TSAITONG-KAXTONG 8 - OTSAO BAIBEL (BSI)Müikya Haxtok Kop angkya 1 “Anyix kue hünzom ang koxkya wanlombu kax ma laxle tüilax, ikoxle tix hünzom khüzün müile ngoüi, pu-tsale changüi, ilaxle Jowanpae hünzom putong hwom ang koxüihex-ole tsaokya haxtok hünzome kop ang thoüi. 2 Jowanpa hünzom Zang-e hünzom zanglao punyi mong ma sak-hax faonu akaile chemle azuile apüipuix; hünzom mongjang awan ang tamtampong chixe sikngün apong ang tom, imakhange, hünzome chix kax ma laxle chitüi hia tüi ija awanle lax. 3 Chixe hünzom a woknuak ma aham ang tom; ilaxle hünzom pupa hwome chemtuechu saxle mawankya mana süt hünzom ang kox. Khünake ma ozün ma ngo angkya bama süt zaza to onglaxle ngo angkya oli münchang ilaxle Jowanpae chempangle akaxpuix, ibu füitix khüzün müile ngo ang kop angkya changle le tsingang tom angkya hanpakmale Jowanpae ile mok. 4 Ibibile zanglao punyi mong ma hünzom nyi-za büi ang chitom, chichangba hünzom cha-chakbu fingle chang ang chitom. 5 Hopa tuitae masu-masa zünpupule Jowanpae hünzom zünle kopkya hünzome otuechu taxalak. 6 Idaile, Jowanpae hünzom ang kaxtom chemle koxpuix, ile moklax; chix wanlom ningle ngolax ilaxle ibu kax ma laxle tüilax. 7 Jowanpa hünzom Zang-e hünzom a tüle haxzao tüikya haxtok to apüi ngole: Haxtok oja ma shuajenbu tüle tüipuix, ilaxle haxsha hia haxhuabu to tümik fuakle shua jenkya tüihupuix; 8 haxtok tuita oja ma wonglai tsax hia tsaxsa tula tsax, grep ziak, fup ziak, pomegrenet ziak, olip ziak tamchu nax-ti, iningkyabu huanuma alaile tüipuix. 9 Ikhato hünzom otuechu wokno-tilanle münchangüi chichangba tui-nole münchangüi, Ikhatokya longbu ma jan tüile, ilaxle ikha tokya haxhuabu angkya hünzome wi-jan thole lax ang tsuak. 10 Hünzome saxse tsupupu pangwüi ikhato tüiüi, ilaxle chixe hünzom ang koxkya haxzao füikya haxtok bama hünzome Jowanpa hünzom Zang ang münchong faüi. Jowanpa Alakle Chichang angkya bama Kaxkhün 11 “Hünzome Jowanpa hünzom Zang chemtuechu taxalak; ilaxle anyix kue hünzom ang koxkya chix wanlombu kax ma chilaxle otuechu taxtüi. 12 Chemtue hünzome alomlom pangwüi atak tamchu hom-hax müile zinglaxle ngo ang kople changüihex, 13 ilaxle chemtue hünzom ang osu-maihu hia chunbu, hun hia khopbu tamchu hünzom tuinabu huanuma tüile changüihex, 14 hünzom taxngam tamchu hünzom a da ang thomkya Ijip nok chak tokya hünzom khosünle dale apüikya Jowanpa hünzom Zang otuechu taxalak. 15 Tüle za-adünkya sak-hax ojongkha to oje füikya pu hia twonsibu ngopuix, iningkya haxtok akaile chixe hünzom lom azüi. Chixe hünzom hanpakma iningkya haxzan hia ti chitüikya chaxwan to longnu makhange ti angaile fapu. 16 Sak-hax to, hünpu-hünpa hwome ngaxchu saxle ma-anokya mana süt chixe hünzom ang asütpu. Chixe hünzom ang müikya mohiman koxle ashuk angle, hünzom to thwontsingle, hünzom hato sikngünbu chu apüile fapu. 17 Idaile, hünzome chemtuechu ma azong-afa laxle matsak-mazong füi saxpu-luawang ang achangpule chemtuechu taxthüt. 18 Hünzom tüi-nangkya mix ang achangkya a Jowanpa hünzom Zang tokhange changpule hünzome texle ataklax. Chix a anyix mathule hünpu-hünpa hwom füi ma Tsaotsüt tüikya bama mongong chiathole ngokoxle chixe ile mokpu. 19 Hünzome Jowanpa hünzom Zang otuechu taxalak chichangba mama baozangbu hato hwom to shwom-to ang taxpao. Hünzome ile jangmok thüiningle anyix kue hünzom ang kaxfün koxle akaxpu, hünzom a tütakoxlechu max ang tomüi. 20 Hünzome Jowanpa kax ma laxle chitüi thüiningle, hünzom nguikya zuma, hünzome amüt angkya jat-libu ningle chixe hünzom chuwüi max ang tomüi. |
Wancho Naga Bible - OTSAO BAIBEL
Copyright © 2012 by The Bible Society of India
Used by permission. All rights reserved worldwide.
Bible Society of India