TSAITONG-KAXTONG 34 - OTSAO BAIBEL (BSI)

Mosa Zikya

¹ Moab haxtok angkya Nebo haxnu ma tüikya, Jeriko zongma handün chikao angkya Piska haxnukho to Mosa dong; ikhato Jowanpae Kanan haxtok bakle chix hato aho; Gilid haxtok a shuathongchi angkya Dan tingnu alople;

² Neptali haxtok pangwüi; Efraim hia Manasseh haxtokbu; Judah haxtok a hannop chito Mediterenian tinu alople;

³ Judah haxtok shuathong chikao; ilaxle Zoar makhange pam pün awangle tüikya Jeriko tingnu alople tüikya haxsha.

⁴ Ifüima Jowanpae Mosa ang thüi: “Kue Abraham, Isak, hia Jakop hwom ang tamchu hwom su-sa hwom ang kox angkya hex-ole tsaokya haxtok a ija changle. Kue nang ang mike ngün ang koxpu ikoxlechu nang ikhato ngui ang müntom.”

⁵ Ikhoma Jowanpae chix füi akaxle hüidaokya ningle, chix dapa Mosa, Moab nok haxtok to zi.

⁶ Jowanpae chix Moab nok haxsha ma akhün. Ija a Bethpeor tingnu füi atale tüikya, ikoxlechu anyix kople chix akhünkya tamting tomtata owaechu müntik.

⁷ Chix zile pao pongma Mosa a zanglao 120 changkya; chix a masho-manaikya; chix mik tomning ojao majeikya.

⁸ Moab haxsha ma Israel noke chix mang sople nyix 30 nui.

⁹ Nun sasün Jihusua a je-hwone awangle tüikya khünak tuita changkya; ikhoma chix man ma lompa ang achang angkya hanpakma Mosa-e chix zünle tox. Israel khünaknue Jihusua kax ma lax ilaxle Mosa makhange Jowanpae hwom ang koxkya kaxtom pangwüi hwome thom.

¹⁰ Israel nok khama Mosa ningkya ajepa tümatüitox; Jowanpae chix füi thün-khang asaole zangwün.

¹¹ Jowanpae Mosa ang, Ijip nok wanghompa, chix nguakax-wangkhobu tamchu chix haxtok pangnu zongto ohünotün hia khomtsikya mwotbu mok ang tsanle akat; ilailaikya ohünotün mwotbu anyix kople owa ajepaechu mamok.

¹² Mosa-e Israel nok tunthoma mokkya ningle khomtsikya mwotbu mama ajepabu owaechu mok ang chitho.