RUT LAIPEX 3 - OTSAO BAIBEL (BSI)

Rut-e Kakopa Atak

¹ Hanpak noxta lekya füima Naomi-e Rut ang thüi: “Nang ang ma homkha tüile ngo angkya hanpakma kakopa tuita lomle atak angkya changle.

² Boaz, owa haxtok ma nange shekobu füi tomle tsaxwüt asüile changkya hex, chix a kem zongto mamix tuita changle. Apakoplax, aja hansonge chixe tsaxnak angkya changle.

³ Nange ti ajolax, ongan müikya ongan müikya münga palax ilaxle sümüikya nyi-zalaxle achwonlax. Ifüima nang chixe tsaxnakle ngokya khato nguilax, ikoxlechu fongsax-laklingle machang tanto nang ikhama tüikya chixe awan ang taxkox.

⁴ Chix ojongma jippuix ija awanle kop ang azonglax, ilaxle chix mikngüt müile jipkya füima, noplax ilaxle chix cha to chwopkya laolaxle chix chitong ma shuilax. Nange chemle moküihex, chixe apuale faüi.”

⁵ Rut-e lan: “Nange atomtom komle moküi.”

⁶ Ikhoma Rut saxnak nui to pao ilaxle honyenue adangle fakya lailaile mok.

⁷ Chemtue Boaz-e saxlingle changkya tsuak puix, chix a khangka hingle tüikya. Chix a tsax zütle thokthomkya dingma jip angle shui. Rut ajingle dong, chix cha to chwopkya nyi lao ilaxle chix chithong ma shui.

⁸ Awün-ningle chix laoxle zo ilaxle hukoxle chix chithong ma sheko tuita jiple ngokya ngünlaxle tüle abüt.

⁹ Chixe atüi: “Nang a opupu?” She-e lan: “Alixachong, ku a Rut changpu. Nang a mamix ang chang laxle ku to hume angkya hünlit nang hato nguikya daile chingchalaxle ku nang kakonu ang laxhüi.”

¹⁰ Chixe lan: “Jowanpae nang to mohimanle naxchang. Nange hünnyenu to humele hüikya thak to athax nange chem mokle ngopuix ijae kem homkha to achuak-achenle e-sekya ahodaoa. Nang owawa naosün, tüinangkya mix wüi changlax chichangba chitüi-chinangkya mix wüi changlax, lomle pao angchu those, ikoxlechu chipao.

¹¹ Rut, athax nang taxaban. Nange ju-lomkya kue bakle mokfaüi; tingnok angkya khünak noknusae awanle ngopu nang ang tuita müikya mixcha changle.

¹² Ku a nang zongto mamix jaojao tamchu nang hanpakma hume angkya ku hünlit jaojao ikoxlechu ku füi ngaxchu mamix tomta tuita mixsün tüile.

¹³ Nang zangngai tan ang ikhama ngodao, ilaxle ngainop chixe nang hanpakma hünlix chilax hia laxüi ija tsingle kop-hax. Chixe pongle jangkop tsuak müihupu; chixe münlaxtsuakle jangthüi: kue ozün ma tüikya Jowanpa mün ma akaxpu, ija hünlix kue laxüi. Athax a ima shuile ngainopkya zangngai tanle nuidao.”

¹⁴ Ikhoma she chix chithong ma shui, ikoxlechu mathwon mixthwon tsingle zangngaiüi thoto wüi she zole pao, chemthüikoxle she ikhato she nguile pomkya owa angchu awan ang koxse chitsu.

¹⁵ Boaz-e she ang thüi: “Nang nyi siklax ilaxle ikhama nomlax.” She-e ile mok, ilaxle chixe ima tsaxsa-tula tsax hünkho nguile thokle kox. She suakkang ma ija nwonle dan ang chixe asunle kox. Ifüima she ija koplaxle tingnu to chat.

¹⁶ Chemtue she hom to nguipuix, honyenue she ma atüi: “Ku sacha, nang chempangle changlaxpu?” Boaz-e she hanpakma mokle fakya pangwüi Rut-e honyenu hama wünle kox.

¹⁷ She-e thüi: “Chixe ku ang nang hato chak hua ma chichat angkya changle le akax, ilaxle ibibi tsax chixe ku ang koxle awünpu.”

¹⁸ Naomi-e she ang thüi: “Athaxpi ibu chempangle changpuix mike ngünle mahüi tanto nang adule ngohüi. Anyix ija zangwün tsaifün-kaxwünle machang tanto Boaz ang nazak müntüipu.”