TITA 1 - OTSAO BAIBEL (BSI)

¹ Zang da tamchu Khrista wangshem Pol tokhange: Zange zün le kopkya khünaknu to fong ang ilaxle oshuk chitüikya khosün monghom chifün ang laxlaxle ngokya kem zanglome anwot-anokya otsingtsing hato hwom zun le apüi ang ku zün le koplax le tsanle apaokya changpu.

² Hanpak zanghan thoto wüi, thai angkya jao chichangkya Zange kem ang ija tsün khüzün fa angkya tsaole,

³ ilaxle hanpak thütkhak le tüipongkhae chix kaxho makhange chixe ija ngaile ahole. Ija ku chak to koxle tox, ilaxle Zang kem khosünpa kaxtom makhange kue ija apukpu.

⁴ Oja tomkux mongong ma kusa tsingtsing hex, Tita, chix hato kue ija lai zapu. Hopa Zang hia kem khosünpa Khrista Jisu-e nang ang chingcha mongsom naxfa.

Krata ma Tita Mwot

⁵ Mokse mwot athut athuile zing angkya ilaxle ting-hax pangkha towüi müimüithom lompabu zün angkya naxmok lax angle kue nang Krata to danle toxpu. Adangle fakya ku zünkax-saikaxbu mong ma koplax:

⁶ Lompa tuita ma ofwot chitüi angkya oli; chix ang kakonu tuita wüi tüi angkya oli, chix naosombu a zongzanle tamchu kax ma chilaxle tüikya mowün oma chitüi homle mongong khünak changkoxle müiüi.

⁷ Ile müimüithom lompa tuita a Zang mwot mok angkya ajepa tuita changkya daile, chix a ofwot chizaile changkoxle müiüi. Chix a makax kax ma wüi laxhüi le chichangba amuaküsa to mongtsik dongkya mix chichangüi, chichangba jutok saxngakya mix, hyetlom mix, ngun to asingkya mix, iningkyabu chichangüi.

⁸ Chix a mix wünpwon mankya hia chem müipuix ija to künkya mix chang angkya oli. Chixe ma alüile akumathum angkya, otang ma ajangkya mix, tsaokya mix tamchu zanglom saikha müikya khünak changkoxle müiüi.

⁹ Lai kax otong füi notomkya mongong tangkya kaxho to chixe mongle kop angkya changle. Iningle chixe otsingtsing hwon-nwot makhange mix ang zong adün ang thoüi ilaxlechu ija füi opüima tüikyabu hama hwom thaikya kha aho ang thoüi.

¹⁰ Chemthüikoxle hwom tsaingat kaxngui füi mix dyen ang hia alünle ajong angkya, onüi angchu Jehudi nok zanglom tokhange mong alüixle hüikyabu tüihu le.

¹¹ Hwom zangwün abax angkya zongpong jao changle, chemthüikoxle hwome ngun kop angkya thünzak mwot anwot-anokya tokhange hwome kako-kako angkhae lanle mong ama ngole.

¹² Hwom kha angkya Krata nok ajepa tuita changkya, owae otsing akaxle thüi: “Krata nok ma othuithuima tselopbu, müishix mixmabu, ilaxle zaxkak sütbakmixbu changle.”

¹³ Ikhoma nange hwom to azaxle sa angkya changle, ikoxletix mongong ma hwom owan müiüi,

¹⁴ üntoxle hwome athaxpi Jehudi nok pupa zangwünbu tamchu otsingtsing wün ahaikya khünakbu tokhange hüikya khünak kaxtombu to mongle künlaxle chingoüi.

¹⁵ Ma alüile tsaole ngokyabu zong to pangnu wüi otsao; ikoxlechu mongong chitüikya hia achax le ngokyabu zong to tsaokya chemchu müntüi, chemthüikoxle hwom khangka hia tutex tsaotha le chitüi.

¹⁶ Hwome Zang tsingle le thüitüia, ikoxlechu hwom mwot makhange chitsing khato le ahole. Hwom a, müikya mwotli tuitachu mok ang chiasukya miktsak füikya hia kax ma chilaxkyabu changle.