TSAITONG-KAXTONG 14 - OTSAO BAIBEL (BSI)

Mangsop Abaxkya Olom

¹ “Hünzom a Jowanpa hünzom Zang khünaknu changpu. Idaile chemtue hünzom owawa zi-maxkya bama sop-jua pongma, ma to alüile zütle chichangüi chichangba khüjan ongle chiawütüi; ija ningkya a mixnokbue mokwüi.

² Hünzom a Jowanpa hünzom Zang kux changpu; hünzome chixe chaxwannu angkya khünak khama chix khünak ang kamle kopdaoa.

Tsaokya hia Chitsaokya Müibu

³ “Jowanpa chitsaokya oli changpule ngaidaokya oli tütachu taxsax.

⁴ Hünzome müi ibu a sax ang tsuak: maihu, chun, zwon,

⁵ müikhi, fao chun, fao zwon chichangba müijax:

⁶ Tüta ningkya müichu osok afile tüikyakya ilaxlechu osüt shaole asaxsax, ibu sax ang tsuak.

⁷ Ikoxlechu osok chiafikya hia osüt shaole chichangkya müi tütachu taxsax. Hünzome ut, juxnu-nalo chichangba juxzan, ibu chisaxüi. Ibu a chitsaokya ang laxüi; ibue osüt shaole saxle ikoxlechu osok afile müntüi.

⁸ Wak müichu taxsax. Ibu a chitsaokya ang laxüi; ibu ang osok afile ikoxlechu ibue osüt shaole münsax. Iningkyabu müi chemchu taxsax chichangba ibu müi omang to ngaxchu taxtwon

⁹ “Hünzome okuiza hia okhwonza tüikya nyax tüta ningkyachu sax ang tsuak,

¹⁰ ikoxle tima ngokya tütalichu okuiza hia okhwonza chitüikya nyax a sax angkya oli münchang, ibu a chitsaokya ang lax angkya changpu.

¹¹ “Nange tsaothakya fao-osa pangwüi müi sax ang tsuak.

^12-18 Ikoxlechu hünzom omüi chisax angkya fao-osabu a ibibi changle: ola, okhux, lawang, falkon; buzzard, okun, okha; ostris; ti-opak, olo-lonu, heron, pelikan, kormoran; hopoi; ilaxle opak-pakpe ibibi.

¹⁹ “Ozang füikya kuksa-waisabu a chitsaokya zünmokbu changle, ibu a taxsax.

²⁰ Tsaothakya zünmok pangwüi hünzome sax ang tsuak.

²¹ “Hwom zikzik to zikya müi chemchu taxsax. Hünzom füi tomle ngokya püntüibu ang ibu sax ang koxtsuak, chichangba ija owawa mama mixnok ang hangle koxtsuak. Ikoxle hünzom a Jowanpa hünzom Zang kux changle; hünzom a otsao khünakbu changle. “Honu tsomsiple ngokya chun hosa chichangba zwonsa taxhuak.

Bünfong Koxkya Wanlom

²² “Bünfong süile danlax: ija a zanglao to hünzom haxtok ma puamün wünkya pangwüi kha angkya changüi.

²³ Ifüima onui tuita, ojongkha, Jowanpa hünzom Zang-e chix to shwom angkya zünle koplax puix; ilaxle ikhato chix pomtho ma hünzom saxziak, grep-ti, olip-münga ilaxle owangpa ma puxkya maihu hia chun hosa, ibu bünfong saxlax. Jowanpa hünzom Zang jento achuak-achenle chang angkya awan ang hünzome ija moklax.

²⁴ Jowanpae mohimankya kha angkya bünfong apüi ang, Zang to shwom-to angkya nui tsailo towüi jangchang, ija ningle moklax:

²⁵ hünzom puamünbu ngun ang achang ang hanglax ilaxle Zang to shwom-to angkya onui to ngun ma apüilax.

²⁶ Hünzom monge atsutsu shaklax: maihu-müi, chun-müi grep-ti ibu ningkya: ilaxle ikhato Jowanpa hünzom Zang pomtho ma, hünzom tamchu hünzom haxnu-homsabue ibu saxle changkox ilaxle mongmüi-pwonlale changkox.

²⁷ “Hünzom tingnu ma tüile ngokya Liwi hwom taxalak; hwom ang ma tingtok le chemchu müntüi.

²⁸ Zanglao azok lükya zangpua oshuk chito hünzom haxtok ma manzai puamünle changkya bünfong apüilaxle hünzom tingnu angkya pung ma athünlax.

²⁹ Ija süt a Liwi hwom hanpak ang changüi, büthüikoxle hwom ang ma tingtok hexle chemchu müntüi ilaxle püntüi, zasa-khaxsa tamchu thanu hia zomnu chabu, opang hünzom tingnu ma ngole tüipuix, hwom hanpak angchu changpu. Hwom nguilaxle mae laxsese kop angkya changle. Hünzome ile moklax, ikoxle Jowanpa hünzom Zang-e hünzome amokmok pangwüi mohimanle changüi.