TSAITAX-NGAONÜI 7 - OTSAO BAIBEL (BSI)

Mixsün

¹ Nang a tuita ohünotün naocha jao changpu! Chisoxbu soxle changpongma nang jasabu chemkuxma müipuix. Nang jasa ning jungwüi jung zingpabu chakzing lailaile.

² Ojao chiahuale grepti-ju füi ngokya, khup tuita ikhama tüile. Wonglai tsaxthop tuita ikhama tüile, lili maipuabue akhop-khakle.

³ Nang tsom-sax ning khisa jaojaole, tomle puxkya müikhisa nyi ningle.

⁴ Nang dingtong ning luakzong katuk-kho lailai. Nang mikbu a Heshbon tingnu angkya tüküibu ningle; ija chongkya tingnu pan zui ma tüikya tüküibu a. Nang nakuasa ning Lebanon zanhunui katuk-kho lailai mongkünkaile, oja Damaska ziakop ang ajongle tüipuix.

⁵ Nang khang a Karmel Haxnukho lailaile nwonle thom. Nang kho a nak wüi nakle satin jaknyi ningle ashaile ju; ija sünmüi to wanghom tuita ngaxchu jikle lax ang tsuak.

⁶ Nang a mongkünkaile, osünsachu chemkuxma müi; nang mongkün ma mongmüi okhonguikya tüile.

⁷ Pam pün tuita tsuakya ningle nang a chingchae awangle tüi, nang tsom-sax a pünziak ningle atswon wüi atswonle.

⁸ Ija pam pünnu kho to ku ngaüi ilaxle kue ija oziak khaiüi. Ku zongto nang tsom-sax a grep tuabu lailai, nang zakdün a apel sung ma sung,

⁹ ilaxle nang wikha a müikya grepti-ju lailai. Ifüima grepti-ju a küithole ku mowünpa hato jenle ju ang laxkox, chix tunpün-leza to jenle jule a.

Mixcha

¹⁰ Ku a ku mowünpa kux changle, chixe ku to mikzalole.

¹¹ Oman, ashem, künyipi tingtui-panja chito laile paohax ilaxle tingkhuabu to zangnak akaihax.

¹² Swomsae kaiwüi zolaxle grep zubu to huhax ibu matsong hia tsongünpuix, osok chichao-chao-ünpuix ilaxle pomegrenet pünbu puadaima hex. Ekhato kue nang ang ku mongkün koxüi.

¹³ Nange mendrek ongan atum ang tsuaküi ilaxle mongzom müikya pünziakbu pangwüi künyi fülom ma tüile. Ashem, kue nang hanpakma nange laxse khütkya ozang hia hozün pangnyi thomle.