TSAITONG-KAXTONG 23 - OTSAO BAIBEL (BSI)

Jowanpa Khünaknu Khato Chilaxkya

¹ “Zwom züile changdaokya khünak owachu Jowanpa khünaknu khato lax ang müntho.

² “Opu-otong chitüile pux-paikya chichangba iningkya sixli owachu, tsünthom bün füima ngaxchu Jowanpa khünaknu khato lax ang müntho.

³ “Amon nok hia Moab nok owachu chichangba hwom sixli owachu, tsünthom bün to ngaxchu: Jowanpa khünaknu khato lax ang müntho.

⁴ Hünzome Ijip nok tokya lailaxle lomba to tüipongma hwome hünzom ang süt hia ti jukoxle chemngaxchu chifa, ilaxle hwome Mesopotamia angkya Pethor tingnu ma ngokya Beor sasün Balam hwome hünzom to thuakzomle chang ang shakle apüi.

⁵ Ikoxlechu Jowanpa hünzom Zang-e Balam kax to chiapa, itülüi chixe ija othuak-ozom tuita mohiman ang achangle awüt, ija a chixe hünzom to mongkünkya khoma changpu.

⁶ Hünzom jat-li tuita ang ngokya kople mixjat-mixli ibu to fong ang chichangba hwom ahak-aluale chang angkya oli tuita chu mokle taxkox.

⁷ “Edom nok wünhaile taxchang; hwom a hünzom haxnu-homsabu changle. Anaole Ijip nok thachu taxajao; hanpak tuita ma hünzom a hwom haxtok to ngodaokya changle.

⁸ Tsünthom azom tokhange ibu sixlibu a Jowanpa khünaknu khato lax ang tsuaküi.

Süpahibu Ngwotnui Tsaothale Thom angkya

⁹ “Azan pongma chemtue hünzom pom khama asuüihex, zanglom ma chitsaokya ang ekya oli pangwüi füi hünzom atsaile ngo angkya oli changle.

¹⁰ Khünak tuita zangnak ma wünmang chito ngünkya thoto oti paole bang koxle zanglom ma chitsaokya ang jang achang, ija khünak a pom homtho to lailaxle ikhato ngo angkya changle.

¹¹ Hanhomkya füi tomle chixe tijo-chaktsuxle changüi ilaxle zanghan-mik nopkya füi tomle chix pom mongto dong ang tsuak.

¹² “Hünzom nazakle ngose tsupupu ma nazakle ngo ang homtho to ngwotnui zingle thom angkya oli changle.

¹³ Khyep-di tuita ang ma füi tomle kiathox tuita koplaxle ngolax, chemtue hünzom ang faopaole changüihex ipongma hünzome ija füi hax tholaxle fao to chwople tox ang tsuaküi.

¹⁴ Hünzom pom a zanglom ma tsaothale thomlax, chemthüikoxle Jowanpa hünzom Zang a hünzom füi tomle pom ma, hünzom kho awa ang tamchu zan-nok to hünzome wüi anao ang tom angkya hanpakma hünzom füi womle tüile. Jowanpae hünzom hato tok ahole anong paokya li chisax-chisukya mwot chemchu taxmok.

Wanlom Malimali

¹⁵ “Da tuita hopupa ha angkya paolaxle chix khang azang ang nang hato nguile jangchang, chix a hopu hato wüi chat ang tomkox.

¹⁶ Hünzom tingnubu tütapu ma chang koxlechu chix mong atsutsu ma chix ngo ang tsuak, ilaxle hünzome chix to zongzong ma chihwonüi.

¹⁷ “Israel khünak, lüka wüi changlax sheko wüi changlax, owachu zangshwomnui-ma ma tsangtsa hangkya mix ang chiachangüi.

¹⁸ Anaole chu tuita tsaotsüt tsangthom hanpak ang iningle ma tsangtsa hang laxle kopkya ngun-jan Jowanpa hünzom Zang hom to chiapüiüi. Jowanpae zangshwom-hom ma tsangtsa hangle ngokya thua anule.

¹⁹ “Chemtue hünzom Israel khünak tomtom ang ngun, sütling hia mama tütali thashe ma koxle changpongma chix ma sasün taxlax.

²⁰ Hünzome püntüibu ang thashe ma koxle changpongma olüi lax ang tsuak, ikoxlechu Israel nok tomtom ang koxkya ma ile taxchang. Ija wanlom twonlax, ikoxle Jowanpa hünzom Zang-e hünzom ang koxle ngokya haxtok ma hünzome amokmok pangwüi to mohimankya tüiüi.

²¹ “Chemtue hünzom Jowanpa hünzom Zang füi tsaotsütle changüihex, hünzome koxüihex-ole tsaosax daokya chimokle otuechu taxtüi; Jowanpae nang tsaotsüt koplax ngoüi, ilaxle Jowanpa füikya tsaotsüt thom ang chithokya a tuita ochax ang changpu.

²² Jowanpa füi tsaotsüt chitüikya a ochax le münchang,

²³ ikoxle nang küntsu-monglua ma tsaosaxle jangchangdao, ija chithomle taxtüi.

²⁴ “Chemtue hünzome owawa grep haxtok makhange le le changüihex, nange chak füi jutle sax ang thopupu sax ang tsuak, ikoxle nange ija tsongma khaile chipaoüi.

²⁵ Chemtue hünzome owawa sozam haxtok akaile le le changüihex, nange ikha angkya sozam chak füi punle sax ang tsuak, ikoxle nange ikha angkya sozam tuita chu changkuix füi zütle chilaxüi.