TSAITONG-KAXTONG 12 - OTSAO BAIBEL (BSI)

Zangshwom angkya Onüi Tuita

¹ Jowanpa, hünzom putong hwom Zang-e hünzom ang koxkya wanlom ibibi changle. Ibu kax to nathalax!

² Hünzome lax angkya haxtok ma, ikha tokya khünakbue hwom baozangbu to shokya onui haxnu ma tüikyabu, haxkho ma tüikyabu tamchu pün ohing tong ma tüikyabu, ibu pangwüi pünle amadao.

³ Ibu tö-tsapbu pündao ilaxle otsao longlo le küile thomkyabu pangwüi thuple akhixdao. Baozangchanu Asherah mua zokle ashundao ilaxle hwom chapabu dakle anguak dao, ikhato ibu to tamchatle chishwom angkya hanpakma olithule amütdao.

⁴ Jowanpa hünzom Zang a ibu khünakbue hwom baozangbu to shwomkya lailaile taxshwom.

⁵ Hünzom haxtok pangnu khama, ikhato pangwüi nguilaxle chix shwom angkya hanpakma Zang-e onui tuita zünle kopüi.

⁶ Ikhama hünzom zokle ashunkya hünzom töbu tamchu mama töbu chuwüi koxüi, ibu a hünzom bünfong hia hünzom töbu, chempang hingho hünzom Jowanpa ang koxüile tsaolaxpuix, küntsu-monglua to koxkya töbu tamchu hünzom osu-maihu hia chunbu khama owangpa ma puxkyabu, ibibi.

⁷ Jowanpa Hünzom Zang, owae hünzom to mohimanpuix, ikhato hünzom tamchu hünzom haxnu-homsabue mae mokle alaikya sütmüi-lingma saxlaxle mongmüi-pwonlale ngoüi.

⁸ Chemtue ija hanpak nguile hüipuix, izuma hünzome mokle ngokya ningle taxmok. Athax kople hünzome ma mongtextex to shwom-to le hüipu,

⁹ chemthüikoxle hünzom tumüi-lomkhaole mongsom ma ngo angkya kha haxtok oja Jowanpa hünzom Zang-e hünzom ang koxle ngopuix, hünzom a athax kople ija haxtok to mangui.

¹⁰ Chemtue hünzome Jordan shuanu tale changüi hex, Jowanpae hünzom ang ija haxtok koplaxle ikhato ngo ang tomüi. Chixe hünzom ochax-ozan pangwüi chak tokya khosünle thomüi, ilaxle hünzom a künsom-mongsom ma ngo ang kopüi.

¹¹ Jowanpae chix to shwom angkya onui tuita wüi zünüi, ilaxle hünzome ang kue kaxtom fale changdaokya ningle, hünzom töbu pangwüi ikhato apüi angkya changpu; zokle ashunkya tö, müi langle tö koxkyabu, hünzom bünfong ilaxle hünzom chak angkya tö ilaxle hünzome Jowanpa ang koxüihex-ole tsaosaxdaokya mama hinghobu pangwüi apüi angkya changpu.

¹² Ekha chix ngwotnui ma mongmüilax, hünzom naosombu, dabu ilaxle hünzom tingnu ma tüikya Liwi hwom pangnusa füi wonmüi-samale changlax; Liwi hwom ang haxtok süntswon müntüi, ija ajangle koplax.

¹³ Hünzome hünzom töbu mamong atsutsu khato kox angkya le münchang;

¹⁴ Jowanpae, hünzom tütapu homjen haxtok ma wüi changlax, onui tuita zünle kopüi ilaxle hünzome ikhama hünzom töbu apüile kox angkya changpu; hünzom zokle ashunle tö kox angkya tamchu kue fakya kaxtombu kax ma laxle mok angkya ikha tix changpu.

¹⁵ Ikoxlechu hünzome ma angongo to müilangle sax angkya a ma mongmong. Jowanpae chemtukux fapuix itukuxle hünzome sax ang tsuak. Hünzom pangwüi, zanglom ma tsaokya chitsaokya chisüile müikhi chichangba müijax müi sax ang tsuakkya lailaile, pangnusa wüi sax ang tsuak.

¹⁶ Ikoxlechu ibu aji hünzome süt ang chilaxüi; hünzome ija ti thokle awütkya ningle haxkha to thokle awüt angkya changle.

