TSAITONG-KAXTONG 5 - OTSAO BAIBEL (BSI)

Kaxtom Bün

¹ Mosa-e Israel khünaknu komle nyakle asox ilaxle hwom ang thüi: “Israel khünaknu, anyix kue hünzom ang koxle ngokya wanlombu kax ma laxle tüilax. Ibu awan koplax ilaxle ibu kax ma laxle tüi angkya mongzangwünle tsuaklax.

² Sinai haxnu ma Jowanpa kem Zang-e Tsaotsüt tuita zingpu,

³ ija a kem apu-apa hwom tata füile chichang ikoxle anyix ozün ma tüikya kem pangnu füi zingkya angchu changpu.

⁴ Eja Haxnu ma Jowanpae hünzom füi thün-khang asaole zangwünpu.

⁵ Ipongma chixe chem akaxpuix, ija hünzom hama wünle fa angkya hanpakma ku a Jowanpa hia hünzom obama ajongpu, chemthüikoxle hünzom a wün thua zalaxle haxnukho to dong ang chitho. “Jowanpae thüi:

⁶ ‘Hünzom Ijip nok to da ang ngokya dale alaikya Jowanpa ku a hünzom Zang changpu.

⁷ “‘Ku to shwomkya boma baozangbu to taxshwom.

⁸ “‘Hünzom hanpakmale ding-hi-hax ma tüikya; ti ma chichangba haxmong to tüikya tütali omua taxzing.

⁹ Chapa tong to shwomle taxakhux, chemthüikoxle Jowanpa ku a hünzom Zang changpu. Kue ku füi alünkya adu ang müntho. Kue ku thua anukya mix to sutai sulai to lünle sikngün apong ang tomüi.

¹⁰ Ikoxlechu ku to mongkün laxle ku wanlombu kax ma laxle tüikyabu hato tsünthom to lünle kue ku mongkün ahole.

¹¹ “‘Ku mün a ochax lom to taxtwon, chemthüikoxle ku, Jowanpa hünzom Zang-e, othai to ku mün twonle changkya mix pangwüi to sikangünüi

¹² “‘Ku, Jowanpa hünzom Zang-e kaxtom koxkya lailaile sabath nyix atsaole nuilax.

¹³ Hünzom ang ma mwot mok angkya hanpak nyix azok tüipu,

¹⁴ ikoxle anüt lükya nyix a ku hanpakma atsaole thomkya nyix changpu. Ija nyix a owaechu mwot chimoküi: Hünzomechu, hünzom naosomechu, hünzom dabuechu, hünzom müibuechu, hünzom haxtok ma ngole tüikya mixnokbue ngaxchu münmok angkya changpu. Chemle nange nazak laxpuix ija ningle nang dabuechu nazak lax angkya changle.

¹⁵ Hünzom a Ijip nok to da ang ngole tüikya, ikoxle Jowanpa hünzom Zang kue kutsak-kuzong füi hünzom khosünpu, ija taxalak. Ija khoma kue hünzom ang Sabath nyix atsaole nui angkya kaxtom koxpu.

¹⁶ “‘Ku, Jowanpa nang Zang-e nang ang kaxtom koxkya ningle, nang ma manu hia mapa thua zakya tüilax, ikoxtix nang füi pangwüi müile tüiüi tamchu kue hünzom ang koxkya haxtok ma hünzom tsünlo-khothole ngo ang kopüi.

¹⁷ “‘Nange mix mik taxamüt.

¹⁸ “‘Nange chinunchakkaile taxchang.

¹⁹ “‘Nange taxahux.

²⁰ “‘Nange mix ma chichangkya kaxhux taxfe.

²¹ “‘Mix kakonu to mikzalokya taxtüi; chix homkha, chix haxtok, chix dabu, chix maihubu, chichangba chix ma tüikya tütali to chu taxasing.’

²² “Ibibi a hünzom pangwüi haxhua ma athütle tüipongma Jowanpae hünzom pangwüi ang koxkya kaxtombu changle. Chemtue wün hia zangfwom makhange chixe akhongle zangwünpuix ipongma chixe ija kaxtom koxle mama münchang. Ifüima chixe ibu longkhao anyi ma za ilaxle ija ku ang koxpu.

Khünaknu Zakya

²³ “Chemtue haxhua pangwüi wünkha to tüikya hex ilaxle nange zangnak fang tokya kaxzing atatle changpuix, hünzom lompabu hia homjen lompabu ku hato hüipu

²⁴ ilaxle hwome thüipu, ‘Wünkha tokhange chixe akaxkya kaxzing kwome atat pongma Jowanpa kwom Zang-e chix zaxzangkya hia fuazangkya kwom hato ahodaoa! Athaxpi Zang-e chix füi zangwünle changdao koxchu khünak a ozün ma ngo ang thoüile anyix kwome tikle kopdaoa.

²⁵ Ikoxle tamchatle kwome zikmüt mangkho thama omalax ang lomüi? Ija za-adünkya wüne kwom amütüi. Tamchatle kwome Zang kaxzing atatle jangchang thüiningle kwom a zi angkya atsingsho.

²⁶ Khüzün Zang-e wünkha tokhange akaxkya kax atatkya füima ozün ma ngokya khünak tütüichami?

²⁷ Chatkox, Mosa, ilaxle Jowanpa kem Zang-e akaxkya pangwüi atatle kop-hüi. Ilaxle chixe nang füi chempang akaxpuix ibu kwom hama wünle fahüi. Kwome ija to apaüi ilaxle ija kax ma laxle tüiüi.’

²⁸ “Chemtue Jowanpae ija atatle laxpuix, chixe ku ang thüi: ‘Ija khünakbue chempang akaxpuix ibu kue atatle laxdaoa. Hwome changkyakya wüi akaxle.

²⁹ Hwome othuima ile lüwüi ajangle namngo thüikoxba! Hwome jento ku chathua zale tamchu ku kaxtombu kax ma laxle jangtüi thüikoxba, hwom hanpakma tamchu hwom su-sa hwom füi pangnuli othuithuima müile changsedai.

³⁰ Paokox ilaxle hwom thongnui pom to chat angkya akaxkox.

³¹ Ikoxle nang, Mosa, nang a ku füi ngodao, ikoxtix kue hwom ang koxle ngokya haxtok to hwome ibu kax ma laxle tüiüi.’

³² “Israel khünaknu, Jowanpa hünzom Zang-e hünzom ang kaxtom koxpupu pangwüi mok ang-o thüilax. Chix wanlombu kha angkya tuita ahaikya taxtüi.

³³ Ibu pangwüi kax ma laxlax, ikoxtix hünzom füi pangwüi müile hüiüi ilaxle hünzome kop angkya haxtok ma hünzom jento ngo ang kopüi.