi atungle ngo.

³⁵ Ofüinop Rom nok pünpa-chongwangbue süpahi akhokyabu füi “Okhi dandao”, le kaxkox ang nyetmix hato pao angkya kaxkox.

³⁶ Ilaxle nyetmixe Pol ang thüi: “Apün-adakyabu ku hato Sila hünkhi dan angkya kax koxle. Athaxpi hünkhi a lai üntoxle ajingle paolax.”

³⁷ Ikoxlechu Pol-e ija süpahi akhokya ang thüi: “Chemchem zia amale kukhi thaikya kha chibang, ikoxlechu hwome noknu thüntho ma kukhi to chakmokpu, üntoxle kukhi a Roman nokpu changpu! Tamtailechu hwome kukhi kun to shopu. Ilaxle athax a hwome kukhi dangjale apaose tsupia? Ile otuechu münchangüi! Rom apün-adakyabue ikhato hwom jao nguilaxle tix kukhi naxdankox.”

³⁸ Süpahi akhokyae ija zangwün Rom nok apün-adakyabu hato apüi, ilaxle otue hwome Pol hia Sila nyi Roman nokpu changpu le atat, hwom tüle aban.

³⁹ Ikhoma hwom ngui ilaxle hwom wüi thaidao ngüna le hokhi füi akax, ilaxle hokhi kun angkya alai üntoxle tingsho angkya shongpaofa le akax.

⁴⁰ Pol hia Sila nyi kun angkya lailaxle Lidia hom to ngui. Ikhama hokhie tüinaobu apong, hwom füi zong adün le akax ngolaxle hokhi achex.