TSAITONG-KAXTONG 1 - OTSAO BAIBEL (BSI)

Kaxpongwang

¹ Ija laipex a Mosa-e Israel khünaknu füi, hwom Jordan shuanu zongma handünchi faokha to ngopongma akaxkya kaxbu changpu. Hwom a Jordan haxsha angkya Suf zui ma, kaochima Paran tingnu ilaxle tüchikao ma Tofel, Laban, Hazeroth, ilaxle Dizahab a kaochima. (

² Haxhua nok Edom lomnu makhange lele Sinai Haxnu alop ang nyixbün ata lax.)

³ Hwome Ijip nok dantox füima zanglao punyi to lyetbün-ata lükya owang nyixkha, Jowanpae chix ang akaxle koxkyakya kaxtom pangwüi Mosa-e khünaknu hama wün.

⁴ Ija a, Jowanpae Amor nok wanghompa Sihon, owae Heshbon tingnu ma apünle tüikya hex, tamchu Bashan nok wanghompa Og, owae Ashtaroth hia Edrüi tingnu anyi ma apünle tüikya hex, hokhi to anaokya füima changkya.

⁵ Ija a khünaknu Jordan shuanu zongma handünchi kao Moab chaxwan to tüipongma Mosa-e Zang wanlombu hia hwon-nwotbu bama akhixle wünle fakya kax. Chixe thüi:

⁶ “Chemtue kem Sinai Haxnu ma tüikya hex, Jowanpa kem Zang-e kem füi akax, ‘Hünzom ija Haxnu ma okuilo lüwüi ngodaoa.

⁷ Pombu pünlax ilaxle achexlax. Amor nok haxnu to paolax ilaxle hozui ma akhople tüikya pangnu haxtok to: Jordan haxsha to, haxhua chito, ilaxle haxchithong chito, shuathongchi chaxwan to, ilaxle Mediterenian tinu kax to paolax. Kanan haxtok to paokox tamchu Lebanon haxnu tokna kai tokya Eufrat shuanu alople paokox.

⁸ Haxtok ibu pangwüi kue hünzom putong Abraham, Isak hia Jakop hwom ang owüiole koxkya chaxwan changpu. Paolax ilaxle ija haxtok amle koplax.’”

Mosa-e Kaxfün Mixbu Kam

⁹ Mosa-e khünaknu ang thüi: “Chemtue kem Sinai Haxnu ma tüikya hex, ipongma kue hünzom ang thüipu, ‘Hünzom lom azüi angkya hünlit a ku zongto huanu changpu. Kue ija ku tatae müntho.

¹⁰ Jowanpa hünzom Zang-e hünzom ding angkya lyettsi büta tsa ang tompu.

¹¹ Jowanpa, hünzom putong hwom Zang-e, chixe tsaodaokya ningle, hünzom othom hajate nüile jao pu-tsale chang ang tomkox, ilaxle hünzom ahak-achakle chang ang tomkox!

¹² Ikoxle ku tatae hünzom bibi nuazingle kaxfün fa angkya chemle tsuaküi?

¹³ Homjen foto, jetüi-hwonlangle tüikya, awan-atsingle tüikya hia jali thwonlople tüidaokyabu züizüi kamlax, ilaxle kue hwom a hünzom lompabu ang zingfang.’

¹⁴ Ilaxle ija ile chang angkya a müikya olom tuita changpule hünzome hox-jo thüihüi.

¹⁵ Idaile hünzome ma homjen angkya zünle kopkya jetüi-hwonlangle tüikya hia jali othwon lople tüikya khünakbu kue laxpu, ilaxle kue hwom hünzom thakma lompabu ang achangpu. Züizüie hajat khünak tu ma lompa ang changüi, züizüi a oho tu ma lompa ang changüi, ilaxle züizüi a bün tu ma lompa ang changüi. Kue homjen foto mama okax-okhobu chuwüi kampu.

¹⁶ “Ipongma kue hwom ang adangle fapu, ‘Khünaknu khama atsi-alale changkya to hulax. Tütali bama atin-apale changkyachu otyatya kaxfün fale wüntsuakkox; ija zangwün ma hünzom zongto mamix owawa wüi changlax tamchu hünzom khato ngole hüikya mixnoksün chuwüi tüitüilax.

¹⁷ Nang kaxfün ma süi-chapkya taxtüi; pangwüi ang kaxfün otyatya wüi laxkox, chix tütapu wüi changle ngolax. Owa thuachu taxza, chemthüikoxle nang kaxfün a Jowanpa tokhange hüikya changle. Tütali zangwün nang zongto sütsakle jangchang, ija zangwün ku hato apüihüi, ija kue tsuakle faüi.’

¹⁸ Ifüi tomle kue hünzome mok angkya pangnuli hanpakma adangle fapu.

Kadesh Barnia tokhange Zyetmixbu Apao

¹⁹ “Kwome kem Jowanpae kwom ang kaxtom fakyakya mokpu. Keme Sinai Haxnu dantoxlaxle tüpong chongkya tamchu za-adünkya sak-hax, Amor nok haxhua chito lepu. Chemtue keme Kadesh Barnia aloppuix,

^20-21 kue thüipu, ‘Athax hünzom a Amor nok haxhua to nguidaoa. Ikha a, Jowanpa, kem putong hwom Zang-e, kem ang koxle ngokya haxtok changpu. Paolax ilaxle chix kaxtom lailaile ochujongkha amle koplax. Mongao taxtüi chichangba taxza.’

²² “Ikoxlechu hünzom ku hato hüilaxle thüipu, ‘Kwom nguiüi thoma achale ija haxtok zyet ang khünak akat-hax, ikoxtix hwom makhange keme sümüikya lomkua hia ikha tokya tingnu bama opaktik ang tsuaküi.’

