TSAITONG-KAXTONG 17 - OTSAO BAIBEL (BSI)

¹ “Hünzome Jowanpa hünzom Zang ang hünzom osu-maihu hia chunbu, makman füikya tö koxle taxchang; Jowanpa a ija ningkya thua anule.

² “Thütba hünzom tingnu tuita ma züita khünake, lüka wüi changlax sheko wüi changlax, Jowanpa füi alünle tamchu Tsaotsüt amale,

³ mama baozangbu to shwom tamchu ibu thotha chichangba lyetnu-zanghan hia lyettsibu to shwomle, Jowanpa kaxtom füi opüima ochax lyenkya hünzome atatle.

⁴ Hünzome iningkya zangwün atatle jangchang thüiningle ija bama otua müile lomlax. Ija zangwün otsing tomtata ang chang ilaxle Israel khama iningkya ochax mwot mokle changdaongünale awan ang kople jangchang,

⁵ ija khünak a tingnu panfang to paolaxle long füi thuple langdao.

⁶ Ikoxle chutix chix hanpakma thaidaokox-ngünale mixhuak anyi makhange thakchi ngünmix tüikyabue changkox-a le kax ngaikya tüikoxtix wüi chichang, mixhuak tuita kaxngai khoma hexle ija khünak mik amüt angkya münchang.

⁷ Mikngün kax ngaikya khünakbue pongwang ma thupüi, ifüima ija khünak to noknue longfüi thupüi; ija ningle hünzom a haxshix mwot füi atsaile ngo ang kopüi.

⁸ “Züizüi zangwün a tingpu kaxfünmixbue fün-wün ang chithole chu tüiüi, thütba: tingtok ba angkya zangwün. Chemtue iningkyabu zangwün tsaitsat-kaxtsale changüihex, Jowanpa hünzom Zang-e chix to shwom-to le chang angkya onui jongtakha zünle thomkya khato nguikox;

⁹ ilaxle hünzom zangwün ikhama tüile asukya zompu-zangpa Liwi hwom hia kaxfünpa hwom chak to laxkox, hwome ija bama tsaifün-kaxfünle naxfa.

¹⁰ Ibue hwom tsaishuk-kaxshuk shule faüi ikoxle hünzome hwome chemle akaxpuix ile mok angkya oli changüi.

¹¹ Hwom tsaifün-kaxfün pongle laxüi ilaxle hwome adangle fapupu moküi.

¹² Ikoxle opupue ikhama asukya kaxfünpa chichangba nguapa kax ma chilaxle jangtüi, chix a mik max ang tomüi; ile hünzome ija haxshix mwotli Israel nok tu angkya awüt ang thoüi.

¹³ Ifüima ija zangwün pangnusae atatüi ilaxle noknusa wüi zaüi, ilaxle iningle mok ang owa angchu mong chichongüi.

Wanghom tuita hanpakma Adangle fakya Kaxbu

¹⁴ “Jowanpa hünzom Zang-e hünzom ang koxle ngokya haxtok hünzome alop üntoxle ikhato ating-anokle changkya füima, tomzi nokbu ningle hünzome wanghom chilaxlaxüi le hünzome katzua-wünkhom laxle jangchangba,

¹⁵ hünzome wanghom ang zünkya mixsün a Jowanpae kamle thomkya mixsün chang angkya oli. Chix a hünzom kha angkya nokpu tuita chang angkya oli; hünzome wanghom ang püntüi chizingüi.

¹⁶ Wanghompa ang chix hilua-naomüi hwom hanpakmale man huanuma tüi angkya oli lechu münchang, ilaxle chixe Ijip nok to manbu shak ang khünak chiakatüi, chemthüikoxle Jowanpae chix khünaknu ikhato tamchichat angkya akaxdaoa.

¹⁷ Wanghompa ang kakonu obiobi tüi angkya oli le münchangüi, chemthüikoxle ile tüikyae chix Jowanpa hato tok ahole atsaile pao ang tsuaküi; ilaxle ma alüile hun hia khop füi alua-awangkya mix ang chizingüi.

¹⁸ Chemtue chix wanghom ang achangpuix, chix ma, Zang wanlom hia ija Hwon-nwot Laipex, zompu-zangpa Liwi hwom chak ma tüikya laifa-ojing angkya taile zakya laipex tuita tüi angkya oli.

¹⁹ Chixe ija laipex chix zui ma thomüi ilaxle tsün-tsün ma e-le ngoüi, ikoxtix chixe monge sung-zaokya hia chix thua zakya füi ija ma fale tüikya kaxtom lailaile Jowanpa kax ma laxle tüi angkya awanle laxüi.

²⁰ Ijae chix, hozui Israel khünakbu füi ataxle müikya mix tuita le tex ang müntomüi tamchu Jowanpa kaxtom kax ma chilaxle nong-tsax to pao ang chitomle abax thomüi. Ile chang koxle chixe zanglao obiobi apün-awangle ngoüi ilaxle chix sixlibue Israel haxtok tsünthom tok to tsünthomle apün-awangle changüi.