TSAITONG-KAXTONG 21 - OTSAO BAIBEL (BSI)

Otong Chitüikya Mikmütbu

¹ “Thütba, Jowanpa hünzom Zang-e hünzom ang koxle ngokya haxtok ma khünak tuita a kothofa to langle ang, ilaxle ija owae langpuix hünzome chiawan.

² Hünzom lompabu hia kaxfünpabu paolaxle otam makhange hozui ma tüikya tingnubu chemtukux atsaile tüipuix thütle ano angkya oli changpu.

³ Ifüima süsoxle tüikya tingnu angkya lompabue manzai to malaxkya maihupong tuita zünle kopüi.

⁴ Hwome ija otam zui ma tamchu chizople jenle ngokya shuasa tamchu otuechu manzaile machangkya chichangba küi-thwomle machangkya haxtok to ija joüi, ilaxle hwome ija ongom apakle changüi.

⁵ Ikhato zompu-zangpa Liwi hwom chuwüi ngui angkya changpu, chemthüikoxle tütali ohyet-otsi zangwün laikya pangwüi hwome tix abax ang tho angkya changle. Jowanpa hünzom Zang-e hwom a chix thotha ang tamchu chix mün ma mohiman kaxzakdün ang kamle kopdaoa.

⁶ Ifüima ija langkya khünak otam hama soxle tüikya tingnu angkya lompabue ija maihu dingma chak soüi,

⁷ ilaxle thüiüi, ‘Ija khünak kwome langkya münchang, ilaxle owae langpuix kwome müntik.

⁸ Jowanpa, Israel nok nang khünaknu to thailakkya tüihüi. Ijip nok tokya kwom khosünkya a nang changpu. Kwom ang thailak tüihüi ilaxle ija chemngax chichangkya khünak tuita zikmüt khoma hünlit kwom khangkho ma taxadüt.’

⁹ Ile Jowanpae lomkya jangmok thüiningle, ija mikmüt bama hünzom hünlit ang münchangüi.

Zanda ang Kople apüikya Shekonubu bama

¹⁰ “Chemtue Jowanpa hünzom Zang-e hünzom ang zan-nokbu to lütlaxle zandabu kople apüi ang tompuix,

¹¹ ibu khama osün müikya naocha tuita ngünlaxle ija nange ma kako ang laxse tsukya mong jangtüi thüiba,

¹² she a nange ma hom to apüikox, ikhato she kho ongle tamchu she chak-khinbu zütle laxkox,

¹³ ilaxle she nyizabu lüile laxkox. She a nang hom ma honu-hopa hwom mang sople lyetkua tuita ngoüi; ifüima nange she a nang kako ang lax ang tsuak.

¹⁴ Ofüima, nange she laxse chitsule jangchang, nange she danle apao angkya changle. Nange she ang nang füi tomle jip ang atsangle changdaokya khoma, nange she to danucha tuita to hwonkya ningle hang ang müntsuaküi.

Tüichongsa-e Hopa Mantswonkya

¹⁵ “Thütba mixsün tuita ang sheko anyi tüi ilaxle hokhi pangnyie lüka naosa puxle alai, ikoxle tüichongsa a chix mongkünnue ngünkya chichang.

¹⁶ Sasün hwom ang tingtok hia tuina ahanle kox angkya hopae mongzangwünle changpongma, chixe ma mongkünnu sasün ang tüichongsa süntswon koxle süi-chapkya chiaho angkya oli changpu.

¹⁷ Tüichongsa a chix mongkünnu sasün chichang koxlechu, chix a tingtok süntswon tomtome nüile kox angkya oli changpu. Hopae ija nao a Zang-e sasün tüichongsa ang fakya nao changpule e-sekya ahole kopsese chix tsyen komle kox angkya changpu.

Kax ma laxle Chitüikya Nao bama

¹⁸ “Thütba mixsün tuita ang kax ma ojao chilaxkya zünte nao tüi, ija naoe sikangün koxlechu honu hia hopa nyi kax ma ojao chilaxle tüi.

¹⁹ Iningkya nao a honu hia hopa nyie tingnu ma tüikya lompabu pomtho to apüi angkya oli changle, ilaxle chix a kaxfün nui to ajong ang tomüi.

²⁰ Hwome ibu ang thüiüi, ‘Kukhi sasün a ojao kax ma chilaxle tüikya ikoxle changnong-pünthomle ngokya nao tuita changle; chixe kwom kax ma ojao münlax ikoxle jutok-saxngale mix ngole homle.’

²¹ Ifüima tingnu angkya khünakbue chix to long füi thuple langüi; ile hünzom ininglükya ochax füi atsaile ngo ang thoüi. Chemle changpuix ija zing atatlaxle Israel khünak pangnusa wüi zaüi.

Wanlom Malimali

²² “Khünak tuita mix mik amütle changkya khoma lang üntoxle pünküi laxle ija khoma asha le jangchang,

²³ ija a zang angaile thom angkya oli münchang. Ija a inyixnyix wüi akhün angkya oli, chemthüikoxle khünak mang pün ma ashale thomkyae haxtok hato Jowanpa thuakzom apüiüi. Mang a akhünlax, ile changkox tix Jowanpa hünzom Zang-e hünzom ang koxle ngokya haxtok chitsaokya haxtok ang münachangüi.