TSAITONG-KAXTONG 18 - OTSAO BAIBEL (BSI)

Nguapabu Süntom

¹ “Zompu-zangpa Liwi hwom homjene Israel haxtok ma chaxwan süntswon münkopüi; ikoxle hwom a Jowanpa ang koxkya töbu füi ozün ma ngoüi.

² Hwome mama homjenbu lailaile haxtok münkopüi; ikoxle Jowanpae tsaodaokya ningle, zompu-zangpabu ang achangle Jowanpa thotha angkya a hwom süntswon changpu.

³ “Chemtue maihu hia chun, ibu tö koxle changüihex, zompu-zangpabu ang osuak, okax hia okhax-omong, ibu kox angkya changpu.

⁴ Hwome ibibi puamün pongle kop angkya changle: Sax-ziak, grep-ti, olip-münga ilaxle chun mun, ibu.

⁵ Hünzom jat-li kha angkya Jowanpae Liwi homjen a jento zom mwot mokle chix thotha angkya hanpakma zünle kopkya changpu.

⁶ “Israel nok tingnu ojongjong tokya Liwi sün nguile jangchang, tamchu chix ang mongtsukya tuita jangtüi, jongtakha zangshwom ang süile thomkya onui to paolaxle

⁷ chixe chuwüi ikhama bangkya mama zompu-zangpa Liwi hwom lailaile Jowanpa chix Zang thothale chang ang tsuaküi.

⁸ Chixe chuwüi osüt-olingbu a, ikhama tüile ngokya Liwi hwom füi tomwüile kop angkya changpu ilaxle hwom hom chitokhange ahüikya chix ma thom ang tsuak.

Songsari Zanglombu Chimok angkya bama Kaxkhün

⁹ “Chemtue Jowanpa hünzom Zang-e hünzom ang koxle ngokya haxtok to hünzom nguiüihex, ikhato tüile ngokya mixjat-mixli angkya nushixdongkya zanglom mwot-kat thüi anole taxchang.

¹⁰ Ibu tö-tsap ma tüikya wünkha to hünzome masu-masabu zokle ashunle taxchang; hünzome khünakbu ang o-nan, jenu-shipa

¹¹ chichangba nohing twonkya, ibu mok ang taxtom, ilaxle lum to taxajo.

¹² Iningkya nushix-dongkya mwot mokkyabu thua Jowanpa hünzom Zang anule, ija khoma hünzom hüikya füi tomle ibu mixjat-mixlibu Jowanpae ija haxtok angkya jwonle apao angkya changle.

¹³ Jowanpa to mongpak-fünthole mongong tüikya füi ngolax.”

Ajepa tuita Ahüi angkya Kaxtsao

¹⁴ Ifüima Mosa-e akax: “Hünzome kop angkya haxtok ma, khünaknue o-nan hule changkyabu tamchu ziawan to hule changkyabu kax ma laxle taxchang. Jowanpa hünzom Zang-e hünzom ang ibu mok ang müntom.

¹⁵ Itülüi chixe, ku lailaikya aje tuita, hünzom khakha ma wüi khünak tuita ajongüi; hünzome chix kax ma laxle tüi angkya oli changpu.

¹⁶ “Sinai Haxnu ma hünzom asoxle tüikya nyix, hünzome Jowanpa zangwün atat ang taxtom chichangba chix tüikya münwan za-adünkyabu ngün ang taxtomle hünzome thüipu, chemthüikoxle hünzom a ziüitüile le za.

¹⁷ Ikhoma Jowanpae ku füi akax, ‘Hwome changkya wüi akaxpu.

¹⁸ Kue nang lailaikya ajepa tuita hwom khakha angkya wüi lai ang tomüi. Chemle akaxüihex, kue chix hama wünle koxüi, ilaxle chixe khünaknu hama ku kaxtom pangwüi apuale koxüi.

¹⁹ Chixe ku mün ma zangwünüi, ilaxle kue chix kax ma chilaxle tüikya mix to kue sikangün.

²⁰ Ikoxle kue chiwünkya kax ajepa owawae ku mün lünlaxle wünle jangchang, ija khoma kue chix mik max ang tomüi; iningkya mama baozangbu mün ma zangwünkya aje mamabu chuwüi mik max ang tomüi.’

²¹ “Ajepa kax Jowanpa tokhange hüikya chichang hia changpuix ija chemle awan ang thoüi, ija bama hünzom ang khosam tüikoxlax.

²² Ajepae Jowanpa mün ma akax ikoxle ija kax changle ngaikya chitüi thüiningle ija zangwün a Jowanpa tokhange hüikya kaxho münchang. Ija a ajepae chix mong tokya alaile wünkya zangwün changle, iningkya mix thua hünzom zale ngo angkya oli jao münchang.