TSAITONG-KAXTONG 25 - OTSAO BAIBEL (BSI)

¹ “Thütba Israel khünak mixsün anyi tütali ma alakya bama zangwün khwa to pao, ilaxle tuita a sule ata mix a thaile le kaxfün tsuak.

² Thaikya khünak to fit ang tom angkya kaxfün, kaxfünpae chix a haxchi to akhuxle hu ang tom, ipongma chix to zu füi fit ang tsan. Obithom ma fit angkya hex ija a chix mütkop ma thütle changüi.

³ Ikoxlechu chix to othom 40 kople fit ang tsuak, ikoxle ito kaile a münchangüi; ito kaile jangfit thüiningle ija a ngünkya zongma chix tha ajaokya ang achangüi.

⁴ “Nange tsax nakle changpongma maihupong tun ma taxzim.

Ziünkya Tüita-naopa Hanpakma Mokle Kox angkya

⁵ “Hotüi-honao anyie tingtok hia tuina tuita wüi tomwüi saxlaxle ngole hüifüima tuita zile pao. Chixe oli ang lüka miktsang tuita chitox; ile jangchang ningle chixe thanu ang danle toxkya mixcha a hwom haxnu homsa owawa ma shongle lüwüi chichang, she a mix ma ating-anokle chichangüi. She a zile paokya honao ma shong angkya olom changpu.

⁶ Tüichongpa a zile paoünkya sasün ang eüi, ikoxtix Israel nok ma chix kako-homkha ojem chifünle ngo ang thoüi.

⁷ Ikoxle zile paoünkya honae she laxse chitsu thüiningle she a tingsho angkya lompabu hato paoüi ilaxle hwom ang thüiüi, ‘Ku kakopa honaoe ku chix ma shong ang müntom lüta; chixe hotüi ang Israel khünaknu khama osix-oli münthomle texputa.’

⁸ Ifüima tingsho angkya lompabue ija mixsün selaxle chix füi akaxüi. Chixe she münlaxpule jangthüi:

⁹ tingsho angkya lompabu tunthoma honachong chix hato hüilaxle chix angkya chisox sukle ang tomüi ilaxle chix thün to thuake thuak laxle akax ang tomüi, ‘Matüi ang sixli fase chitsukya mix to ile chang angkya olomjao changle.’

¹⁰ Ija mixsün hwom homkha a Israel nok khama ‘cha angkya chisox sukdaokya homkha’ le awan ang tomüi.

Wanlom Mamabu

¹¹ “Mixsün anyi ahele changpongma, mixsün tuita kakonue ma kakopa to asunle, atapa mixsün fünma ma kople thomle jangchang,

¹² ija mixcha to chingcha angkya jao münchang. She chak texle awütdao.

^13-14 “Tuak thüt pongma dyen-nganle taxchang.

¹⁵ Tuak otyatya ma thüt-zingle laxkox, ikoxle Jowanpa hünzom Zang-e hünzom ang koxle ngokya haxtok ma hünzom a tsünlo khothole ngo ang kopüi.

¹⁶ Mixdyen-mixnganle tüikya khünak thua Jowanpa anule.

Amalek Nok Lang angkya Kaxtom

¹⁷ “Hünzom Ijip nok tokya nguile ngopongma Amalek noke hünzom to chemle hwonkya dai, ija texle ataklax.

¹⁸ Hwom ma Zang thuazakya ojao chitüi, idaile hünzom na-juale maxngo pongma huxsa ma zuile hüi üntoxle hünzom to sing ilaxle füichi to na-juale maxngokyabu komle lang.

¹⁹ Idaile chemtue Jowanpa hünzom Zang-e hünzom ang ija haxtok koxlaxle, ikhato hünzom akhople tüikya zanpabu chak tokya hünzom azangle ngotsuak ang tomüihex, ipongma Amalek nok komkaile lang angkya wüi changle. Ile changkox tix owaechu hwom tamchatle texle chiataküi. Ija taxalak!