TSAITONG-KAXTONG 9 - OTSAO BAIBEL (BSI)

Khünaknue Kax ma Chilaxle Tüikya

¹ “Israel khünaknu, apalax! Anyix hünzome Jordan shuanu tale lelaxle hünzom füi ngaxchu süchongkya tamchu sütsak-süzongle tüikya jat-libu chaxwan le ngole hüikya haxtok hünzome laxüikhakha. Hwom tingnubu a tüle chongle ilaxle hwom panbu a zangkho to thule long füi tuklaxle tüile.

² Hwom khünaknu jaojao chuwüi tüle tomchong hualokya mixtsak-naomüibu changpu; hwom a Anakimbu changpu, ilaxle hwom füi alünle owachu ajong ang münthole hünzome atatle hüipu.

³ Ikoxle athax hulax, Jowanpa hünzom Zang a wünnu dongkya lailaile hünzom thoto achale leüi. Hünzom hüikya zuma chixe hwom to lütüi, ile chixe tsaosaxkya lailaile ochwonpai ma hünzome hwom jwonle apao ang tamchu amüt ang thoüi.

⁴ “Jowanpa hünzom Zang-e hünzom hanpak ang ibu jwonle apao füima, hünzome ija haxtok kopkoxle asule tüikya khoma chixe hünzom ikhato ngui ang tompule hünzom taxakax. Ile münchang, ikoxle hwom a chichang-chizangle tüikya khoma, Jowanpae hünzom hanpak ang hwom jwonle apao ang thüipu.

⁵ Hünzom a tüle müi tamchu chem supuix ijaja mokle tüikya khoma Jowanpae ija haxtok hünzom ang kop ang tom angkya münchang. Hwom a chichang-chizangle tüikya ochax khünakbu changle tamchu Jowanpae hünzom putong Abraham, Isak hia Jakop hwom füikya chix tsaotsüt otia ma thomse tsukya khoma khünak ibu jwonle apao ang thüipu.

⁶ Jowanpae hünzom ang ija haxzao füikya haxtok a hünzome ija kopkoxle asule tüikya khoma koxle ngokya münchang. Ile otuechu münchang, büthüikoxle hünzom a akax koxle ningle-khokhe chithüikyabu changhupu.

⁷ “Hünzome Jowanpa hünzom Zang, sak-hax to tüipongma chemle mongtsik ang tomdaopuix, ija taxalak. Hünzome Ijip danle toxkya nyix makhange ikha alople nguikya nyix kople, hünzom a chix füi alünle hüipu.

⁸ Sinai Haxnu ma chuwüi hünzome ma mik maxtangle Jowanpa ang mong atsikpu.

⁹ Jowanpae hünzom füi tsaotsütkya Tsaotsüt zalaxle tüikya longkhao lax ang ku haxnukho to dongpu. Ikhato ku chemchu chisax-chilingle nyix 40 wün 40 le nuipu.

¹⁰ Ifüima Jowanpae ku ang longkhao anyi fapu. Ikhama chixe ma chak füi zalaxle, haxhua ma hünzom pangwüi asoxle tüipongma chixe wün makhange zangwünkya kaxbu tüikya.

¹¹ Nyix-punyi wün-punyi ashukle chang füima Jowanpae Tsaotsüt zale tüikya longkhao anyi ku ang kox.

¹² “Ifüima Jowanpae ku ang akax, ‘Haxnukho tokya momle julax, chemthüikoxle nang khünaknu, opang nange Ijip chaxwan tokya apüipuix, ibu khünaknu a chisumüikyabu ang achangdaoa. Kue hwom ang moklax-ole koxkya kaxtom füi hwom atsaidaoa, ilaxle hwome ma hanpakma alüile chapabu zingdaoa.’

¹³ “Jowanpae ku ang thüi: ‘Ibu khünakbu chemtukux ningle-khokhe chitüikya khünakbu hex, kue awandaoa.

¹⁴ Ku abax ang taxazong. Owaechu texle chiatakle kue hwom zangfang angkya olithule amüt angkya mongzangwünle tsuakdaoa. Ifüima kue nang jat tuita hopa ang zingüi, ilaxle ija jat a ibu füi süluile tamchu tsak-zongle tüiüi.’

¹⁵ “Idaile ku achexle haxhua tokya ju. Ku a Tsaotsüt zalaxle tüikya longkhao anyi koplaxle ju ngokya. Ija haxnu tokhange tüle wünchua laile tüikya.

¹⁶ Jowanpa hünzom Zang-e fakya kaxtom kax ma chilaxle, hünzome ma hanpakma jan makhange maihupong lailaile chapa zingle alailaxle ochax lyenle changdaoale kue ngün ang kop.

¹⁷ Ikhoma ikhama wüi hünzom tunthoma kue ija longkhao anyi tswonle awüt ilaxle ibu akhixle pao.

¹⁸ Ifüima anaole chuwüi kue chemchu chisax-chilingle Jowanpa ngwotnui ma ku haxchi to hule akhux. Hünzome ochax lyenkya tokhange Jowanpa ang mongma adünkya khoma kue ile mok angkya lai.

¹⁹ Ku a tüle shixkya Jowanpa mongtsik thua zale ngo, chemthüikoxle chix a hünzom owüiole amüt tangle mongtsikle chang; ikoxlechu Jowanpae ku kax to tamchatle na tha.

²⁰ Jowanpa ang Arun füi chuwüi chix mik max ang tomüile jao mongma, idaile ipongma kue Arun hanpakma chuwüi zangjoppu.

²¹ Hünzome jan füi zingkya maihupong chapa, ochax bwot kue kop ilaxle wünkha to tswonle awüt. Kue ija akhixle awüt, labu ang achang ilaxle ija labu a haxhua tokhange jenle jukya shuasa bang to tswonle awüt.

²² “Hünzome Taberah, Massah, hia Kibroth Hattawah ma tüipongma chuwüi Jowanpa hünzom Zang ang tüle mong ama.

²³ Ilaxle chemtue Kadesh Barnia makhange achex angkya kax koxle, chixe hünzom ang koxle ngokya haxtok koxle lax ang tompuix, hünzome chix füi alün; hünzome chix to chiong chichangba chix kax ma chilax.

²⁴ Kue hünzom awan ang kopkya owangpong tokhange wüi hünzome Jowanpa zongto alünle hüi.

²⁵ “Jowanpa ngwotnui ma ku nyix-punyi wün-punyi süt chisax ti chilingle ngokya a, chixe hünzom a owüiole amütüile mongzangwünle tsuakkya awan ang kopkya khoma changpu.

²⁶ Ilaxle kue zangjop, ‘Jowanpa Khüthak Zang, nang tsak-zong chongkya füi azün laxle Ijip nok tokya danle apüikya nang khünaknu max ang taxtom.

²⁷ Nange nang dapa Abraham, Isak hia Jakop hwom texle ataklax, ilaxle ibu ningle-khokhe chithüikya khünakbu chichang-chizang mwot hia ochax to mongjao koxle taxngo.

²⁸ Ile chichang thüiningle, nange ma khünaknu, hwom ang koxüihex-ole tsaosaxkya haxtok to apüi ang chitho langle le Ijip noke chanyi-wanjaile changüi. Nange ma khünaknu faonu mongto paolaxle, nang ma khünak to miktsak laxle langle awütle le hwome wünüi.

²⁹ Wünhax thüikoxle, nange nang tsak-zong chongkya füi, ma khünak ang lax ang Ijip nok tokya alaile zünle kopkya khünakbu a ibu changle.’