TSAITONG-KAXTONG 26 - OTSAO BAIBEL (BSI)

Laodongkya

¹ “Jowanpa hünzom Zang-e hünzom ang koxkya haxtok alople, ikhama tingtan nokzingle ngole changkya füima,

² puatakle laodong pongma pongwang angkya puamün wünkya nua ma sholaxle noknusae wüi zangshwom angkya nui to apüi angkya oli changpu.

³ Ipongma zomzing ang asukya nguapa hato nguilaxle chix füi akaxlax, ‘Athax kue, Jowanpa ku Zang-e kwom pupa hwom ang koxüihex-ole tsaosaxkya haxtok to ku ngui ang kopdaoale Jowanpa ang awan ang tompu.’

⁴ “Nguapae nang angkya ija nua laxlaxle Jowanpa hünzom Zang ang tö koxkya tö-tsap zui ma ija danüi.

⁵ Ifüima Jowanpa tunthoma nange kax ibibile zexüi: ‘Ku putong a chaxwan faokya aham ngokya tuita Aram nok changkya. Chix a Ijip nok to kako koplaxle ngo ang ka. Ikhato kapongma hwom mixhuak hidaole wüi changkya, ikoxle hwom tüle chongkya tamchu tsak-zong füikya jat-li tuita ang achang.

⁶ Ijip noke hwom to tüle zothup ilaxle atsangle da mwot mok ang tom.

⁷ Ifüima kwom to asun angkya bama kwome Jowanpa, kwom putong hwom Zang to nyakle akhong. Chixe kwome nyakkya ozing atatle lax ilaxle kwom sikngün-zolit ilaxle fuxtsüile nuzaokya ngünle lax.

⁸ Tüle chongkya chix tsak-hi-zong makhange chixe kwom Ijip nok chak tokya azün. Chixe ohünotün hia khomtsikya mwotbu mok ilaxle za-adünkyabu ngai ang tom.

⁹ Chixe kwom ikhato apüi ilaxle ipong müikya tamchu ahak-aluale tüikya haxzao füikya haxtok ija kwom ang kox.

¹⁰ Idaile chixe ku ang mohiman koxkya kha angkya Jowanpa hato kue puamün sax apüile koxpu.’ “Ifüima Jowanpa tunthoma ija nua atuaküi ilaxle ikhama chix tong shwomle changüi.

¹¹ Jowanpa hünzom Zang-e nang üntoxle hünzom kako ang müikya jali chempangsa koxpuix, ibu hanpakma Jowanpa füi mongmüikya tüikox; ilaxle hünzom tingsho ma tüikya Liwi hia püntüibu hünzom füi ija fongkhat ma wom ang laxkox.

¹² “Zanglao azom foto bünfong, hünzom saxnua bün kha angkya nua tuipong, Liwi hwom ang ilaxle mixnok hia khaxsabu ang tamchu zomnubu ang laxkox. Ile chang koxle, pangnok-jating towüi hwomechu masütsüt atakle ngoüi. Chemtue hünzome ija mokle tsuak puix,

¹³ Jowanpa ang thüikox, ‘Kue hom to bünfong pyenle toxkya kha jao müntüi, nange ku ang kaxtom fakya lailaile kue ibu Liwi hwom ang, mixnok hia khaxsabu ang tamchu zomnubu ang koxle tsuakdaoa. Kue bünfong ba angkya nang kaxtom chimok homtoxle chichangba alak-athakle chemtuechu matox.

¹⁴ Kue ku mongmaxle sople ngopongma ngaxchu ikha angkya tuita münsax. Ku zanglom ma chitsaole asu pongma, ku homkha angkya kue ija tuita chu chialai. Kue ikha angkya tuita chu chapabu to jop-tole chikox. O Jowanpa! Nange ku füi bünfong bama adangle fakya pangwüi mokle changdaoa.

¹⁵ Nang ngwotnui otsao zangkangting tokhange hüihüi ilaxle nang khünaknu Israel nok to mohimanhüi; nange kwom füi tsaotsütkya ningle kwom ang fakya, ahak-aluale hia haxzaoe awangle tüikya kwom haxtok to mohimanhüi.’

Jowanpa Khünaknu

¹⁶ “Anyix Jowanpa hünzom Zang-e ibu wanlom pangwüi kax ma laxle tüi angkya kaxtom koxle, ilaxle mongong tüikya füi hünzome mong makhange ibu kax ma laxle tüilax.

¹⁷ Anyix hünzome Jowanpa a hünzom Zang changpule awan ang tompu; hünzom chix kax ma laxle tüi angkya hia ibu wanlom pangwüi thom angkya tsaosaxpu, ilaxle chix kaxtom kax ma laxle moküihexle tsaopu.

¹⁸ Chixe hünzom füi tsaosaxkya lailaile, Jowanpae anyix hünzom ma khünaknu ang pongle laxdaoa; ilaxle chix wanlom pangwüi kax ma laxle ngo angkya chixe hünzom ang kaxtom koxle.

¹⁹ Chixe hünzom a, chixe zingkya mama jat-libu pangwüi thak to achongkya ang zingüi, ilaxle hünzome chix mün achuak-achenle changüi. Chix kaxtsao ningle hünzom a chix khünaknu ang changüi.”