RUT LAIPEX 2 - OTSAO BAIBEL (BSI)

Rut-e Boaz Haxtok ma Mwotmokkya

¹ Naomi ang Boaz le amünkya mamix tuita tüikya. Chix a hakpa sün tuita tamchu Elimelek hwom haxnu homsa changkya.

² Nyixta Rut-e Naomi ang thüi: “Mixe awütle toxkya tsaxwüt asüi ang ku mix hax to ka fang. Ku ongpu owawa ku ang chix füi tomle mok ang tomüi.” Naomi-e lan: “Ku sacha, kakox.”

³ Ikhoma Rut mix haxtok to ka ilaxle mwotmok mixbu füifüile hwome awütle toxkya tsaxwütbu asüile azüi. Ija she kakya haxtok ang Boaz haxtok ang changle asu.

⁴ Noxta füima Bethlehem tokhange Boaz chix jaojao ikhato ka ilaxle mwotmokle ngokyabu ang salam kax akax. Chixe thüi: “Jowanpa hünzom füi naxtüi.” Hwome lan: “Jowanpae nang to mohimanle naxchang!”

⁵ Hwom mwot to hule ngokya mix ma Boaz-e atüi: “Chuja naocha a opupu?”

⁶ Ija mixsüne lan: “She a Naomi füi tomle nguikya Moab cha changle.

⁷ Mwt mok mixbu füifüima tsaxwüt asüile chang angkya she-e ku ma tikpu. She-e swomsa makhange wüi mokle hüilaxle athaxtix onox ma nazakle zangkhung ma thungtan.”

⁸ Ifüima Boaz-e Rut ang thüi: “Kue nang ang olom apuafang. Ikhama asüikya boma tsaxwüt nange mama khato taxasüi. Ikhama mwotmokle tüikya shekobu füi tomle moklax;

⁹ hwome tsax ochito zütpuix, hwom nuakfüifüile azuile asüilax. Kue ku khünakbu ang nang to sa-male taxchang-ole akaxdaoa. Chemtue nang tilanle changüihex, hwome khole thomkya tipe angkya ti linglax.”

¹⁰ Rut-e akhuxle hax to chikux athong laxle Boaz ang thüi: “Ku ningkya mixnokcha to nang mik-hu ma chingcha homfang chem ngünlaxpu?”

¹¹ Boaz-e lan: “Nang kakopa zile paokya füima nange ma-nyenu to chemle atu-alitle hume hüipuix ibu kue pangwüi atatle laxdaoa. Manu-mapa hwom hia ma chaxwan dantoxlaxle otuechu chingüntoxkya khünakbu füi tomle ngo ang nang chemle nguipuix ibu kue awan ang kopdaoa.

¹² Nang chem mokdaopuix ija to Jowanpae mohimankya naxtüi. Israel nok Jowanpa owa tong to nang ma khang khom ang nguile tüilaxpuix, chixe nang to chingchajajakya naxtüikox!”

¹³ Rut-e lan: “Nang a ku zongto chingcha füikya mixsün changle. Nange kaxmüi zangwün makhange ku ang mong amüidaoa. Wünhax thüikoxle ku a nang da tuita tukux ngaxchu chichanghupu.”

¹⁴ Saxtsom sax pongma Boaz-e Rut ang thüi: “Hüilax üntoxle an koplax ilaxle ija sui ma somle saxlax.” Ikhoma she mwotmixbu füi tomle thung. Boaz-e she hato wongfuak hidaole apongle kox. She-e wokfwot müile sax ilaxle ngaxchu ota tox.

^15-16 Tsaxwüt asüi ang she laile chang füima Boaz-e chix mwotmok mixbu ang thüi: “Tsaxthop tüikya khatochu she ang asüi ang laxkox, she to taxabax. Iboma ngaxchu hünzome tsaxthop angkya tsaxto sukle she-e asüi ang dantoxkox.”

¹⁷ Ikhoma Rut-e hanhom kople tsaxwüt asüi. She-e ibu nakle tsui füima tsaxjun hünkho nguile bang.

¹⁸ She-e ija tsaxjun hom to wünlaxle honyenu hama aho. She-e saxtsom atale wünkya chuwüi she chak to kox.

¹⁹ Naomi-e she ma atüi: “Anyix nang ibibi tsax ojongto asüilax? Nange owa haxtok ma asüi? Nang to chingchale hukya mix to Zang mohimankya naxtüikox!” Rut-e Naomi hama she-e Boaz le amünkya mixsün haxtok ma asüikya wünle kox.

²⁰ Naomi-e thüi: “Jowanpae Boaz to mohimankox! Ozün hia omang pangnu füi Jowanpae chix kaxtsao otya ma thomle.” She-e chizakle akaxle le: “Ija mixsün a kem zongto ma-mix changpu. Künyi to humele chang angkya hünlix laxlaxle ngokya mixsün tuita.”

²¹ Ifüima Rut-e thüi: “Tamnüilechu chixe, tsaxzüt ashukkya kople chix mwot mokmixbu füi tomle asüi angkya akaxle.”

²² Naomi-e Rut ang thüi: “Ku sacha, nang zongto Boaz haxtok ma mokle ngokya shekobu füi tomle mokkya wüi sümüi. Owawa mix haxtok to ka koxle nang to aza-anale chu chang ang tsuak.”

²³ Ikhoma tsaxsa-tula tsaxzüt ashukkya kople Rut-e ibu füi tomle tsaxwüt asüile mok. She a chipaole honyenu füi tomle ngo.