TITA 2 - OTSAO BAIBEL (BSI)

Tsaothakya Lai Kax Otong

¹ Tsaothakya Lai kax otong füi chem motomle tüipuix, hünzome ija anwot-ano angkya changle.

² Azupabu bama, toknga le chitüi angkya, künli-montang angkya, tamchu ma alüile akumathum angkya; hwom mongong ma, mongkün ma, tamchu thuakjok ma tsaotha le tüi angkya adangle laxkox.

³ Azunubu hama, otsao tsün ngokya mixnu tuita chemle ngose hex ile ngo angkya adangle laxkox. Hwom a khualop cha tamchu ju danubu ang chingoüi.

⁴ Hwome, oja müipuix ija tix anwot-ano angkya changle, imakhange tix hwome ma kakopa tamchu naosom to kak-kün angkya ilaxlechu ma kakopa fangto puile müikya kakonu tuita ang achang angkya,

⁵ ibu hanpakma nüchabu zün angkya changle, ikoxletix Zang tokhange hüikya kaxho bama owaechu achaxle zang münwünüi.

⁶ Ilailaile tsünzünbu angchu ma akumathum le tüi angkya kaxkhün laxkox.

⁷ Pangnu lom ma wüi nang a müikya zanglom saikha müile ahokya olom tuita ang chang angkya changpu. Nang hwon-nwot bama mongkoxkya tamchu khünzukya tüilax.

⁸ Wün chihai angkya tsaothakya kax zexkox, ikoxle tix kem bama mowün ama le zangwün angkya olom chiatak koxle nang zanbue thünzak kopüi.

⁹ Dabue ma tsün hopunubu chak to koxle puinai angkya ilaxle pangnu lom ma hwom mong amüi angkya changle. Hwom kax to kaxnong chifaüi chichangba ahux-chakchuxle chichangüi.

¹⁰ Itülüi, hwome hwom a othuithuima müile tamchu mongongle tüipule aho angkya changle, tamchu hwome mokkya pangnu lom ma khosünpa kem Zang bama anwot-anokya ang münchong apüikya lima ija ile moküi.

¹¹ Chemthüikoxle khünaknüsa khosün hanpak ang Zange chix chingcha ngaile ahodaoa.

¹² Ija chingchae kem ang Zang chiwom homle ngokya tsün dantox angkya, chaxwannu osing nüfux tsün dantox angkya ilaxle ija chaxwannu ma ma akumathum le, sule, tamchu Zang womkya tsün ngo angkya adangle fale.

¹³ Zang kem Khosünpa Jisu Khrista nguikya nyix chix fuazang angkya to monghom füi ija mohimankya nyix tanle ngotanto keme ile chang angkya changle.

¹⁴ Müikya mwot mok ang tsuakkyabu kem opang chix kux ang ngopuix, ibu chisumüikya pangnu olom tokya azün laxle tsaotha le achang ang, chixe ma alüile kem hanpakma kox.

¹⁵ Hünzom kax to apakyabu zong adün pongma tamchu hwom to sa pongma ibu anwot-ano ilaxle hünzom apün-adakya komkaile twonkox.