TSAITONG-KAXTONG 31 - OTSAO BAIBEL (BSI)

Jihusua-e Mosa Lüi

¹ Mosa-e chizakle Israel khünaknu pünzün-wangsaile akax,

² ilaxle thüi: “Athax ku zanglao 120 nguile hüipu, ilaxle athaxpi ku hünzom lompa ang ngo ang müntho. Ibomachu kue Jordan chita angkya Jowanpae akax dao.

³ Hünzom thoto achale Jowanpa hünzom Zang, chix jao paolaxle ikhato ngole tüikya jat-libu amütüi, ikoxle tix hünzome ija haxtok koptsuak angkya chang koxle. Jihusua a hünzom lompa ang changüi, ija a Jowanpa kaxtom changle.

⁴ Chixe Amor nok wanghompa Sihon hia Og nyi to anaolaxle hwom chaxwan amütkya lailaile Jowanpae khünak ibu chuwüi max ang tomüi.

⁵ Jowanpae ibu to hünzome wüi lüt ang tomüi, ilaxle hünzome hwom to, kue hünzom füi chemle akax daopuix, ile wüi hwon angkya changpu.

⁶ Mongtex tüilax tamchu mongchonglax. Hwom thua ojao taxza. Jowanpa, hünzom Zang, chix jaojao hünzom füi tüiüi. Chixe hünzom mün-ale tamchu danle müntox.”

⁷ Ifüima Mosa-e Jihusua se ilaxle Israel khünaknu tunthoma akax “Mong taxmax, mongchonglax; hwom putong hwom füi tsaotsütle changdaokya haxtok alop angkya hanpakma khünaknu ibu azüi angkya lompa a nang changpu.

⁸ Jowanpa chix jaojaoe azuiüi ilaxle chix a nang füi ngoüi. Chixe otuechu hünzom mün-ale tamchu danle müntox, idaile mong taxhi chichangba taxza.”

Wanlom a Zanglao Anüt obaba to E-angkya Changle

⁹ Ikhoma Mosa-e Zang Wanlombu zale kop ilaxle Jowanpa Tsaotsüt akhi-atakle tamchu Israel nok lompabu ang ngokya Liwi hwom homjen nguapabu chak to ija kox.

¹⁰ Chixe hwom ang kaxtom koxle thüi: “Zanglao anüt ashukle hüikya zuma, chemtue thashe amüt angkya otu azutle hüipuix, ija a Pomsa Pangpwon ma azaxle e-kox.

¹¹ Zangshwom angkya nui jongta khama asoxle nguipongma ija a Israel khünaknu ang e-le laxkox.

¹² Pangnusae ija atatlelax angkya ilaxle Jowanpa hünzom Zang achuak-achen ang awan angkya tamchu mongong tüikya füi chix hwon-nwot pangwüi kax ma laxle tüi angkya bama tingnu ma tüikya khünak sheko, lüka hia naosom tamchu mixnok, ibu pangwüi tomle selax.

¹³ Ile hünzom su-sabu chemtuechu Jowanpa hünzom Zang Wanlombu atat ang makopkyabuechu ija atatle lax ang kopüi. Ilaxle Jordan shuanu talaxle hünzome kop angkya haxtok to hwom ozün ma ngokya kople Jowanpa kax ma laxle tüi angkya hwome awanle kopüi.”

Mosa ang Jowanpa e Oshuk Adangle Fakyabu

¹⁴ Ifüima Jowanpae Mosa ang thüi: “Athax nang ozün ma ngo angkya hanpak alüile müntüi. Idaile kue chix ang chix sütlom-mwotlom adangle fa angkya hanpakma Jihusua a Zangshwom Nui Nyihom to sele apüihüi.” Mosa hia Jihusua nyi Nyihom to ngui.

¹⁵ Ikhato Jowanpa a thongnu lailaikya zangfwom ma amua laxle hokhi hato ngaile Nyihom fülom ma ajong.

