TSAITONG-KAXTONG 29 - OTSAO BAIBEL (BSI)

Moab Nok to Jowanpa e Israel Nok füi Longzale Kaxfün

¹ Ibibi a, Moab chaxwan to tüipongma Jowanpae Israel khünaknu füi zingle tsaotsüt füikya zangwün bama apua ang Mosa ang fakya kaxtombu changle; ibu pangwüi Jowanpae Sinai haxnu ma hwom ang fakya longza-kaxtombu to obo ang fakya kaxtombu ningle changpu.

² Israel khünaknu pangwüi sele asoxlaxle Mosa-e hwom ang thüi: “Jowanpae Ijip nok wanghompa to, chix nguakax-wangkho hwom to tamchu hwom onok jaojao to chemle mokdaopuix ibu hünzome ma mik füi ngünle laxdaopu.

³ Jowanpae mokkya khompua zadün thama ohünotün mwotbu tamchu khomtsikya mwotbu hünzome ngündaoa.

⁴ Ikoxle hünzome apongle hüidaokya ibu anyix hünzom ang chemchu tsingle lax ang chitom.

⁵ Zanglao punyi atale Jowanpae hünzome sak hax akaile azüi. Ipongma hünzom nyi-za hia chisoxbu buile pao ang chitom.

⁶ Hünzom ma sax angkya hanpakma an chichangba ling angkya hanpakma grepti-ju hia mama oti chemchu chitüi, ikoxlechu chix a hünzom Zang changpule aho angkya kuxmale Jowanpae hünzom ang ibu pangwüi koxle hüipu.

⁷ Ilaxle chemtue kem ikhato nguipuix, Heshbon angkya wanghompa Sihon hia Bashan nok wanghompa Og nyi kem füi azan ang lai. Ikoxlechu hwom to keme wüi anaopu.

⁸ Ifüima keme hwom haxtok laxpu, ilaxle ija keme Reuben hia Gad hokhi ang ibomachu Manasseh homjen süifi toxkyabu ang tom-hanle kox.

⁹ Ija tsaotsüt ma tüikya wanlom pangwüi kax ma laxle tüikox, ile changkox tix mokkya mwottho pangwüi ma hünzom tho-lünle tüiüi.

¹⁰ “Hünzom: lompabu hia nguakax-wangkhobu, hünzom khünakbu, shekobu hia naosombu,

¹¹ üntoxle hünzom ang hadün tikhole mwot mokle koxle hünzom khato ngole hüikya püntüibu pangwüi; anyix hünzom a Jowanpa hünzom Zang tunthoma ajongle ngopu.

¹² Ija tsaotsüt kaxshing kop angkya hanpakma üntoxle ijama tüikya mwotli pongle kop angkya hanpakma anyix hünzom ikhama ngopu,

¹³ ile changkox tix, chixe Abraham, Isak hia Jakop hünzom putong hwom füi tsaotsüt daokya ningle, chix a Jowanpa hünzom Zang ang ilaxle hünzom a chix khünaknu ang ngo angkya zangwün tsuaküi.

¹⁴ Jowanpae ija tsaotsüt hia ijama tüikya mwotli mok angkya bama kaxshing kople changkya hünzom tata füile münchang.

¹⁵ Anyix chix tunthoma ikhama opang ajongle tüilaxpuix kembibi pangwüi füi tamchu athax füichi ma hüi angkya tsünthom pangwüi füi kaxshing kopkya changpu.

¹⁶ “Ijip nok to hünzom chemningle ngole hüidaokya dai ilaxle mixjat-mixli haxtok akaile ahamle changpongma chempangle changkya dai ibu texle ataklax.

¹⁷ Pün, long, khop hia hun, ibu füi zingle tüikya, ibu nok baozang chapabu hünzome ngünle hüipu.

¹⁸ Anyix ikhama ajongle tüikya sheko, lüka, kako-homkha, chichangba homjen opupuchu, mixnok baozangbu to shwom ang paoüima, Jowanpa kem Zang hato tok chiaho angkya münchangpuole mongzangwünle tsuaklax. Ile jangchang thüiningle ija a khaxkya hia zik-hing füikya püntsing jukya tuita ang achangüi.

¹⁹ Anyix ikhama ajongle tüikya kha angkya, ija tsaotsüt ma womdao koxlechu, zünkax-saikax ma chilaxle ma mongtextex ma ngokoxchu chem münchangle thüt angkya mix owachu müntüipox-ole atsing koplax. Ile changkya jangtüi thüiningle, ijae hünzom müikya hia chimüikya pangnusa tomwüi max angkya ataküi.

²⁰ Iningkya khünak to Jowanpae thailak fakya müntüiüi. Itülüi, hünzom füikya Jowanpa mongtsik wünle ningle laiüi, ilaxle hünzom pangwüi oli thule machang machangle ija laipex ma zale tüikya thama hünzom khangkho ma dütüi.

²¹ Jowanpae chix a Israel homjenbu khama tuita kaxpan ang laxle twonüi ilaxle ija Jowanpa hwon-nwot laipex ma zale tüikya tsaotsüt angkya othuak-ozombu thama chix hato ngui ang tomüi.

²² “Jowanpae hünzom haxtok hato hüi ang tomkya thama hia sikngün pangwüi, athax füichi-naoli tsünto hünzom su-sabu hia tsailo tokya mixnokbu pangnusae ngün ang kopüi.

²³ Haxtokbu a khat hia hum-e awangle, oziak-opua chemchu chitüile awütle thomkya kha ang ngoüi; chemchu küi-thwomle münchangüi, ikhato hingzang ngaxchu chinyemüi. Chix mong shixle tsikpongma Jowanpae amütdaokya Admah hia Zeboiim nok, Sodom hia Gomorah tingnubu ningle changüi.

²⁴ Ifüima zangfang pangnue atüiüi, ‘Ija haxtok to Jowanpae büthüikoxle ile hwonpuix? Ipongpong thama adünle chix mong chemkhoma tsikpuix?’

²⁵ Ikoxle kaxlan a ile changüi, ‘Chixe hwom Ijip nok tokya alaile changpongma, Zang-e hwompu-hwompa hwom füi tsaotsüt tsaotsütkya Jowanpa khünakbue amale awüt.

²⁶ Jowanpae hwom ang taxshwomle abaxkya, hwome otuechu shwomle chihüikya mixnok baozangbu to hwome shwom.

²⁷ Ikhoma Jowanpa ang chix khünaknu füi mongtsik ilaxle ija laipex ma zale tüikya thamabu hwom haxtok hato ngui ang tom.

²⁸ Jowanpa ang hwom füi mong huanuma ma, ilaxle chix mongtsik füi chixe hwom, hwom haxtok angkya file awüt ilaxle anyix hwom ngole tüikya mixnok chaxwan to hwom tswonle awüt, le changputa.’

²⁹ “Kem Jowanpae pyenle thomkya tütali tütüile; ikoxle chu chixe chix Wanlom ngaile ahodaoa, ilaxle kem tamchu kem su-sa hwome ija kax ma jento laxle ngo angkya wüi changpu.