WANGSHEMBU MWOT 14 - OTSAO BAIBEL (BSI)

Ikoniam Khünaknu hato Kaxho Müikya Apuk

¹ Ikoniam machu ile wüi chang. Pol hia Barnaba nyi Jehudi nok sinagok to ngui ilaxle akax ikoxle Jehudi nok hia Grik khünakbu huanuma, chix to ongkyabu ang achangle Jisu hato hüi.

² Jisu to münong lükya thom Jehudi khünakbue Grik nok buto chüile mama üntoxle tomwüi mongong mixbu to chichang-chizangle hwon.

³ Pol hia Barnaba nyi ikhato hatdang obibi hex nui. Okhie owa thuachu chizale Jowanpa Jisu bama zangwün. Jowanpa-e kaxkhi ang khomtsikya hia ohünotün mwotbu mok angkya zong koxlaxle hokhie chix chingcha bama zangwünkya otsingtsing changpu le aho.

⁴ Tingnu angkya khünakbu othom anyi ang ahan: Züizüi Jehudi khünakbu chima se ilaxle mamabu a Pol hia Barnaba nyi chima süt.

⁵ Ifüima mixnok hia Jehudi khünak lompabu füi tomlaxle hokhi to chisumüile zak akople hwon ang hia longfüi thup angkya katzua tsuak.

⁶ Otue hokhie ija awanle lax, Laikonia, Lastra hia Darbe tingnubu to üntoxlechu ozui akhople tüikya chaxwan to hokhi khang khom ang pao.

⁷ Ikhatochu wüi hokhie Kaxho Müikya apuk.

Lastra hia Darbe ma Pol

⁸ Lastra ma chafaikya mixsün tuita tüikya; chix a pux ponge wüi chafai le pux ilaxle aham ang chitho le ngo.

⁹ Ikhama thung üntoxle Pol akaxkya apale ngo. Chixe chix faikya amüi ang thoüile ongkya Pol-e ngün, idaile chixe ija mixsün to tangthole hu,

¹⁰ ilaxle azaxle chix füi akax: “Nang cha ma tangthole ajonglax!” Ija mixsün imawüi fütle ajong üntoxle noxpakle aham.

¹¹ Pol-e ile mokkya ngünlaxle khünaknue manok Laikonia kax ma akhong: “Zangbu khünak ningle achang üntoxle kem hato nguile tüile!”

¹² Hwome Barnaba ang Zeas le nyak üntoxle Pol ang zangwünkya mix changkoxle Harmes le nyak.

¹³ Tingnu pantua to tüikya zang Zeas to shwomkya zangshwom-hom angkya nguapae maihupong hia maipuabu zangshwom-hom zünkai to apüi. Chixe tamchu khünaknuechu wüi Pol hia Barnaba nyi ang tö koxsele tsu.

¹⁴ Hwome ile mok ang achwonle ngokya otue Pol hia Barnaba nyie awanle lax, hokhie nyiza akyet laxle khünaknu thüntho to laile akhong,

¹⁵ “Ibibi khünaknu, hünzome ija chem mok ang ajongpu? Kukhichu wüi hünzom ningle khünak changpu. Kukhi a iningkya lap chitüikya mwot mokle ngokya tokhange ding hia hax ilaxle tinubu zingle alaikya, anaolechu ibu ma tüikya khünak mixsa; müi-nyax; tamchu pün-zua pangwüi zingle alaikya ozün Zang hato chat angkya bama hünzom hato Kaxho Müikya apuk ang nguipu.

¹⁶ Ami pongma chixe khünaknu a mae changpu le atextex chitole ang koxle hüidaoa.

¹⁷ Ibachu chixe hünzom ang ding tokya zangwat kox üntoxle otu nguikya ma tsaxsa hikha puamün ang kox; chixe hünzom ang sütling kox üntoxle hünzom mongmüie awangle ngo ang kox; ile chixe müikya mwot mokkya tokhange othuithuima chixe chix chemningkya hex ija aho.”

¹⁸ Ibibi akax üntoxle ngaxchu hokhi ang tö kox ang achwonle tüikya khünaknu müt-müt le abaxle azak.

¹⁹ Pisidia angkya Antiok hia Ikoniam tokya Jehudi khünakbu züizüi ikhato ngui; ibue khünaknu hwomchi to jikle kop. Hwome Pol to long füi thup üntoxle ziüna le thütlaxle pan akaile chix linle alai.

²⁰ Ikoxle otue mongong mixbu chix zuima akhople afoxpuix, izuma chix zo üntoxle tingkhua to chatle tamchat. Ofüi nyix Barnaba hokhi Darbe to pao.

Pol hia Barnaba nyi Siria angkya Antiok to chat

²¹ Pol hia Barnaba nyie Darbe ma Kaxho Müikya apuk, üntoxle khünakbu Jisu wangshembu ang huanuma achang. Ifüima hokhi Lastra to pao, ifüima Ikoniam to aham ilaxle oshukma Pisidia angkya Antiok to chat.

²² Okhie mongong mixbu mong achen ilaxle hwome ongkya ma shingmongle ngo angkya zongsai. Zang Wangting to nop ang keme sikngün huanuma kai angkya changle le hokhie anwot-ano.

²³ Müimüithom to tiale hwom azui angkya lompabu zünle tox; hokhie ilaxle chisax chilingle zangjop hanpak lax üntoxle hwom Jowanpa chak to fünle kox.

²⁴ Pisidia chaxwan faole aham füima hokhi Pamfilia to ngui.

²⁵ Okhie Perga angkya khünaknu hama Kaxho Müikya apuk-apua ilaxle Atalia to ju,

²⁶ üntoxle hokhie imakhange tholünle hüikya mwottho hanpakma hokhi Zang chak to danle koxkya nui Antiok to chat.

²⁷ Okhie Antiok alopkya zuma khünaknu nyakle asox ilaxle Zange hokhi hanpakma chempangle mokdaopuix ibu pangnu mo wün üntoxlechu chixe mixnokbu angchu wüi chemle ongtsuak angkya olom daple koxpuix, ija apua.

²⁸ Ikhato hokhi mongong mixbu füi lyetkua obi hex nui.