TSAITONG-KAXTONG 33 - OTSAO BAIBEL (BSI)

Mosa-e Israel Homjenbu to Mohiman

¹ Ibibi a Jowan dapa Mosa-e, chix ziüi thothoma, Israel khünaknu ang kaxzakdünle toxkya mohimanbu changle.

² Jowanpa a Sinai Haxnu makhange hüi; Edom nok khangkho to zanghannu ningle chix dong ilaxle Paran Haxnu makhange chix khünaknu to atale nyan. Chix füi tomle kaxtaimixbu hajat bün jao tüikya, chix tsaxchi chak ma wünchua tuita tüikya.

³ Jowanpae chix khünaknu to mongkün ilaxle chix kux ang ngokyabu kho-awa. Ikhoma kwom chix chitong ma akhux ilaxle chix kaxtombu kax ma lax.

⁴ Kwome Mosa makhange kwom ang koxkya Wanlom kax ma lax, ijatix kwom chaxwan ma akhokya tuiza-nakom.

⁵ Jowanpa a chix khünaknu Israel thakma wanghom ang achang hwom jat-li lompabu asoxle changpongma a.

⁶ Mosa-e Reuben homjen bama akax: “Reuben a tamchu chizile naxngokox, Hwom ang khünak huak hidaole wüi changkoxchu.”

⁷ Judah homjen bama chixe akax: “Jowanpa, khünaknu sopkya zing apahüi; Hwom a mama homjenbu füi notomle chang ang tomkox. Hwom hanpakma azankox, Jowanpa, Ilaxle zan to lüttsuak angkya hwom to asunkox.”

⁸ Liwi hwom hanpakma chixe ile akax: “Nang, Jowanpae, Urim hia Thummim nyi makhange nang mongtex ngaihüi. Nang to mong thomkya da, Liwi hwom makhange; Nange ibu to Massah ma thwontsing Ilaxle ibu a otsingtsing changle le Meribah ti ma aho.

⁹ Hwome sisile nang kax ma laxle tüi Nu-pa, tüi-nao chichangba naosom hwom kax ma laxkya thak to. Hwome nang kaxtombu kax ma lax Ilaxle nang Tsaotsüt füi otya ma ngo.

¹⁰ Hwome nang Wanlom kax ma laxle tüi angkya anole koxüi; Hwome nang tö-tsap ding ma töbu koxüi.

¹¹ Jowanpa, hwom homjen tsak-zongle chang ang tomkox; Hwome mokkya mwot füi mongmüikya tüikox. Hwom zanpabu bakle zutle akhixkox; Ibu tamchatle laoxle ajong ang taxtom.”

¹² Benjamin homjen bama chixe ile akax: “Ija a Jowanpae mongkünkya tamchu khosünle thomkya homjen changle; Nyixfokya to chixe hwom nyele thomle, Ilaxle chix a hwom khama ngoüi.”

¹³ Jusep homjen bama chixe ile akax: “Jowanpae hwom haxtok hia zangwat to mohimanle naxchang Ilaxle haxmong tokya ti alaile naxchang.

¹⁴ Hwom haxtok ma zanghan-cha to jumkya pünziak laimo mohimankya naxtüi, Ziaktutue müikya pünziak laimobue awangle a.

¹⁵ Kaikya hwom haxhuabu a mongtex pünziakbue awangle naxchang.

¹⁶ Hwom haxtok a amüimüie awangle tüi ang tomkox, Jowanpa müikya mohimane, Owae fum-mua tokhange zangwün laxpuix. Ibu mohiman a Jusep homjen hato naxnguikox, Chemthüikoxle hotüi-honao hwom khama chix a lompa changle.

¹⁷ Jusep ma huzanpong tuita janzüi tüile, Fao maihupong ozongbu ningle a. Chix müizongbu a Manasseh hajat tuita tha Ilaxle Efraim hajat bün tha. Ibu füi chixe jat-libu to thule Ilaxle haxtua-zangnam alople hwom thule pik-wütle.”

¹⁸ Zebulun hia Isakar homjen nyi bama chixe akax: “Tinu khato thalex ma Zebulun ahak-aluale naxchang, Ilaxle Isakar tuina hwom ma pu-tsale naxchang.

¹⁹ Hwome hwom haxnu to mixnokbu ahyen Ilaxle ikhato süntswon töbu kox. Hwome hwom tuinabu tinu kha tokya kop Ilaxle chu tinukax angkya fix ma.”

²⁰ Gad homjen bama chixe ile akax: “Hwom longzi achenkya Zang to mohimankox. Gad a mailang tuita ningle tanle ngo Osuak chichangba okhangza ashik-akhix angkya hanpakma.

²¹ Hwome hwom hanpak ang haxtok sümüikya kha kop; Lompa ang achang angkya süntswon hwom ang kox. Hwome Jowanpa kaxtombu hia wanlombu kax ma lax Israel nok lompabu asoxle changpongma.”

²² Dan homjen bama chixe akax: “Dan a mailang sünsa tuita; Chix a Bashan makhange fütle ngai.”

²³ Neptali homjen bama chixe akax: “Neptali a Jowanpa küntsu monglua makhange ahak-aluale; Hwom haxtok shuathongchi a Galili Shinthuk-titung alople tüile.”

²⁴ Ashar homjen bama chixe ile akax: “Mama homjenbu to nüile Ashar a mohiman changle. Hotüi-honao hwome künkak-mongkünle tüikya chixe wüi naxchang, Ilaxle chix chak a olip pünbu füi ahak-aluale naxtüi.

²⁵ Chix tinglongbu a jan zünkaibu füi ziakople naxtüi, Ilaxle jento chix a khangkhosünle naxngo.”

²⁶ Israel khünaknu, hünzom Zang lailaikya mama baozangbu müntüi, zangding kho akaile fixfax-jikjeple, zangfwom ding ma ngalaxle nang jua fong ang nguile.

²⁷ Zang a othuithuima hünzom ziakop mix ang ngole hüi; oshuk chitüikya chix chak a hünzom juafong ang. Hünzom nguikya füi shemle chixe zan-nokbu jwonle apao, ilaxle ibu pangwüi olithule amüt angkya nang füi akax.

²⁸ Ikhoma Jakop sixli hwom mongsom ma ngo, zampa hia grep-tie awangle tüikya haxtok ma, ojong khato ding tokya nyenti füi haxtok ma ti koxpuix.

²⁹ Israel, nang mong chemkuxma müipuix! Nang lailaikya owachu müntüi, Jowanpae sünle thomkya jat-li tuita a. Nang di hia changlo a Jowanpa chixjao changpu, chixe nang khosele ilaxle lütkya koxle. Nang zanpabu nang hato chingcha jule hüiüi, ilaxle nange hwom to cha füi tingle akhünüi.