²³ “Ija a müikya olom wüi changpule ngün üntoxle kue mixhuak bün anyi, homjen foto mixsün tuipong zünpu.

²⁴ Hwom a haxhua nok Eshkol alople pao ilaxle ija haxtok to zyetle hu.

²⁵ Ibue ikhato hwom thoma bangkya pünziak apüi, ilaxle Jowanpae kem ang koxle ngokya haxtok a tüle haxzao füikya haxtok changle le kaxwün wangpu.

²⁶ “Ikoxlechu hünzome Jowanpa, hünzom Zang kaxtom füi alünle ajong, ikhoma hünzom ija haxtok to chinguitsuak angkya hato hüi.

²⁷ Hünzome tata füi mu ang süt: ‘Jowanpae kem to miktsakle. Chixe kem Ijip nok tokya alaile apüikya a Amor nok chak to koxlaxle, hwome kem langle naxawüt ang suawüi.

²⁸ Kem ikhato chemto pao angkya? Kem zapu. Keme zyet ang apaokya khünakbue, ikha tokya khünakbu a kem füi huanuma tsak-zongle tüile tamchu hwom a zangkho alople long katuk swonlaxle ziakople tüikya tingnubu ma ngole le thüile. Hwome ikhato mixtsak-naomüibu ngün ang kopkya mo wünle!’

²⁹ “Ikoxlechu kue thüipu, ‘Ibu thua taxza.

³⁰ Jowanpa, hünzom Zang-e lom azuiüi. Ijip nok to hünzome ngünle hüidaokya ningle hünzom hanpakma chix azanüi. Chixe iningle mokkya hünzome Ijip nok to ngünle hüidaoa

³¹ ilaxle sak-hax faokha tochu ngündaoa. Chixe hünzom lomjang fole ikha alople chemle khosünle apüipuix, ija hünzome ngün ang kopdaoa, hopa tuitae chix sasün tuita chemle koplax toxpuix ija jaojao lea.’

³² Kue ibu akaxkoxle chuwüi hünzome Jowanpa to ojao chiong;

³³ hünzom thoma thongnui lomle bang ang ngaxchu Jowanpa, chix wüi thoma achale bangpu. Hünzom ang lom aho ang hünzom thothoma, zangnak ma thongnu lailaikya wün ma ilaxle anyixningkya zangngai ma thong lailaikya zangfwom ma chix ahampu.

Jowanpa e Israel Khünaknu to Sikangün

³⁴ “Hünzom kaxthup-ngaotün atatlaxle Jowanpa ang mongtsik ilaxle chixe ile takdün,

³⁵ ‘Kue hünzom putong hwom ang koxüihex-ole tsaokya chaxwan, haxzao füikya haxtok to ija tsünthom angkya opupuchu ngui ang müntom.

³⁶ Jefuneh sasün Kaleb tatae tix alop ang thoüi. Chixe ku to mongong thompu, ikhoma kue chix ang tamchu chixsu chixsa hwom ang chixe zyetle hutoxdaokya haxtok koxüi.’

³⁷ Hünzom khoma hexle Jowanpa ku füi ngaxchu mongma laxle akaxle, ‘Mosa, nang ngaxchu ija haxtok to ngui ang müntho.

³⁸ Ikoxle nang to fongmix Nun sasün Jihusua mong achen ang thüikox. Chixe tix ija haxtok amle lax ang chixe tix Israel nok lom azüi angkya changle.’

³⁹ “Ifüima Jowanpae kem pangfüi wüi akax, ‘Hünzom naosombu, opang athaxchu sukya hia chisukya awanle matsong hex, hwom a ija haxtok to nguiüi: hünzome akaxkya naosombu a hünzom zanpabue kopüi. Kue haxtok hwom ang koxüi, ilaxle hwome ija hwom chak ma kopüi.

⁴⁰ Ikoxlechu hünzom ibibi khünaknu a, anguile Tütsak Tinu Agaba alople sak-hax lomnu fole chatlax.’

⁴¹ “Hünzome lanpu, ‘Mosa, kwome Jowanpa zongto ochax lyendaoa. Ikoxle athax kwome, Jowanpae kaxtom fakya ningle kwom zanbu füi azanüi.’ Ifüima hünzom pangwüi zan to ka ang achwonpu. Hünzome haxhua nok to ochwon ma lüt ang thoüile thüt.

⁴² “Ikoxlechu Jowanpae ku ang thüi: ‘Zan to chising angkya hanpakma hwom ang kaxkhün laxkox, chemthüikoxle ku a hwom füi tomle müntüiüi, ilaxle zan-nokbue hwom to lütüi.’

⁴³ Jowanpae akaxkya kax kue hünzom hama wünpu ikoxle hünzome ojao na chitha. Chix füi alünle hünzom ajongpu, ilaxle hünzom mongngam füi haxhua nok to tingtak ang dongpu.

⁴⁴ Ifüima ibu haxhua to ngokya Amor nok naxnu-naxlang lailaile ozyem makhange hünzom füi azan ang laipu. Hwome hünzom Horamah alople achua laxle hwome Edon angkya haxhua nok ma hünzom to anaopu.

⁴⁵ Ikhoma hünzom to fong angkya hanpakma Jowanpa sele hünzom akhongpu, ikoxlechu chixe hünzom chito na ojao chitha chichangba hünzom to mong ojao chikox.

Sak-hax to Akaikya Zanglaobu

⁴⁶ “Ikhoma, kem Kadesh ma okuilole athongle ngo füima,