¹⁶ Jowanpae Mosa ang thüi: “Nang a chwonle wüi zi angkya changle ikoxle nang zi füima khünaknu ang mongong chitüile changüi ilaxle kue hwom füi tsaotsütle zingkya Tsaotsüt amaüi. Hwome kop angkya haxtok to ngui füima hwome songsari baozangbu to shwomüi ma ku hato tok ahoüi.

¹⁷ Chemtue ija changle hüiüihex, ku hwom füi mongtsiküi; kue hwom danle toxüi ilaxle hwom a max ang tomüi. Tüle za-adünkya thamabu hwom hato hüiüi. Ifüimatix ibue ku hwom Zang hwom füi womle chitüikya khoma ibu ile changpule tsingle awan ang kopüi.

¹⁸ Ipongma kue hwom to münfongpule angamüi, chemthüikoxle hwome mixnok baozangbu to shwomlaxle ochax lyenle changdao koxle.

¹⁹ “Athax, ija tsai zale koplax, Ija a Israel nok hama anole laxkox, ikoxtix ija a hwom hanpakma manwan tuita ang ngoüi.

²⁰ Kue hwom putong hwom füi tsaotsüt daokya ningle kue hwom ang ija ahak-aluale tamchu haxzaoe awangle tüikya haxtok to apüiüi. Ikhato hwom ang hwome alomlom sütli tüiüi ilaxle hwom mongtex ma shale ngo ang kopüi. Ikoxle hwom a mixnok baozangbu to sho ang anongle paoüi. Hwome ku awütüi ilaxle ku füikya Tsaotsüt amaüi.

²¹ Ifüima tüle chongkya thamabu hwom hato hüiüi, ikoxlechu ija tsai a ngaole wüi ngoüi, ilaxle ija a hwom zongto tuita manwan ang ngoüi. Athax ngaxchu kue hwom ang koxüihex-ole tsaole thomkya haxtok to mapaoba ngaxchu hwom mongto chemle thütle ngopuix kue awanle ngopu.”

²² Ija nyixnyix wüi Mosa-e ija tsai zale kop ilaxle Israel khünaknu hama anole kox.

²³ Ifüima Nun sasün Jihusua füi Jowanpae zangwünle akax: “Mongchen tüilax üntoxle mongzangwünle tsuaklax. Israel khünaknu, kue hwom ang koxüihex-ole tsaodaokya chaxwan to nange azüi angkya changle. Taxza, kua nang füi tüile ngoüi.”

²⁴ Mosa-e Jowanpa Wanlom laipex tuita ma za. Ija zale changpongma kaxfa tuita alakle chitox angkya hanpakma khile mok.

²⁵ Chemtue chixe ashukle changpuix, chixe Liwi nguapabu opang Jowanpa Tsaotsüt Suak to hume angkya mwot ma tüikya hex ibu füi akax,

²⁶ “Ija Zang Wanlom laipex koplax ilaxle ija a hünzom Zang Jowanpa Tsaotsüt Suak zui ma dankox, ikoxle ija a chix khünaknu zongto tuita mikngün kaxkhi ang ngoüi.

²⁷ Hwom chemtukuxle mongtsakle tamchu alün-aloxle tüipuix ija kue tiklax ngole. Ku ozün ma tüipongma wüi ibue Jowanpa zan to kale changpu ilaxle ku tokfüi ma tomning ibu onüi chichang-chizangle tüi angkya changle.

²⁸ Hünzom lompabu hia nguakax-wangkhobu pangwüi ku hato sele asox hu, ikoxle tix kue hwom hama ibu zangwün apua ang tho angkya chang koxle; hwom bama mikngün kaxkhi ang kue ding-hi-hax seüi.

²⁹ Ku zile paokya füima khünaknu a tüle chichang-chizangle tüi angkya tamchu kue anwot-anole koxkyabu hwome chilaxle awütüi. Athax füichima hwome thama füi apongle laxüi, chemthüikoxle chixe taxmokle abaxkya mwot mokle changkya tokhange ipongma hwome Jowanpa ang mong atsikle changdaoüi.”

Mosa-e Ngaokya tsai

³⁰ Israel khünaknu pangnue apale ngopongma Mosa-e ibibi tsai bakle ngaole aho: