TSAITONG-KAXTONG 20 - OTSAO BAIBEL (BSI)

Ochax-ozan Bama

¹ “Chemtue hünzom zanbu füi azan ang laipuix tamchu hünzom ma tüikya füi süluile man-kanlin hia manbu tamchu süpahibu hünzome ngünle laxpuix, ibu thua hünzom za-ngo angkya münchang. Jowanpa hünzom Zang, owae hünzom Ijip nok chak tokya khosünle apüipuix, chix a hünzom füi tüile.

² Hünzom azan ang sütüi thoma nguapa nguilaxle zankat mixbu füi akaxüi,

³ ‘Israel khünaknu, apakoplax! Anyix a hünzom zan to kapu. Hünzom a zan-nokbu thua taxza chichangba monghixle taxchang chichangba taxabüt.

⁴ Jowanpa hünzom Zang a hünzom füi tomle kaüi, ilaxle chixe hünzome wüi lüt ang tomüi.’

⁵ “Ifüima lompabue khünaknu pünzün-wangsaile akaxüi, ‘Kem khama athax ile homzün zailaxle ija homdongle ma-atsaokya mix tüicha? Ilükya mix jangtüi chix a hom to chatlax. Oshomale chix a zan to maxle jangchang, owae chix hom dongle atsaoüi?

⁶ Grep haxtok molaxle ija angkya puamün masaxkya mix tüicha? Chix a hom to chatlax. Oshomale chix a zan to maxle chang koxle, chix grep-ti ang owae lingüi?

⁷ Owawa tuiju-nasom ang tikshole thomdaokya mix tüicha? Ile jangtüi thüiningle chix a hom to chatkox. Oshomale chix zan to maxle changlax koxle chix füi tuizing-nazexle thomdaokya mixcha owae laxüi?’

⁸ “Ija lompa-e khünaknu ang ile chu thüiüi, ‘Ikhama owawa chahix-monghixle abüt-aban ngokya mix tüicha? Ilükya mix jangtüi, chix a hom to chatlax, chemthüikoxle chixe mix mongchu ahikle awütüi.’

⁹ Lompa-e khünaknu pünzün-wangsaikya tsuak füima, othom foto lompabu zünüi.

¹⁰ “Chemtue hünzom a tingnu tuita to tingtak ang nguipuix, pongwang ma khünaknu ang chang-pax danle chak ajong ang tomkox.

¹¹ Hwome zünkax ma laxle chang-pax danlaxle chak ajongle jangchang, ibu a hünzom da ang achangüi ilaxle hünzom mwot atsangle mok ang tomüi.

¹² Ikoxle ija tingnu angkya khünaknue chang-pax danlaxle chak ajongkya chitüi, ikoxle alünle le mix jangajong, ija tingnu a süpahibu füi akhople kopkox.

¹³ Ifüima, chemtue Jowanpa hünzom Zang-e hünzom ang ija tingnu tingtakle kop ang danpuix, ikhama tüikya lüka tuita chitoxle lang kox.

¹⁴ Ikoxlechu hünzome ma hanpak ang shekobu, naosombu, tsom-pom hia tingnu ma tüikya tuina pangwüi lax ang tsuak. Hünzome zanpabu tuina pangwüi kop ang tsuak. Jowanpae ibu hünzom ang koxdaoa.

¹⁵ Hünzom kop üntoxle tingzing nokzingle ngo angkya haxtok füi atsaile tüikya tingnubu to hünzome ile mokkox.

¹⁶ “Ikoxlechu chemtue hünzom ang Jowanpa hünzom Zang-e koxle ngokya haxtok hünzome koptsuaküihex, ikhama abangbang komkaile lang kox.

¹⁷ Jowanpae hünzom ang kaxtom koxkya ningle: Hit nok, Amor nok, Kanan nok, Peri nok, Hip nok, ibu khünakbu komkaile amütdao.

¹⁸ Hwom langdao, ikoxle hwome hwom baozangbu to shwomkya ningle nushix dongkya mwot pangwüi mok ang hünzom to jik-naikya müntüiüi.

¹⁹ “Chemtue hünzome tingnu tuita kop ang azongle changüihex, hünzome ziakop ang hanpak lole laxkoxchu oziak saxfang pünbu dakle taxama. Pünziak saxkox ikoxlechu pünpo amale taxchang; pün-zuabu a hünzom zongto zanpabu münchang.

²⁰ Hünzome pün mamabu daklaxle, ija tingnubu komkaile kople machang tanto tingkwon panzailaxle kopthom ang tsuak.