TSAITONG-KAXTONG 16 - OTSAO BAIBEL (BSI)Kaitox Pangpwon ( Lai 12.1-20 ) 1 “Abih lyetnu ma Kaitox Pangpwon nuikya füi Jowanpa hünzom Zang achuak-afuale changkox; Ijip nok tokya chixe hünzom khangkhosünle kopkya a zangnak ma changkya. 2 Jowanpa hünzom Zang ang münchong fale achuak-achen angkya hanpakma jongtakha zangshwomnui to paolax ilaxle ikhato hünzome Kaitox Pangpwon hanpak ang chun chichangba maihu ibu langlax. 3 Chemtue hünzome ija Kaitox Pangpwon saxle changüihex, twonkhax awon zingkya ankhao taxsax, chemthüikoxle nyix-anüt mong ma hünzome an a twonkhax chiawon homle zingkya tix sax angkya changle. Hünzome ipongpong nonokhaile Ijip nok dantox pongma ngaxchu ile wüi mokpu. Iningkya an saxlax, ija ang sikngün an le nyaküi: ikoxtix hünzome hünzom mazi tanto hünzom Ijip nok angkya laile paokya nyix tamchu ija sikngün ashukle ngole hüikya haxtok chialaküi. 4 Nyix-anüt hanpak ang hünzom haxtok ma owamachu ma homkha ma twonkhax bang angkya oli münchang; ilaxle ija pangpwon asuikya ja langkya müi a ija jaja wüi komkaile saxtox angkya changle. 5-6 “Kaitox Pangpwon müibu a zangshwom angkya onui jongtakha ma langlax: ilaxle Jowanpa hünzom Zang-e hünzom ang koxkya haxtok ojongtochu taxlang. Ija a zanghan dütkya füi tomle hünzom Ijip nok angkya laile paokya tue moklax. 7 Müi a huakle atsanlaxle zangshwom angkya onui jongtakha ma saxlax, ilaxle ofüinop a hom to chatlax. 8 Chemthüikoxle ifüi nyix makhange hanpak nyix azok mong ma hünzome twonkhax chiawonle zingkya an-tix sax angkya changle, ilaxle nyix anüt lükya to a hünzom a Jowanpa hünzom Zang to shwom ang asoxüi, ikoxle ija nyix a owaechu mwot chimoküi. Saxcha-wünkya ( Lai 34.22 ; Liw 23.15-21 ) 9 “Hünzome saxziak tsaxtu ang sütkya makhange hatdang anüt akiaklax, 10 ifüima saxcha-wünle nuilax. Jowanpa hünzom Zang-e hünzom ang mohiman chemtukux koxpuix, ija ma thütle chix hato küntsu-monglua töbu apüile chix achuak-achenkya tüilax. 11 Jowanpa pomtho ma hünzome masu-masabu, dabu, Liwi hwom, püntüibu, zomnu hia khaxsabu, opangsa hünzom tingnu ma ngole tüipuix, hwom pangnusa füi tomle mongmüi-pwonlakya tüikox. Ija a zangshwom angkya onui jongtakha ma moklax. 12 Hünzome ibu kaxtombu kax ma laxle-ole thüilax; hünzom a Ijip nok to da ang ngole toxkya taxalak. Pomsa Pangpwon ( Liw 23.33-43 ) 13 “Hünzome hünzom tsaxnak tsuakkya hia grep-ti fyetkya tsuakkya füi tomle, hanpak nyix anüt laxle pomsa pangpwon nuikox. 14 Hünzom tingnubu ma hünzom füi ngole tüikya, su-sa hwom, dabu, Liwi hwom, püntüibu, zomnu-khaxsabu, ibu pangwüi selaxle ija pangpwon saxle mongmüilax. 15 Zangshwom angkya onui tuita ma nyix-anüt hanpak laxle ija pangpwon saxle nuikya füi Jowanpa hünzom Zang achuak-achenle changkox. Tüle pwonladongle mongmüikox, büthüikoxle Jowanpae hünzom manzai hia hünzom puamün to mohimandaoa. 16 “Zangshwom angkya onui tuita ma hünzom jat-li angkya khünaknu zanglao to othom azom pongma Jowanpa to shwom ang ngui angkya changpu: Kaitox Pangpwon ma, saxcha-wün ma, ilaxle pomsa pangpwon ma, khünak pangnusae ma hinghoho 17 tsuakkya apongle Jowanpae ma ang fakya mohiman ma thütle apüikox. Sukya Kaxfün füi Apün-awangkya 18 “Jowanpa hünzom Zang-e hünzom ang koxkya tingnubu ma kaxfün mixbu tamchu mama okax-okho hwom kamlax. Hwom khünaknu to masüi-mixlüikya chitüikya kaxfün fale apünüi. 19 Hwome kaxfün fapongma chisule tamchu süi-süi-chaple kaxfün chifaüi; ilaxle hwome zuizun chilaxüi, chemthüikoxle hingho chakzun makhange jetüi-hwonlangkya hia sukya khünakbu ang ngaxchu mik apwom ang tomle, ilaxle kaxfün othai fa angkya hato ahüile. 20 Othuithuima masüi-mixlüikya chitüile tüilax, ile changkox tix Jowanpa hünzom Zang-e hünzom ang fakya ngokya haxtok hünzome kopüi ilaxle ikhama hünzom jento ngo ang kopüi. 21 “Chemtue hünzome Jowanpa hünzom Zang ang tö-tsap zaile changüihex, ija zui ma baozangchanu Asherah mua pün chapa taxdan. 22 Ilaxle ija to shwom-to le chang ang tütali long küile taxchang, iningkyabu thua Jowanpa anule. |
Wancho Naga Bible - OTSAO BAIBEL
Copyright © 2012 by The Bible Society of India
Used by permission. All rights reserved worldwide.
Bible Society of India