¹⁷ Hünzome Jowanpa ang koxkya oli chemchu hünzom ngwotnui to sax angkya oli münchang; hünzome tö ang koxkya saxziak, grepti-ju, olip-münga ilaxle pongwang ma puxkya osu-maihu hia chun hosabu chemchu ilaxle hünzome Jowanpa ang tsaosaxlaxle koxkya hingho, hünzome ma küntsu-monglua to koxkya tö ilaxle mama tö chemchu ma hom ma sax ang müntho.

¹⁸ Hünzome tamchu hünzom naosombue, hünzom dabu hia hünzom tingnu ma ngokya Liwi hwom chuwüi womle, ibu tö a, Jowanpa hünzom Zang-e chix to shwom-to ang zünle kopkya onui tuita, ojongkha ma chix ngole tüipuix, ikhama sax ang tsuak. Ilaxle, ikhama hünzome chempang mokpuix ibu füi hünzom ang mongmüi angkya oli changpu.

¹⁹ Hulax, hünzome hünzom haxtok ma ngokya kople Liwi hwom otuechu taxalak.

²⁰ “Chemtue chixe tsaodaokya ningle, Jowanpa hünzom Zang-e hünzom haxtok achenle faüihex, hünzome müi saxse atsutsu ma tüta khato hex sax ang tsuak.

²¹ Zangshwomnui jongtakha tsailo to jangtüi, nang mong tsupupu ma, Jowanpae hünzom ang koxkya osu-maihu chichangba chunbu tütahex langlaxle, kue hünzom hama akax daokya lailaile, ibu omüi a hünzome ma hom to chu saxtsuak.

²² Hünzome müikhi hia müijax müi sax ang tsuakkya ningle, zanglom ma tsaole asukya hia chitsaokya pangnusae wüi ija ningkya müi a sax ang tsuak.

²³ Ikoxle ija müi ma aji tüingale wüi taxsax, chemthüikoxle khüzün a aji ma tüile ngole, idaile hünzome khüzün a omüi füi tomle chisaxüi.

²⁴ Aji a süt ang taxsax, itülüi ija a ti thokkya ningle haxkha to thokle awütdao.

²⁵ Hünzome ija kaxtom kax ma laxle jangtüi thüiningle, Jowanpa ang mongmüikya tüiüi, ilaxle hünzom hia hünzom su-sabu pangwüi kuimüi zangmale ngoüi.

²⁶ Ikhato Jowanpa ngwotnui angkya tö-tsap ma zokle ashunle töbu laxkox. Hünzome omüi saxüi ilaxle aji a tö-tsap ma sakle chang angkya töbu chu apüile laxkox.

²⁷ Jowanpa tö-tsap ikhama komkaile zokle ashunkya töbu laxkox. Ilaxle hünzome omüi saxkya töbu chuwüi laxkox ilaxle ibu aji tö-tsap ma thokkox.

²⁸ Kue chempang kaxtom fale changdaopuix ibu pangwüi kax ma laxle tüilax, ikoxle othuithuima hünzom hia hünzom su-sabu kuimüi-zangmale ngo ang kopüi, chemthüikoxle hünzome Jowanpa hünzom Zang zongto müikyakya hia sukyakya mokle ngo angkya changle.

Chapabu to Shwomkya bama Kaxkhün

²⁹ “Hünzome tingtakle hüikya zuma Jowanpae mixjat-mixlibu komle amütüi, ilaxle hünzome ibu haxtok lax üntoxle tingtan-nokzingle ngoüi.

³⁰ Jowanpae ibu mixjat-mixlibu amütle changkya füima hulax, hünzome ibu zanglom chitwon angkya bama khünzailax, chemthüikoxle ile changkya a thama chongkya ang changüi. Ibue hwom baozangbu to chemle shwompuix, ija awanle kop ang taxazongzi, ile chang koxle hünzomechu hwom lailaile shwomsele tsuüi.

³¹ Jowanpa hünzom Zang to hünzome ibu noke hwom baozangbu to shwomkya lailaile taxshwom, chemthüikoxle ibue hwom baozangbu to shwomle changpongma Jowanpa ang nushix dongkya olom pangwüi twonle. Hwome hwom tö-tsap angkya wün ma masu-masabu ngaxchu tö ang koxle zokle ashunle.

³² “Kue hünzom ang kaxtom fapupu pangwüi moklax; ija to janbo taxtüi chichangba ijakha angkya oli tuita chu awütle taxchang.