TSAITONG-KAXTONG 7 - OTSAO BAIBEL (BSI)

Jowanpa Zang to Chix Khünaknu

¹ “Jowanpae hünzom a, hünzome kop angkya haxtok to apüiüi, ilaxle chixe ikha tokya jat-libu jwonle apaoüi. Chemtue hünzom soxle nguiüihex, chixe hünzom füi süchongkya tamchu tsak-zongle tüikya jat-libu anüt jwonle apaoüi; ibu a: Hit nok, Girga nok, Amor nok, Hip nok ilaxle Jebu nok le changüi.

² Chemtue Jowanpa hünzom Zang-e ibu hünzom chak to koxle changüihex tamchu ongai hünzome hwom to lütle changüihex, ipongma hünzome hwom pangwüi mik amüt angkya changle. Hwom füi tomsax-tommok angkya tsaotsüt taxtüi chichangba chingcha ahole taxchang.

³ Hwom shekobu füi atu-amaile taxchang chichangba hünzom su-sabu owachu ibu füi tuiju-nasomle chang ang taxtom,

⁴ chemthüikoxle ile jangchang thüiningle hwome hünzom su-sabu mama baozangbu to shwom ang jikle pao angkya changle. Ile jangchang thüiningle Jowanpa ang hünzom füi mongmakya tüiüi ilaxle chixe janta bama wüi hünzom max ang tomüi.

⁵ Idaile ibu hwom baozangbu to shwomkya onuibu pünle awütdao, hwome otsao long le longthong küile thomkyabu thuple akhix dao, hwom baozang Asherah omua texle amadao, ilaxle ibu chapabu zokle ashundao.

⁶ Hünzom a Jowanpa, hünzom Zang kux changpu, idaile hünzome ile mokkox. Chaxwannu khünak nüjen kha angkya hünzom a Jowanpae chix khünaknu ang zünle kopkya jat-li changle.

⁷ “Jowanpae hünzom a mix to nüile pu-tsale tüikya khoma zünle kopkya münchang; chaxwannu ma sühixkya jat-li a hünzom changle.

⁸ Ikoxlechu Jowanpae hünzom to mongkünle ilaxle chixe hünzom putong hwom füi tsaosax daokya otya ma thom angkya hanpakmale changle. Ikhoma chixe hünzom a chixtsak chix ong füi khosün laxle Ijip nok wanghompa chak tokya da ang ngokya dale paopu.

⁹ Texle ataklax, Jowanpa hünzom Zang ang tuita wüi ilaxle chix a mongong ma chialekya mix changpu. Chixe chix Tsaotsüt thomle ilaxle chix to mongkünkya tamchu chix kaxtombu kax ma laxle tüikyabu hato chixe chizakle chix mongkün ojat-ojat tsünthom alople ahoüi,

¹⁰ ikoxlechu chix thua anukyabu to sikangün angkya chix ma mongao ojao müntüi.

¹¹ Idaile athaxpi, hünzom hama anwot-anole changdaokya pangwüi kax ma laxle tüilax, ilaxle anyix kue hünzom ang koxkya wanlom pangwüi kax ma laxle tüilax.

Kax ma Laxle Tüikyabu hanpak Mohiman

¹² “Hünzome ibu kaxtom to na thale apalax tamchu mongong tüikya füi ibu kax ma laxle jangchang, Jowanpa hünzom Zang-e, hünzom füikya Tsaotsüt thomüi ilaxle hünzom putong hwom füi tsaosax daokya ningle hünzom ang chixe chizakle mongkün ahokya tüiüi.

¹³ Chixe hünzom to mongkünkya tüiüi ilaxle mohimankya tüiüi; ile hünzom khünak huak tüle pu-tsale changüi iningle su-sa hwom huanuma tüiüi; chixe hünzom haxtok manzai to mohimanüi ilaxle hünzome tüle saxkople, grepti-ju hia olip münga kople changüi; ilaxle hünzom ang osu-maihu hia chunbu tüle koxle mohimankya tüiüi. Chixe ibu mohiman a, hünzom putong hwom füi hünzom ang koxüihex-ole tsaokya haxtok ma koxüi.

¹⁴ Chaxwannu ma hünzom lailaile tüle mohimankya jat-li owa jat-li chu müntüiüi. Hünzom owaechu chichangba hünzom tsom-pom chemchu oling ang achang ang müntom.

¹⁵ Jowanpae hünzom okak-olak pangwüi tokya khosünüi, ilaxle hünzome Ijip haxtok to ngün ang kopdaokya za-adünkya kak-lakbu chemchu hünzom hato hüi ang müntom, ikoxlechu hünzom zongto zanpabu hato chixe ibu hüi ang tomüi.

¹⁶ Jowanpae hünzom ang lüt ang tomkya hünzom zanpabu pangwüi amütkox, hwom to ojao chingcha taxaho. Hwom baozangbu to taxshwom, chemthüikoxle ija a mawüt masan ang changüi.

¹⁷ “Hünzom füi hwom wüi süluile idaile hünzome hwom jwonle apao ang münthoüile ma mongto mongzang wünlaxle monghixkya taxtüi.

¹⁸ Hwom thua taxza; Jowanpa hünzom Zang-e Ijip nok wanghom hia chix khünaknu hanpakma chempangle mokdaopuix ibu texle ataklax.

¹⁹ Hünzome ma mik füi ngünle laxdaokya za-adünkya kak-lak, khomtsikya hia ohünotün mwotbu tamchu tüle chongkya tsak-zong füi Jowanpa hünzom Zang-e hünzom danle apaokya, ibu pangwüi texle ataklax. Chixe chemle Ijip nok amütpuix ilailaile, athax hünzom owa thua zale ngopuix, ibu khünaknu max ang tom angkya changle.

²⁰ Chixe hwom chamax-muasamle abüt ang tomüi ilaxle azangle paokya hia azwonle ngokyabu pangwüi amüt ang tomüi.

²¹ Idaile khünaknu ibu thua taxza. Jowanpa hünzom Zang hünzom füi tüile; chix a tüle chongkya Zang changpu ilaxle chix thua tix za angkya changpu.

²² Hünzom soxle hüikya füi tomle chixe khünak ibu a muapong-muapong jwonle apao shu angkya changpu. Hünzome khünak ibu a tamfang ma amüt ang müntho angkya changle, chemthüikoxle hünzome ile jangmok thüikoxle, faomüibu huanuma tsale hüiüi ilaxle ija a hünzom zongto tuita thama ang changüi.

²³ Jowanpae zan-nokbu to hünzome wüi lüt ang tomüi ilaxle hwom bakle ma-amüt ma-amütle hwom a chamax-muasamle abüt ang koxüi.

²⁴ Chixe hwom wanghombu hünzom tsak-zong chak to koxüi. Hünzome hwom langle awütüi, ilaxle ibu alakle awütdaoüi. Hünzom to owaechu abax ang münthopu; hünzome pangwüi amütüi.

²⁵ Hwom chapabu zokle ashundao. Hwom ma tüikya hun hia khopbu to osingkya taxtüi, ilaxle ibu hünzome makux ang taxlax. Hünzome ile jangmok ija a hünzom zongto tuita thama ang changüi, chemthüikoxle Jowanpae chapa to shwomkya thua anule.

²⁶ Chapa ijabu tüta ningkyachu hünzome ma hom to taxapüi, ile jangchang thüiningle hwom hato hüihaxkux thuakzom bakle hünzom hato hüiüi. Hünzome chapa ibu to wünhaile tamchu anule changlax, chemthüikoxle ibu a Jowanpa othuak-ozom ma tüile.