TSAITAX-NGAONÜI 2 - OTSAO BAIBEL (BSI)

¹ Ku a Sharon ma puakya fao maipuasa, haxnucha ma puakya lili maipua.

Mixsün

² Hux tham khato lilisa ningle chamüinu hwom tham to ku mowünnu.

Mixcha

³ Faonu mongto pün khama apel pünbu ningle, chamüinu hwom tu ma ku mowünnu. Ija zangkhung ma ku lüise tsule, nang ziak-jum chu ku tunza ma ti ang.

⁴ Chixe ku ma fongkhat nui to apüi ilaxle chix mongkün nyiluak ku khangkho ma adün.

⁵ Ku tsak-zongle chang ang tomfa, fupsa ziak ozanbu füi a ilaxle ku kodong handong ang tomfa apel jumbu füi a! Mongkün zaoe wokno jalan maxün tong.

⁶ Chix nongchi chak ma ku ngom ate, chix tsaxchi chak füi ku tsawan to jwom.

⁷ Tsaohu, hünzom Jerusalem angkya chamüi hwome; oham tsuakkya müikhisa mün lünlaxle, kukhi mongkün sha to münpoxpu le.

Anyi-lükya Tsai Mixcha

⁸ Kue mowünpa zing atatle. Haxnukhobu akaile chix zikle nguingole, haxhuabu akaile ku ha alop ang a.

⁹ Ku mowünpa khisa-zongmüi lailaile müi, tamchu tuita müijaxsa ningle. Ekhato chix katuk tokna ma ajong. Chixe thangmik makhange awile hu tamchu kamik makhange khinle hu.

¹⁰ Ku mowünpae ku füi zangwün. Jangchangthüiba ku mongkün zui; ashem nang a ku füito oman.

Mixsün

¹¹ Zangwanu a ledaoa; zangwat chu thwondaoa;

¹² maipuabu aputle pua ngole tingtui-panja to. Ija a maibua angkya hanpak changle; zang kotho to suonu jua atatle.

¹³ Fupsabu jum ang sütle; zangwinsa to grep-pua sumle hüile. Athaxpi oman, ku mongkün; ku ashem, ku füito oman.

¹⁴ Nang a longnu kangkya nuk to azwonle ngokya osu ningle. Nang sünmüisa kue ngün ang tomhüi; dingmüi-zakmale ngaokya ding-zak kue atat ang tomhüi.

¹⁵ Hijanbu kop-hüi, hijan hosabu a, ibue kem grep pua amale changüi thoma.

Mixcha

¹⁶ Ku mongkün a ku kux, ku a chix kux. Chixe chix chunbu lili maipua tham to tux

¹⁷ swomsa zangwine majep-majeple tamchu zangnak paole machang machangle. Khisa-zongmüi ningle chat-hüi, nang ku mongkün sha, Bethar haxnubu ma tüikya müijaxsabu ningle.