TSAITAX-NGAONÜI 5 - OTSAO BAIBEL (BSI)

Mixsün

¹ Ku a ku tsawat khato nopdaoa, ku mongkün, ku tuinu. Kue ku jingso hia otex-tsyapi athünle ngopu; kue ku nax-ti hia naxzop saxle ngopu; kue ku grepti-ju hia tsomti lingle ngopu. Saxlax, mongkün hwom, ilaxle linglax Hünzom to mongkün füi matok-matokle!

Mixcha Ali-lükya Tsai

² Chemtue ku jippuix, ku ang mong azangle ngo. Ku mongküne kahak to hongpuixta le wünmang chito ngün. Ku nop ang koxhüi, ku ashem, ku mongkün, ku suosa. Ku khang a nyenti füi shanle tüile, ilaxle ku kho a zangfwom ti füi shanle tüile.

Mixsün Mixcha

³ Kue nyi-za komle sikdaoa; kue nyi-za chatle omalax ang laxngo angkya? Kue ku cha sodaoa; kue ibu omalax ang anaküi?

⁴ Ku mongküne kahak to chix chak füi twon, ilaxle chix owüiole soxünpia le ku mong anyemle tox.

⁵ Ku a chix nop ang tom ang achwonle tüikya. Ku chakbu a jingso füi chwoplaxle tüikya, ku chakkhibu a jingso tibu füi shanle tüikya, kue kapatja to twonle changpongma.

⁶ Kue ku mongkün hanpakma ka daple kox, ikoxle chix a chatünle bang. Kue chix zangwünsa atat-sele chemtukux anoppuix! Kue chix lomle huno, ikoxle chix a chiataktsuak; kue chix nyak, ikoxle chix chitsa.

⁷ Tingnu nyetmixbu ahamkyae ku ngünle lax; hwome ku to hongle nutle tox; tingnu pan nye ang ngokyabue ku khüsün ama.

⁸ Jerusalem angkya shekobu, tsaotsüt-hu, hünzome ku mowünpa jangngünba, hünzome chix hama, chix sung chix zaokyae ku ashole maxngokya chix hama wünüihex-ole.

Shekobu

⁹ Sheko khama sünmüicha, nang mowünpa a mamabu füi chixlili le hia? Kwome nang füi tsaotsütle chang angkya chix bama abüt angkya chem tüi?

Mixcha

¹⁰ Ku mowünpa a sünmüi tamchu mixtsak-naomüi changle; chix a hajat bün khama ataxkya tuita.

¹¹ Chix thünza a khop-jan ningle nün wüi nün; chix kho a sham-tü-sham, okha mun lailaile nakjeple.

¹² Chix mik-hu-chakzam a longja shuasa zuito suosabu ningle, tsomti füi khuipa-jatjo laxle longja shuasa zui ma ajongle tüikya suosabu ningle nowüi naile müi.

¹³ Chix bwomzongsa a suihing laihinge awang laxle tüikya tuita tsawat kha ningle mongkünkaile. Chix tunpünsa a lili maipuasabu ningle, jingso ti füi ashan laxle tüi.

¹⁴ Chix chakbu a haxmüi-zangmale, ilaxle chixe thalix long füi zingkya khoptütbu lang. Chix tsawan a luakzong ta ningle nün wüi nün, thalix long safir apüt laxle.

¹⁵ Chix weho a, hun tiktün ma atuak laxle tüikya long-suk pe kax ningle müi. Chix a Lebanon Haxnubu ma, katuk ningle sedar pünbue tuklax tüikya ningle, chongwang sündün ma dong.

¹⁶ Chix wikha füi tun apongkya tiwüi ti; chix ma tüipu pangnusae ku ang mong amüi. Ku mowünpa a ija ningle tüile, Jerusalem angkya sheko hom.