TSAITONG-KAXTONG 24 - OTSAO BAIBEL (BSI)

Kako Afankya hia Tuiju-nasom

¹ “Thütba mixsün tuitae sheko tuita kako tanle apüi ikoxle ofüi she chilax angkya mongzangwünle tsuak, chemthüikoxle chixe she ma chix anupüli, mik-hu ma thaikya tütali atak. Ikhoma chixe afan angkya jan laiza, ija she ang kox, ilaxle she a hom angkya alaile apao.

² Namthütba ifüima she a mama mixsün ma anok,

³ ilaxle chixe chuwüi ofüima münlaxngole mongzangwünle tsuak, ikhoma chixe chuwüi fan-jan angkya laizabu za, ibu she ang kox, ilaxle she a chix hom angkya alaile apao. Chichangba she kakopa anyi lükya zile pao.

⁴ Iningkya pangnyi zangwün ma wüi, pongwang angkya she kakopae she tamchatle lax ang müntsuak; chixe she a chitsaokya ang laxüi. Chixe she tamchatle laxle jangchang, ija a Jowanpa zongto thaikya ang changüi. Jowanpae hünzom ang kox angkya haxtok to hünzome iningkya huanu ochax mwot chimoküi.

Wanlom Malom-malombu

⁵ “Chemtue khünak tuita tuiju-nasomkya hozün changpuix, chix a zanhu mwot to ka ang chitomüi chichangba chix ang pünsüt-wangmwot chifaüi; zanglao tuita hanpak ang chix a tingsüt-nok-mwot chemchu chitüile danüi, ikoxtix wüi chix a hom ma nuilaxle ma kakonu mongamüi ang tsuaküi.

⁶ “Chemtue nange khünak tuita ang tütali thashe ma koxle changpuix, chixe saxthu ang laxle ngonanakya thom ija tsangthom hanpak ang chilaxüi. Ile chang koxle hwom ozün ma ngo angkya hanpakma achwonkya kako süt lomtsyenkya ang changüi.

⁷ “Israel khünak tomtom owawae owawa kople paolaxle ma da ang thom chichangba ija khünak da ang achangle hangle jangchang, ija khünak a mik max ang tom angkya changle. Ile changkox tix hünzom ija ochax füi atsaile ngo ang tsuaküi.

⁸ “Chemtue nang ngwonkak kakle changüihex, zompu-zangpa Liwi hwome nang ang adangle fakya mwot komkaile mok ang azonglax; kue hwom ang adangle fadaokya ningle moklax.

⁹ Jowanpa hünzom Zang-e hünzom Ijip nok tokya alaile changpongma Meriam to chemle changpuix, ija texle ataklax.

¹⁰ “Chemtue hünzome khünak tuita ang tütali thashe koxle changüihex, chixe nang ang tuita thathap hanpak ang kox angkya nyi lax ang nang chix homkha to taxnop,

¹¹ nang a homtho to ngole nuilax ikoxle ija nang hato chixe alaile naxchang.

¹² Chix a chitüi-chinang khünak tuita jangchang, ija tüi wün apomle taxthom;

¹³ ija chix ang hansongsong ma wüi achatle koxdao, ikoxtix chixe ija awunlaxle jip ang tsuaküi. Ija ma chix ang mongmüiüi, ilaxle chix füi tomle Jowanpa hünzom Zang chuwüi nang füi mongmüiüi.

¹⁴ “Chitüi-chinang khünak hom ma mwot mok ang thomlaxle dyen-nganle taxchang; chix a tuita Israel khünak tomtom wüi changlax chichangba hünzom tingnu ma ngole tüikya mixnok wüi changlax.

¹⁵ Nyixfokya to hanhom shemsheme ija nyix mokkya hingchak koxle changkox; chixe ija ngun lax angkya wüi tamchu ija kop angkya le chix mongto zongbakle monghomkya tüipu. Nange chix ang ija chifa thüiningle, chixe Jowanpa hato nang füi chix mongmakya zang wünüi, ilaxle nang a ija ochax lyenkya ma thaikya mix ang changüi.

¹⁶ “Hosu-sasün hwome mütkop-faolole changkya khoma honu-hopa hwom mik max ang müntomüi; ija lailaile honu-hopa hwome mütkople changkya khoma su-sa hwom mik amüt angkya münchang; khünak tuita a ma mütkop khomatix wüi mik max ang tomüi.

¹⁷ “Püntüibu hia khaxsabu ang hwom süntswon chifale müntüiüi, ilaxle ma thashe hanpak thathap ang zomnu tuita angkya nyiwun laxle chichangüi.

¹⁸ Hünzom chuwüi Ijip nok to da ang ngokya Jowanpa hünzom Zang-e danle fakya changpu. Ija zangwün otuechu taxalak; ikhokho ma kue hünzom ang kaxtom ija koxpu.

¹⁹ “Chemtue hünzome tsaxtule changpuix ipongma tsaxwüt asüi ang taxka ngo; ibu a püntüi, khaxsa-zasa hia zomnubu hanpak ang naxbang kox. Ile changkya khoma Jowanpa hünzom Zang-e hünzome amokmok pangwüi to mohimankya tüiüi.

²⁰ Chemtue hünzome olip ziak khaile changpuix, alakle dantoxkyabu asüi ang tamtaxka ngo; ibu a püntüi, khaxsa-zasa hia zomnu hwom hanpak ang naxbang kox.

²¹ Hünzome grep ziak khaile asoxle chang füima, owüt asüi ang ikhato tamchatle taxnguingo; ibu a püntüi, khaxsa-zasa hia zomnubu hanpak ang naxnuikox.

²² Hünzom a Ijip nok to da ang ngotoxdaokya changpule otuechu taxalak; ikhoma kue hünzom ang ija kaxtom koxpu.