TSAITONG-KAXTONG 13 - OTSAO BAIBEL (BSI)

¹ “Aje tuita chichangba wünmang taipupae ohünotün chichangba khomtsikya kaxbu akax koxlax, ikoxlechu

² ija a amipongma chishwom-chitokya baozangbu to hünzome shwom-to tamchu ibu thothale naxchang ang ile suapu. Chixe akaxkya kaxbu changle ngaikoxchu,

³ chix zangwün to natha angkya oli münchang. Jowanpa hünzom Zang-e chix a hünzom to thwontsing ang, hünzome chix to mongpak-fünthole mongkünkya changchale awan ang twonwüi.

⁴ Jowanpa mantolax ilaxle chix achuak-achenle changlax; chix kax ma laxlax ilaxle chix kaxtombu thomlax; chix to shwom-to lax ilaxle chix to mongongle tüilax.

⁵ Ikoxlechu Jowanpa, owae hünzom Ijip nok to da ang ngokya khosünle apüipuix, chix zan to ka angkya zangwün alaikya khünak owawa wünmang taipa chichangba aje-ahing jangtüi, chix a mik max ang tomkox. Iningkya mix a haxshix changpu; ilaxle Jowanpae hünzom ang ozün ma ngo angkya kaxtom fale tüikya khüzün lomtang angkya othai to hünzom zunle pao angkya a chix mwot chang koxpu. Chix a langle awüt angkya wüi changpu; ikoxtix hünzom a ija haxshix chak tokya azangle ngo ang thoüi.

⁶ “Hünzome tamchu hünzom putong hwome otuechu shwom-to le chichangkya mama baozangbu to shwom angkya hanpakma huxsa ma zuile hüntüi-hünnao hwom, hünsu-hünsa hwom, hünzome mongkünkya kakobu, hünzom üipa-zuikhui, ibue hünzom jikle pao ang tsuak.

⁷ Ibu kha angkya tütapue hünzom zui ma ngokya khünakbue shwomkya baozangbu to chichangba tsailo tokya baozangbu to shwom angkya zong adünle chang ang tsuak.

⁸ Ikoxlechu chix ang nang jikle lax ang taxtom; chix kax to najao taxtha. Chix hato chingcha-jaja aho angkya oli jao münchang ilaxle chix kho-awale taxchang.

⁹ Hwom langle awütkox! Hwom to longfüi thup angkya owang lükya mix ang nang changkox, ilaxle pangnusae wüi azuile thup ang tomkox.

¹⁰ Hwom a longfüi thuple langdao! Hünzom Ijip nok to da ang ngokya khosünle apüikya Jowanpa hünzom Zang füi atsaile hünzom pao ang azongkya mix hwom changpu!

¹¹ Ifüima chempangle changpuix ija bama Israel khünak noknue atat ang kopüi; hwom chazale changüi ilaxle iningkya haxshix mwot owaechu chimoküi.

¹² “Chemtue hünzom a Jowanpa hünzom Zang-e hünzom ang koxkya tingnubu ma ngole changüihex, hünzome atat ang tsuaküi,

¹³ züizüi chilaxli khünak hünzom nok kha angkyabue wüi ija tingnu ma ngokya khünakbu, hünzome otuechu shwom-to le machangkya baozangbu to shwom ang jikle paodaoa ta, lea.

¹⁴ Iningkya khualop zangwün hünzome jangatat, ija otong tikle lomkox; ilaxle iningkya ochax mwot chimokkya khato khualople zangwün atsatkya changpule awan ang kopkya zuma,

¹⁵ ija tingnu ma khünaknu pangwüi, hwom tsom-pom chuwüi tomle langle awütdaoa. Ija tingnu a komkaile amütdao.

¹⁶ Ikhama ngokya khünaknu tuina komkaile afoxlaxle tingtan mong ma athünkox. Ilaxle Jowanpa hünzom Zang ang tuita tö koxkya ningle, ija tingnu tamchu ima atüitüi komkaile zokle ashundao. Ija a tamchatle zingkya chitüile othuithui hanpak ang thom-mwonle naxngo.

¹⁷ Olithule amüt angkya othuak-ozom ma womdaokya tuina ma hanpak ang tütalichu taxtüi, ile changkox tix Jowanpae chix mongtsik mongma tokya mongchat laxle hünzom hato chingcha ahoüi. Chixe hünzom to chingchaüi ilaxle hünzom a tüle pu-tsakya khünaknu ang achangüi, ija a chixe hünzom putong hwom tsaosaxdaokya ningle changüi.

¹⁸ Anyix kue hünzom ang fakya kaxtombu kax ma laxle jangtüi thüiningle, chixe ibu pangwüi ile chang ang tomüi.