TSAITONG-KAXTONG 30 - OTSAO BAIBEL (BSI)

Hwom Fün Amüi angkya hia Mohiman Kop angkya Chifün

¹ “Athax kue hünzom ang mohiman hia othuak-ozom tütapu thüichu zünle kop ang danpu. Chemtue ibu pangwüi hünzom to changle hüiüihex, ilaxle hünzom a Jowanpa hünzom Zang-e chiakle asamkya mixnok chaxwan to ngole asule changpongma, kue hünzom ang omüi-oma nyi bama zün ang dankya hünzome texle ataküi.

² Hünzom hia hünzom su-sa hwom Jowanpa hato mongchatle jangchang ilaxle anyix kue hünzom ang koxle ngokya kaxtombu pangwüi kax ma laxle jangchang,

³ Jowanpa hünzom Zang-e hünzom to chingchakya tüiüi. Hünzom chiakle asam thomkya haxtok tokya chixe hünzom tamchatle apüiüi, ilaxle tamchatle chixe hünzom ahak-aluale chang ang tomüi.

⁴ Hünzom chaxwannu haxtua-zangnam nok to ngole asu koxlechu, Jowanpa hünzom Zang-e pangwüi athüt ang tomüi ilaxle hünzom haxtok to tamchatle apüiüi.

⁵ Ikoxtix kaitanto hünpu-hünpa hwom noxta ngole toxkya haxtok hünzome kop ang tomüi. Ilaxle chixe hünzom ami pupa hwom tsünto ile matüitox le hünzom tüle ahak-aluale tamchu pu-tsale chang ang tomüi.

⁶ Hünzome chix to mongpak-fünthole mongkünkya tüi angkya hanpakma tamchu ija haxtok ma hünzom othuithuima ngole tsuak angkya hanpakma, Jowanpae hünzom tamchu hünzom sixlibu ang kax ma laxle tüi angkya kün-mong koxüi.

⁷ Chixe ibu othuak-ozom pangwüi hünzom zanpabu, opange hünzom thua anule tüipuix tamchu hünzom a hwom china ang laxle hüidaopuix, hwom hato chat ang tomüi.

⁸ Ilaxle hünzome anyix kue hünzom ang koxle ngokya kaxtombu thomüi ilaxle Jowanpa kax ma laxle tüiüi.

⁹ Hünzome amok-amomo pangwüi ma Jowanpae hünzom ahak-aluale tüi ang tomüi. Hünzom ang su-sabu tüle tüiüi tamchu tsom-pom wan müiüi. Hünzom haxtok ma huanuma oziak-owong müiüi. Hünzom pupa hwom ahak-aluale tüi ang tompongma, chix ang mong chemtukux müile tüikya hex, itukuxle hünzom ahak-alua ang tomkya ma chix ang mongmüikya tüiüi.

¹⁰ Ikoxlechu ija chix hwon-nwot laipex ma zale tüikya chix wanlom pangwüi kax ma hünzome lax angkya changpu. Hünzom chix hato mongpak-fünthole chat angkya wüi changpu.

¹¹ Anyix kue hünzom ang koxle ngokya kaxtom a hünzom zongto huanuma tsakle chichangba münaloptsuak le münchang.

¹² Ija a zangdingkho towüile münchang. ‘Kwome atat üntoxle ija kax ma laxle tüi ang, kwom hanpakma ija, owa donglaxle jole faüi?’ le hünzome atüi ngo angkya jao münchang.

¹³ Ija a molo tinu tachi towüi lechu münchang. ‘Kwome atatlaxle ija kax ma laxle tüi angkya hanpakma tinu tale paolaxle ija kwom hato owae apüile faüi?’ le hünzome atüingo angkya fang münchang.

¹⁴ Münchang, ija a hünzom füi ikhama tüile. Hünzome ija awan-ngopu ilaxle ija zexle tsuakpu, idaile athaxpi ija to onglax.

¹⁵ “Anyix kue hünzom ang, ochax hia otsao, ozün hia omang nyi bama tütapu zünle kop angkya danpu.

¹⁶ Hünzome Jowanpa hünzom Zang kax ma laxle jangtüi, chix kax ma laxlax, ilaxle chix wanlombu tole ngolax, jangchangba hünzom a ahak-aluale tamchu khünak huanuma tsale tüikya jat-li ang achangüi; ija a anyix kue hünzom ang koxle ngopu. Hünzome kop angkya haxtok ma Jowanpa hünzom Zang-e hünzom to mohimanüi.

¹⁷ Ikoxle hünzome kax ma chilax tamchu chiapale jangchang, tamchu mix baozangbu to shwom ang paole jangchang,

¹⁸ hünzom a olithule max ang tomüi: athax kue ikhama hünzome ang tsaikhax-kaxkhün koxpu. Hünzome kop angkya haxtok to, Jordan shuanu talaxle hünzom tsünlole ngo ang münkopüi.

¹⁹ Athax kue hünzom ang: khüzün hia mikmüt, ilaxle Zang mohiman hia Zang thuakzom, ibu monge atsutsu zünle kop ang hünzom danpu, üntoxle hünzome zünle kopkya bama ngünmix ang kue ding-hi-hax sepu. Khüzün wüi zünle koplax.

²⁰ Jowanpa hünzom Zang to mongkünlax, chix kax ma laxle tüilax tamchu chix to mongong tüikya füi ngolax. Ile jangchangba, hünpu hwom, Abraham, Isak hia Jakop hwom ang koxüihex-ole tsaosaxkya haxtok ma hünzom tamchu hünzom su-sa hwom tsünlole ngo ang kopüi.”